Toera kutiphedza kuti tidziwe Mwanace, mwaufuni Yahova alembesa mabukhu manai a Bhibhlya akuti asalonga pya umaso wa Yezu na utumiki wace. Mabukhu anewa asatipanga pinthu pidalonga Yezu, pidacita iye na mabvero akhali na iye. Pontho iwo asatiphedza toera ‘kunyerezera mwacidikhodikho’ citsandzo ca Yezu. Mwandimomwene, m’mabukhu anewa musagumanika pinthu pyonsene pinalonga thangwi ya umaso wa Yezu. Natenepa tingapfundza mabukhu anewa, tinakwanisa kundziwa mwadidi kakamwe. Pyenepi pinatiphedza toera kutowezera manyalo ace mwakukhulupirika. Toera kuphindula mwakukwana na bukhu ya Mateu, Marko, Luka na Juwau tisafunika kucita pizinji kupiringana kualeri basi. Ife tisafunika kukhala na ndzidzi toera kuapfundza na kunyerezera mwacidikhodikho pire pinapfundza ife. (Onani Yoswa 1:8, cidzindikiro capantsi) Nyerezerani pinthu pinapfundza imwe m’mabukhu anewa. Phatisirani manyerezero anu toera kuona na kubva pidacitika. Fufudzani mabukhu anatipasa gulu ya Yahova. w21.04 tsa. 4-5 ¶11-13.

Pyaka pizinji Yezu mbadzati kubwera pa dziko yapantsi, Yahova akhadalonga kale mwanyapantsi kuti Mesiya mbadaguliswa na kobiri 30 za parata. (Zak. 11:12, 13) Iye mbadasandukirwa na m’bodzi wa axamwali ace. (Mas. 41:9) Mprofeta Zakariya alembambo kuti: “Ndoko kaphe nkumbizi, penepo mabira ace anadzabalalika.” (Zak. 13:7) Anthu a mitima yadidi nee mbadakhonda Yezu thangwi ya pinthu pyenepi pikhacitika kuna iye. M’mbuto mwace, cikhulupiro cawo mbicidakhala cakuwanga thangwi yakuona kukwanirisika kwa maprofesiya anewa kuna Yezu. Kodi pyenepi pisacitikambo lero? Inde. Lero, anango anadziwika ninga Mboni za Yahova asasiya kutumikira Yahova mbakhala anyakupanduka, pontho asayeserambo kupeusa anango. Iwo asamwaza mphangwa za uthambi mbalonga mwakuipa Mboni za Yahova mukuphatisira majornali, radhyo, televizau na interneti. Mbwenye anthu a mitima yadidi nee asapeuswa na mphangwa zenezi. M’mbuto mwace, iwo asadziwa kuti Bhibhlya ikhadalonga kale mwanyapantsi kuti pinthu pyenepi mbapidacitika.​—Mat. 24:24; 2 Ped. 2:18-22. w21.05 tsa. 11 ¶12; tsa. 12-13 ¶18-19

Bhibhlya isalonga pakweca kuti cidziwiso candimomwene cisathimizirika mwapang’ono na pang’ono. (Akol. 1:9, 10) Yahova asabvekesa undimomwene wace mwapang’ono na pang’ono, pontho ife tisafunika kudikhira mwakupirira toera kubvesesa mwadidi undimomwene unoyu. Mathubo Akutonga angaona kuti asafunika kucinja kubvesesa kwathu undimomwene, iwo asacita macinjo anewa mwakukhonda dembuka. Magereja mazinji lero asacinja njira yakupfundzisa pinthu toera kukomeresa anthu awo peno toera akhale akubvekera kakamwe pa dziko. Mbwenye Mboni za Yahova zisacita macinjo thangwi ife tisafuna kukhala na uxamwali wakuwanga na Mulungu na kumulambira munjira ninga idacita Yezu. (Tiya. 4:4) Ife nee tisacita macinjo toera kutowezera maonero a anthu a dziko, mbwenye tisacita macinjo thangwi tabvesesa mwadidi undimomwene wa Bhibhlya. Ife tisafuna kakamwe undimomwene.​—1 Ates. 2:3, 4. w21.10 tsa. 22 ¶12

