Midzidzi inango anthu asatisingirira mbaipirwa na ife tingalonga nawo pya Yahova. Pyenepi pinaticitisa kufuna kusiya kulonga pya Mulungu. Wathimbana kale na makhaliro anewa?— Bhibhlya isatipanga pya mphale wakuti akhafuna Yahova, mbwenye akhali duzi na kusiya kulonga pya iye. Dzina yace ikhali Yeremiya. Tende tipfundze pizinji thangwi ya iye.

Pikhakhala iye mphale, Yeremiya apangwa na Yahova kuti akhafunika kucenjeza anthu toera asiye kucita pinthu pyakuipa. Pyenepi pikhali pyakunentsa kakamwe kwa Yeremiya, pontho iye akhagopa. Iye apanga Yahova: ‘Ine nkhabe kwanisa kulonga. Ndine mwana kakamwe.’ Mbwenye Yahova ampanga: ‘Leka kugopa tayu. Ine ndinadzakuphedza.’

 Natenepa, Yeremiya atoma kucenjeza anthu kuti angakhonda kucinja, mbadatcinyuswa. Usanyerezera kuti anthu acita pidalonga Yeremiya?—Nkhabe. Iwo ansingirira, peno aipirwa kakamwe na iye. Anango akhafuna kumupha! Usanyerezera kuti Yeremiya apibva tani?— Iye agopa mbalonga: ‘Ine nkhabe longabve mu dzina ya Yahova.’ Kodi iye asiyadi?— Nkhabe, iye nee asiya. Iye akhafuna kakamwe Yahova, kwakuti akhacimwana kusiya kulonga pya iye. Nakuti Yeremiya nee abwerera nduli, Yahova apitiriza kuntsidzikiza.

Mwacitsandzo, ntsiku inango anthu akuipa aponya Yeremiya mu ncera wakuzika wakuti ukhadadzala na matope. Iye nee akhali na cakudya peno madzi. Anthu anewa akhafuna kuti Yeremiya akhale mwenemu toera afe. Mbwenye na ciphedzo ca Yahova, iye apulumuka!

Unapfundzanji kubulukira ku citsandzo ca Yeremiya?— Ngakhale kuti midzidzi inango akhagopa, iye nee asiya kulonga mu dzina ya Yahova. Ungalonga pya Yahova, panango anthu anakusingirira, peno kuipirwa na iwe. Panango unakhala na manyadzo, peno kugopa. Mbwenye leka kusiya kulonga pya Yahova. Ndzidzi onsene iye anadzakuphedza, ninga mudaphedzera iye Yeremiya.