Mu pyaka pizinji, Mboni za Yahova zaphatisira, zadhinda na zagawira ntundu wa Mabhibhlya akusiyana-siyana. Mbwenye taona kukhala pyakufunika kubulusa Bhibhlya yakuthumburuzwa papswa, yakuti mbidaphedza anthu kukhala na ‘cidziwiso candimomwene,’ thangwi ceneci ndi cifuno ca Mulungu kwa anthu onsene. (1 Timoti 2:3, 4) Natenepa, mu caka 1950 tatoma kubulusa makhundu a Bhibhlya yakubverana na malongero athu a ntsiku zino, Tradução do Novo Mundo. Bhibhlya ineyi yathumburuzwa mwakukhulupirika na mwakulinganira mu pilongero pyakupiringana 130.

Ikhafunika Bhibhlya yakukhonda nentsa kubvesesa. Mu kupita kwa ndzidzi pilongero pisacinja, m’Mabhibhlya mazinji mwaphatisirwa mafala akale akuti ndi akunentsa kubvesesa. Pontho, malembo akale akuti ndi akulinganira na akubverana kakamwe na malembo akutoma asagumaniwa, pyenepi pisaphedza kubvesesa mwadidi malemba Acihebere, Ciaramaki, na Cigerego.

Ikhafunika Bhibhlya yakuthumburuzwa mwakukhulupirika ku mafala a Mulungu. Mbuto mwakucinja mafala akupumirwa a Mulungu, anyakuthumburuza Bhibhlya akhafunika kuphatisira mwakukhulupirika malemba akutoma. Mbwenye, m’Mabhibhlya mazinji, dzina ya Mulungu, Yahova, nee isaphatisirwa.

Ikhafunika Bhibhlya yakuti isapasa mbiri Nsasanyi wayo. (2 Samwele 23:2, Tradução do Novo Mundo) Mu Tradução do Novo Mundo, dzina ya Yahova yaikhwa papswa mule musagumanika iyo maulendo akukwana 7.000 m’malembo akale a Bhibhlya ninga mudafokotozerwa ipyo padzulo. (Masalmo 83:18, NM) Maphindu a pyaka pizinji pya kuwangisira toera kusaka mwacidikhodikho, Bhibhlya ineyi ndi yakutsandzayisa kuileri thangwi isapangiza pakweca manyerezero a Mulungu. Khala muli na Tradução do Novo Mundo mu cilongero canu peno nkhabe, tisakuwangisani toera kukhala na ndandanda wadidi wakuleri Mafala a Yahova ntsiku zonsene.—Yoswa 1:8; Masalmo 1:2, 3.

• Thangwi yanji tatonga kuti isafunika Bhibhlya yakuthumburuzwa papswa?

• Munthu onsene anafuna kudziwa cifuno ca Mulungu, asafunika kucitanji ntsiku zonsene?