Munacitanji khala musapibva kuti muli mwekhene? Nyerezerani mwadidi njira zinakuphedzani Yahova. (Mas. 55:22) Pyenepi pinakuphedzani toera kuona kuti nee muli mwekhene. Nyerezeranimbo ciphedzo cinapereka Yahova kuna abale na alongo akuti asapibva kuti ali okhene. (1 Ped. 5:9, 10) M’bale Hiroshi wakuti amala pyaka pizinji mbatumikira ekhene Yahova m’banja mwawo alonga: “Ife tisadziwa kuti tonsene tisawangisira toera kutumikira Yahova, pontho pyenepi pisaphedzambo ale akuti ali okhene mu undimomwene.” Ndzidzi onsene citani phembero, lerini Bhibhlya na gumanikani pa misonkhano. Imwe musafunika kupanga Yahova pinthu pyonsene pinakudzudzumisani. Tisafunika kuleri Bhibhlya ntsiku zonsene, pontho nyerezerani mwacidikhodikho pitsandzo pya m’Bhibhlya pinapangiza kuti Yahova asakufunani. Abale na alongo anango asakoya malemba m’manyerezero akuti asaabalangaza kakamwe ninga Masalmo 27:10 na Izaiya 41:10. Anango asabvesera ma audhyu mu ndzidzi unakhunganyika iwo misonkhano peno mu ndzidzi unaleri iwo Bhibhlya, pontho pyenepi pisaaphedza toera akhonde kupibva kuti ali okhene. w21.06 tsa. 9-10 ¶5-8

Kodi imwe muli wakutsukwala thangwi yakuferwa na nyakufunika wanu? Wangisani cikhulupiro canu ku cidikhiro cakulamuswa muli akufa mukuleri mphangwa za m’Bhibhlya zinalonga pya anthu adalamuswa muli akufa. Kodi imwe muli wakutsukwala thangwi m’bodzi wa pabanja panu abuluswa mu mpingo? Pfundzani toera mukhale na cinyindiro cakuti Yahova ndzidzi onsene asalanga mwadidi kakamwe. Mwakukhonda tsalakana nyatwa zinathimbana na imwe, phatisirani ndzidzi unoyu wa nyatwa toera kuwangisa cikhulupiro canu. Pangani Yahova pinthu pyonsene piri muntima mwanu. Lekani kukhala mwekhene, mbwenye khalani cifupi na abale na alongo anu. (Mis. 18:1) Citani mabasa akuti anakuphedzani toera kupirira, maseze imwe musakumbuka pinthu pyakutsukwalisa pidakucitikirani. (Mas. 126:5, 6) Pitirizani kuenda ku misonkhano, kumwaza mphangwa na kuleri Bhibhlya. Pontho nyerezerani pinthu pyadidi kakamwe pidapikira Yahova toera kukupasani ntsogolo. Mungaona njira inakuphedzani Yahova cincino, cikhulupiro canu cinakhala cakuwanga kakamwe. w21.11 tsa. 23 ¶11; tsa. 24-25 ¶17

Kodi anyakupfundza a Yezu ndi ninga “anang’ono” munjira ipi? Mwandimomwene, anthu akupfuma, akudziwika na apidzo asaoniwa ninga akufunika kakamwe mu dziko ino. Mwakusiyana na anthu anewa, anyakupfundza a Yezu asaoniwa ninga anthu akusowa basa peno ninga “anang’ono.” (1 Akor. 1:26-29) Mbwenye Yahova nee asaaona munjira ineyi. Ninji cidacitisa Yezu kulonga mafala akuti ‘anang’ono awa’? Thangwi anyakupfundzace akhadancita mbvundzo uyu: “Mbani nkulu kakamwe mu Umambo wakudzulu?” (Mat. 18:1) Ayuda azinji akhafuna kuti anthu anango aaone ninga anthu akufunika kakamwe. Nyakupfundza pya Bhibhlya unango alonga kuti: “Kulemedzwa na anango na kupaswa mbiri pikhali pyakufunika kakamwe mu umaso wawo.” Yezu akhadziwa kuti Ayuda azinji akhaona kuti ndi akufunika kakamwe kupiringana anango, natenepa anyakupfundzace akhafunika kuwangisira  kakamwe toera kukunda makhaliro anewa. w21.06 tsa. 20 ¶2; tsa. 21-22 ¶6, 8, 9

