Papita pyaka 17 bulukira ndzidzi udacita Yezu mibvundzo apfundzisi mu templo. Cincino wafika ndzidzi wa khoni wa caka 29 N.W. Azinji asalonga pya Juwau, wacibale wa Yezu wakuti akumwaza mphangwa ku cisa ca kumadokero a dzuwa ca Nkulo wa Yordani.

Maonekero na malongero a Juwau asadzumatirisa anthu. Nguwo zace zacitwa na uweya wa kamelo, pontho abvala sintu ya nthembe n’cunu mwace. Cakudya cace cikhali nthete na uci. Kodi mphangwa zikhamwaza iye zikhalonganji? ‘Tcunyukani thangwi Umambo wakudzulu uli dhuzi.’—Mateu 3:2.

Mphangwa zenezi zikhali zakutsandzayisa kakamwe kwa ale akhabvesera Juwau. Azinji adzindikira kuti akhafunika kutcunyuka, peno kucinja makhaliro awo akuipa. Iwo akhadabuluka ku ‘Yerusalemu, ku Yudeya onsene na pisa pyonsene pya Yordani.’ (Mateu 3:5) Azinji adabwera kuna Juwau atcunyuka, pontho iye aabatiza mu nkulo wa Yordani. Thangwi yanji?

Juwau akhabatiza anthu ninga cidzindikiro cakuti iwo atcunyukadi ku madawo awo akukhonda kubvera Mwambo wa Mulungu. (Mabasa 19:4) Mbwenye si onsene tayu akhapangiza kuti atcunyukadi. Pidafika atsogoleri anango auphemberi, Afarisi na Asadhuki pakakhala Juwau, iye alonga kuti iwo akhali ‘dzindza ya nyoka.’ Juwau alonga: ‘Citani pinthu pinapangiza kutcunyuka kwanu. Lekani kunyengezeka mbamulonga kuti Babathu ndi Abhrahamu. Thangwi ndinakupangani kuti Mulungu angafuna, anakwanisa kuphatisira miyala iyi toera kucitira Abhrahamu ana. Onani! Macado ali pa tsinde ya muti. Natenepa, muti onsene unakhonda kubala misapo yadidi unagwandwa mbuponyiwa pa moto.’—Mateu 3:7-10.

Thangwi ya mphangwa za cenjezo zikhamwaza iye, cilemedzo cikhatambira Juwau na anthu azinji adabatiza iye, anyantsembe na Alevi atumwa toera akambvundze kuti: ‘Kodi iwe ndiwe ani?’

Juwau atawira: ‘Ine sine Kristu tayu.’

Iwo abvundza: ‘Mphapo ndiwe ani? Ndiwe Eliya?’

Iye atawira: ‘Nkhabe.’

Iwo abvundza pontho: ‘Kodi iwe ndiwe Mprofeta wankulu adalonga Mose kuti anabwera?’—Deuteronomyo 18:15, 18.

Juwau atawira: ‘Nkhabe!’

Iwo apitiriza kubvundza: ‘Mphapo ndiwe ani? Tipange toera tikwanise kupereka ntawiro kwa ale adatituma kuti tibwere kuno. Unalonganji thangwi ya iwe ene?’ Juwau atawira: ‘Ine ndine fala ya munthu anakhuwa n’thando kuti: ‘Sasanyirani njira ya Yahova’ ninga mudalongera mprofeta Izaiya.’—Juwau 1:19-23.

Iwo abvundza: ‘Khala siwe Kristu tayu, siwe Eliya tayu, siwe Mprofeta tayu, thangwi yanji ukubatiza anthu?’ Juwau apereka ntawiro wakubveka mwadidi: ‘Ine ndisabatiza anthu na madzi, mbwenye pakati panu pana munthu wakuti nee musandziwa. Iye anadzabwera nduli mwanga.’—Juwau 1:25-27.

Juwau akhadziwa kuti akusasanyira njira toera anthu akhale na ntima wadidi na wakutawira Mesiya, wakuti anadzakhala Mambo. Thangwi ya iye, Juwau alonga: ‘Ule anabwera nduli mwanga ndi wamphambvu kakamwe kupiringana ine, ine sidathema tayu kudula masandalya ace.’ (Mateu 3:11) Iye alonga pontho: ‘Anadza nduli mwanga ananditsogolera, thangwi iye akhalipo kale ine mbandidzati kubalwa.’—Juwau 1:15.

Natenepa, mphangwa za Juwau zakuti ‘Tcunyukani thangwi Umambo wakudzulu uli dhuzi’ zikhali zakufunika. (Mateu 3:2) Pyenepi pikhacitisa anthu kudziwa kuti basa ya Mambo wa Yahova, Yezu Kristu ikhali cifupi toera kutoma.