Mpostolo Paulu ndi citsandzo cadidi ninga nkulu wa mpingo. Mwacitsandzo, mu ndzidzi wakuti abale a ku Tesalonika akhafunika kupaswa uphungu, Paulu nee anyinyirika toera kucita pyenepi. Mbwenye pakutoma, Paulu aasimba thangwi ya mabasa akhacita iwo mwakukhulupirika na mwaufuni, pontho thangwi ya kupirira kwawo. Iye aapangambo kuti akhadziwa kuti akuthimbana na pinentso, pontho kuti akupirira pinentso. (1 Ates. 1:3; 2 Ates. 1:4) Kusiyapo pyenepi, Paulu apanga abale anewa kuti iwo akhali citsandzo cadidi kuna Akristu anango. (1 Ates. 1:8, 9) Iwo atsandzaya kakamwe thangwi ya kusimbwa na Paulu. Pyenepi pyapangiza pakweca kuti Paulu akhafuna kakamwe abale na alongo ace. Na thangwi ineyi, iye akwanisa kupereka uphungu wakuphedza m’matsamba mawiri adalembera iye abale a ku Tesalonika.​—1 Ates. 4:1, 3-5, 11; 2 Ates. 3:11, 12. w22.02 tsa. 15 ¶6

Sathani asaphatisira atsogoleri a mauphemberi authambi toera alonge kuti Yahova ndi wakuipa ntima, pontho ndiye anathabusa anthu. Mwacitsandzo, mwana angafa, anango asalonga kuti ndi Mulungu ankwata, thangwi iye akhafuna anju unango kudzulu. Mafala anewa asatikanisa Mulungu! Mbwenye ife tisadziwa u­ndimomwene. Tingaphatwa na utenda wakugopswa peno tingaferwa na munthu wakufunika, ife nee tisapasa mulando Mulungu wathu. Mbwenye ife tisakhulupira kuti ntsogolo iye anadzamalisa nyatwa zonsene. Kusiyapo pyenepi, ife tisapanga anthu onsene kuti Yahova ndi Mulungu waufuni. Pyenepi pisacitisa Mulungu toera akwanise kutawira ule ananxola. (Mis. 27:11) Yahova ndi Mulungu wantsisi. Iye asatsukwala kakamwe angationa mbatithabuka thangwi ya nyatwa zinapirira ife ninga kutcingwa, mautenda peno kusowa kwathu ungwiro. (Mas. 22:23, 24) Yahova asatsukwala na nyatwa zathu, pontho iye anadzazimalisa.​—Onanimbo Eksodo 3:7, 8; Izaiya 63:9. w21.07 tsa. 9-10 ¶9-10

Mwakukhonda dembuka anthu akubvera anadzakhala na mwai ukulu kakamwe wakufuna Yahova na kumulambira kwenda na kwenda. Yezu anadzamalisa nyatwa zonsene zidadzesa Adhamu na Eva thangwi yakukhonda kubvera Mulungu. Yahova anadzalamusa muli akufa pikwi na pikwi pya anthu mbaapasa mwai wakukhala na ungumi wadidi na umaso wakwenda na kwenda mu paraizu pa dziko yapantsi. (Luka 23:42, 43) Anthu onsene anatumikira Yahova angadzakhala aungwiro, iwo anadzapaswa ‘mbiri na cilemedzo’ ninga pidalemba Dhavidhi. Khala imwe musacita khundu ya “mwinji ukulu” muli na cidikhiro cadidi kakamwe. (Apok. 7:9) Mulungu asakufunani, pontho asafuna kuti imwe mucite khundu ya atumiki ace. Natenepa citani pyonsene pinakwanisa imwe toera kunkomeresa. Ntsiku zonsene nyerezerani mwacidikhodikho mapikiro a Mulungu. Pontho lemedzani mwai uli na imwe wakulambira Yahova na kunsimba kwenda na kwenda. w21.08 tsa. 7 ¶18-19

Mprofeta Yeremiya amwaza mphangwa mu pyaka pyakupiringana 40 maseze anthu akhakhonda kubvesera mphangwa zikhamwaza iye, pontho akhan’tcinga. Iye atsukwala kakamwe thangwi ‘yakutikanwa na kupwazwa’ na anyamalwa ace, mbanyerezera kusiya basa yace yakumwaza mphangwa. (Yer. 20:8, 9) Mbwenye Yeremiya nee abwerera nduli! Ninji cidam’phedza toera kukunda manyerezero ace akuphonyeka, mbakhala wakutsandzaya m’basa yace yakumwaza mphangwa? Ndi thangwi yakuti iye akhanyerezera pinthu piwiri pyakufunika. Cakutoma, mphangwa za Mulungu zikhamwaza Yeremiya zikhapereka ‘cidikhiro na tsogolo yadidi’ kuna anthu. (Yer. 29:11) Caciwiri, Yeremiya akhamwaza mphangwa mu dzina ya Yahova. (Yer. 15:16) Ife tisamwaza mphangwa zakuti zisapereka cidikhiro kuna anthu, pontho tisamwaza mphangwa mu dzina ya Yahova ninga Mboni zace. Tingakumbuka pinthu pyenepi, tinakwanisa kukhala akutsandzaya mwakukhonda tsalakana khala anthu anatawira mphangwa zinamwaza ife peno nkhabe. Natenepa, lekani kutsukwala peno kubwerera nduli khala anyakupfundza anu a Bhibhlya nee akuthambaruka mwakucimbiza. Basa yakucita anyakupfundza isaphemba kupirira.​—Tiya. 5:7, 8. w21.10 tsa. 27 ¶12-13

Mwakukhonda tsalakana khala tatoma kale kutumikira Yahova peno nkhabe, ife tisafunika kupitiriza kuwangisa cikhulupiro cathu kuna Mulungu. Thangwi yanji? Thangwi tingakhonda kucita pyenepi, cikhulupiro cathu cinafewa. Kumbukani kuti cikhulupiro cisaphataniza kukhulupira pinthu pyakuti ife nee tisakwanisa kupiona. Mbwenye pinthu pinacimwana ife kuona tisapiduwala mwakucimbiza. Na thangwi ineyi, Paulu alonga kuti kusowa cikhulupiro ndi “madawo akuti asatimanga mwakukhonda nentsa.” Mphapo tisafunika kucitanji toera tipitirize kukhala na cikhulupiro cakuwanga. (2 Ates. 1:3) Cakutoma, ife tisafunika kuphemba nzimu wakucena wa Yahova ndzidzi onsene. Thangwi yanji? Thangwi cikhulupiro cisacita khundu ya misapo ya nzimu wakucena. (Agal. 5:22, 23) Kusiyapo pyenepi, ife nee tinakwanisa kupitiriza kukhulupira Mulungu tingasowa ciphedzo ca nzimu wace wakucena. Tingapitiriza kuphemba nzimu wa Yahova, iye anatipasa. (Luka 11:13) Munjira inango, ife tinakwanisa kuphembera tenepa: “Thimizirani cikhulupiro cathu.” (Luka 17:5) Caciwiri, ife tisafunika kupfundza mafala a Mulungu ndzidzi onsene.​—Mas. 1:2, 3. w21.08 tsa. 18-19 ¶16-18

Abale na alongo akukalamba anakwanisa kuphatisirwa munjira zizinji mu gulu ya Yahova. Panango iwo nkhabe mphambvu ninga zikhali na iwo kale, mbwenye iwo ali na maluso mazinji kakamwe. Natenepa Yahova anakwanisa kuaphatisira munjira zakusiyana-siyana. Mwacitsandzo, Bhibhlya isalonga pya anthu akukhulupirika akuti aphatisirwa na Yahova mu ndzidzi ukhali iwo ankhalamba. Mwacitsandzo, pikhali Mose na pyaka 80 pyakubalwa, iye atoma kutumikira ninga mprofeta wa Yahova mbatsogolera mbumba ya Izraeli. Dhanyeli pikhali iye na pyaka pyakupiringana 90, Yahova apitiriza kumphatisira ninga mprofeta. Pontho pisaoneka kuti mpostolo Juwau akhali na pyaka pyakupiringana 90 pidapumirwa iye toera kulemba bukhu ya Apokalipse. Simeoni akhali mamuna “wakulungama na wakugopa Mulungu,” mbwenye iye nee asalongwa kakamwe m’Bhibhlya. Ngakhale tenepo, Yahova akhandziwa, pontho ampasa mwai wakuona Yezu pikhali iye mwana mbalonga pinthu pikhafuna kucitika kuna Yezu na mai wace.​—Luka 2:22, 25-35. w21.09 tsa. 3-4 ¶5-7

Anyakubala asafunika kucita mphole-mphole toera akhonde kulandanisa mwana  m’bodzi na unango. Pontho nee asafunika adikhire kuti mwana acite pinthu pyakuti nee anakwanisa kupicita. Anyakubala angacita pyenepi anakwanisa kutsukwalisa mwanawo. (Aef. 6:4) Mulongo unango anacemerwa Sachiko alonga: “Mai wanga akhafuna kuti ine ndibuluse mavalore adidi pakucita maporova kuxikola, mbwenye pyenepi nee mbapidakwanisika. Ngakhale kuti papita pyaka pizinji kubulukira mu ndzidzi udamalisa ine kupfundza xikola, midzidzi inango ndisanyerezera kuti panango Yahova nee asakomerwa na ine, maseze ndisacita pyonsene pinakwanisa ine.” Mambo Dhavidhi alonga kuti iye nee ‘akhafuna pinthu pikulu kakamwe,’ peno pinthu pyakuti nee mbadapikwanisa. Kucepeseka kwace kwamphedza toera akhale ‘wakukhurudzika na wakumatama.’ (Mas. 131:2) Kodi anyakubala anapfundzanji na mafala adalonga Dhavidhi? Toera anyakubala akhale akucepeseka, iwo nee asafunika kufuna pinthu pizinji pyakuti pisapiringana mphambvu zawo, pontho nee asafunika kudikhira pizinji kuna anawo. Pontho anyakubala anakwanisa kuphedza anawo toera abvesese kuti ndi akufunika angadzindikira pinthu pinakwanisa iwo kucita mwadidi na pire pyakuti nee anakwanisa kupicita mwadidi. Buluka penepo asafunika kuaphedza toera akhazikise pifuno pyakuti anakwanisa kupikwanirisa. w21.07 tsa. 21-22 ¶5-6

Yahova apasa m’bodzi na m’bodzi wa ife ufulu wakusankhula. Na thangwi ineyi, ife tinakwanisa kusankhula khala tisafuna kum’bvera peno nkhabe. Ana anango nee akhali na anyakubala a citsandzo cadidi, mbwenye iwo asankhula kutumikira Yahova mbapitiriza kukhala akukhulupirika kuna iye. Ana anango anyakubala awo acita pyonsene pikhakwanisa iwo toera kuapfundzisa kufuna Yahova, mbwenye mukupita kwa ndzidzi iwo asiya kutumikira Yahova. Natenepa m’bodzi na m’bodzi wa ife asafunika kusankhula khala anatumikira Yahova peno nkhabe. (Yos. 24:15) Na thangwi ineyi, imwe anyakubala akuti musapasika mulando thangwi ya ananu adasiya kutumikira Yahova, lekani kunyerezera kuti ndimwe adadawisa. M’midzidzi inango, baba peno mama asasiya kutumikira Yahova, mbasiyambo banja yace. (Mas. 27:10) Pyenepi pisakhala pyakutsukwalisa kakamwe kuna ana akuti akhaona anyakubalawo ninga citsandzo cadidi. Aphale na atsikana, anang’ono, khala anyakubalanu abuluswa mu mpingo, ife tisatsukwala kakamwe, pontho dziwani kuti Yahova asabvesesa kutsukwala kwanu. Iye asakufunani, pontho asakomerwa kakamwe thangwi yakukhulupirika kwanu. Kusiyapo pyenepi, abale na alongo anu mu mpingo asatsandzayambo kakamwe thangwi yakukhulupirika kwanu. Kumbukani kuti imwe nee muli na mulando thangwi ya pisankhulo pidacita anyakubalanu. w21.09 tsa. 27 ¶5-7

Ife tinakwanisa kulandanisa Nkristu wakubuluswa mu mpingo na bira ya kuduwala yakuti inakwanisa kuthapulisa mabira anango mu nkumbi. Nkristu unoyu ali kuduwala mwauzimu. (Tiya. 5:14) Ninga munthu wakuduwala wakuti anakwanisa kuthapulisa anango utenda wace, munthu wakuduwala mwauzimu anakwanisambo kucitisa anango kutowezera makhaliro ace akuipa. Natenepa midzidzi inango ndi pyakufunika kubulusa mu mpingo munthu unoyu wakuduwala mwauzimu. Kusandika kweneku kusapangiza ufuni wa Yahova kuna abale na alongo akukhulupirika mu mpingo, pontho kunaphedza munthu adacita madawo toera kudzindikira pinthu pyakuipa pidacita iye mbatcunyuka. Munthu adabuluswa mu mpingo anakwanisa kugumanika pa misonkhano toera atambire pipfundziso pyakubuluswa m’Bhibhlya pyakuti pinamphedza toera kukhala pontho na cikhulupiro cakuwanga. Iye anakwanisambo kutambira mabukhu toera kualeri na kuapfundza, pontho anakwanisa kuona mavidhyu a JW Broadcasting. Kusiyapo pyenepi, akulu a mpingo angaona kuti iye akucita macinjo, iwo anakwanisa kumpasa uphungu midzidzi inango toera kum’phedza kuti akhale pontho na uxamwali wakuwanga na Yahova. Munjira ineyi, iye anakwanisa kukhala wakuthema toera kubwezereswa mu mpingo. w21.10 tsa. 10-11 ¶9, 11

Lero, ife tisatowezera citsandzo ca Akristu a mu ndzidzi wa apostolo thangwi ya ulambiri. Mwacitsandzo, ife tiri na masasanyiro mabodzi ene ninga akhali na Akristu a mu ndzidzi wa apostolo. Ife tiri na ayang’aniri a cisa, akulu a mpingo na atumiki akutumikira. (Afil. 1:1; Tito 1:5) Pontho ninga Akristu a mu ndzidzi wa apostolo, ife tisalemedza mitemo ya Yahova thangwi ya kupita m’mabonde na kumanga banja, tisalemedza pinalonga Mulungu thangwi yakuphatisira ciropa, pontho tisatsidzikiza mpingo kuna ale anakhonda kubvera mitemo ya Mulungu. (Mabasa 15:28, 29; 1 Akor. 5:11-13; 6:9, 10; Aheb. 13:4) Bhibhlya isalongambo mwapakweca kuti pali na “cikhulupiro cibodzi” cakuti ndi cakutawirika kuna Mulungu. (Aef. 4:4-6) Ndi mwai ukulu kakamwe kwa ife kukhala m’bodzi wa atumiki a Yahova na kudziwa undimomwene thangwi ya Yahova na cifuniro cace! Natenepa tendeni ticite pyonsene pinakwanisa ife toera tikhale na cinyindiro cakuwanga cakuti tiri mu undimomwene. w21.10 tsa. 23 ¶15-17

Mambo Yosafate athimbana na nyatwa ikulu kakamwe. Nsoka ukulu wa anyankhondo wa Aamoni, Amoabhe na anyankhondo a kucisa ca mapiri ca Seiri athusa Yosafate, banja yace na anthu akhatonga iye. (2 Kro. 20:1, 2) Kodi Yosafate acitanji? Iye aphemba Yahova toera am’phedze na kumpasa mphambvu. Phembero yakucepeseka idacita Yosafate inagumanika pa lemba ya 2 Kronika 20:5-12, isapangiza kuti iye akhanyindira kakamwe Yahova. Yahova alonga na Yosafate kubulukira kuna Mulevi wakuti akhacemerwa Yazieli, mafala anagumanika pa lemba ya ntsiku ya lero. Nakuti Yosafate akhanyindira Mulungu wace, iye abvera pitsogolero pyenepi. Pidaenda iye kamenyana na anyamalwa ace, iye nee aikha anyankhondo a maluso patsogolo, mbwenye aikha anyakuimba akusowa pida. Yahova akwanirisa pikiro idacita iye kuna Yosafate. Iye akunda anyamalwa ace.​—2 Kro. 20:18-23. w21.11 tsa. 15-16 ¶6-7

Tingathimbana na mayesero, tinakwanisa kukhala na cinyindiro cakuti Yahova anatiphedza toera tipitirize kukhala akukhulupirika. (2 Akor. 4:7-9) Ife tinakwanisa kunyindira kuti ufuni wakukhonda mala wa Yahova unapitiriza na ife thangwi nyamasalmo alonga: “Maso a Yahova asayang’anira ale anan’gopa, ale anadikhira ufuni wace wakukhonda mala.” (Mas. 33:18-22) Mbatidzati toma kutumikira Yahova, ife tatambira ufuni wa Mulungu unapangiza iye kuna anthu onsene. Mbwenye ninga alambiri ace, iye asapangiza ufuni wakukhonda mala kuna ife. Thangwi ya ufuni unoyu wakukhonda mala, Yahova asatikhumbatira mbatitsidzikiza na mikono yace. Ndzidzi onsene iye anakhala cifupi na ife, pontho anakwanirisa pidapikira iye kuna ife. Iye asafuna kuti ife tikhale axamwali ace kwenda na kwenda! (Mas. 46:1, 2, 7) Natenepa, mwakukhonda tsalakana pinentso pinafuna kuthimbana na ife, Yahova anatipasa mphambvu toera tipitirize kukhala akukhulupirika. w21.11 tsa. 7 ¶17-18

Azinji a ife tisadziwa anthu akuti akhala akuipirwa na anyabasa andzawo, andzawo akuxikola peno m’bodzi wa acibale awo mu pyaka pizinji. Kumbukani kuti abale khumi a Zuze akhaipirwa kakamwe na iye, pontho thangwi ya pyenepi iwo ancita pinthu pyakuipa. (Gen. 37:2-8, 25-28) Mbwenye Zuze nee aabwezera pyakuipa. Mu ndzidzi wakuti Zuze mbadakwanisa kuabwezera pyakuipa, iye aabvera ntsisi. Zuze nee akoya pinthu pyakuipa muntima. M’mbuto mwace, iye acita pinthu mwakubverana na uphungu udalembwa pa Levitiko 19:18. (Gen. 50:19-21) Akristu akuti asafuna kukomeresa Mulungu asafunika kutowezera Zuze wakuti alekerera abale ace m’mbuto mwa kuabwezera pyakuipa. Yezu alonga kuti tisafunika kulekerera ale anatidawira. (Mat. 6:9, 12) Munjira ibodzi ene, mpostolo Paulu apereka uphungu uyu kuna Akristu andzace: “Abale anga, lekani kubwezera pyakuipa pinacitirwa imwe.”​—Aroma 12:19. w21.12 tsa. 11-12 ¶13-14

Namasiku a ntsiku 14 ya Nisane, caka 33, Yezu aenda m’munda wa Getsemani. Pidafika iye kweneko, iye alonga pyonsene pikhali muntima mwace kuna Yahova. (Luka 22:39-44) Pa ndzidzi unoyu wakunentsa, Yezu “acita maphembero akudembetera mwakugaluza, mbagwisa misozi.” (Aheb. 5:7) Kodi Yezu alonganji mu phembero pa ntsiku ineyi mbadzati kufa? Iye aphemba Yahova toera ampase mphambvu kuti apitirize kukhala wakukhulupirika kuna iye na kucita cifuno Cace. Yahova abvesera phembero yakudembetera ya Mwanace, pontho atuma anju toera amuwangise. Yezu akhadziwambo kuti ndi pyakufunika kakamwe kuna iye kupitiriza kukhala wakukhulupirika mbatsidzikiza dzina ya Babace. Yahova abvesera maphembero a Yezu. Thangwi yanji? Yezu akhafuna kakamwe kupitiriza kukhala wakukhulupirika kuna Babace na kutsidzikiza dzina ya Babace. Khala cifuno cathu ndi kucita pibodzi pyene Yahova anatawira maphembero athu.​—Mas. 145:18. w22.01 tsa. 18 ¶15-17

Anthu azinji lero asakhonda mphangwa zathu thangwi ife nee tisacita khundu mu pinthu pya ndale. Iwo asafuna kuti ife tiendembo kavotari. Mbwenye ife tisadziwa kuti tingasankhula munthu toera akhale ntongi wathu, mu ndzidzi ubodzi ene tiri kukhonda Yahova. (1 Sam. 8:4-7) Anthu asanyerezerambo kuti ife mbatidamanga maxikola, maxipitari na kucita mabasa anango akuti mbadaphedza anthu pacisa. Iwo asakhonda mphangwa zathu thangwi ife tisaphatisira mphambvu zathu toera kumwaza mphangwa m’mbuto mwakuyesera kumalisa nyatwa za dziko. Ninji cinafuna kutiphedza toera tikhonde kuluza cikhulupiro cathu? (Mat. 7:21-23) Ife tisafunika kuikha manyerezero athu m’basa idatipasa Yezu toera kucita. Ife nee tisafunika kubvunga ndzidzi wathu toera kuyesera kumalisa nyatwa za dziko ino. Ife tisafuna anthu, pontho tisatsalakana nyatwa zawo, mbwenye ife tisadziwa kuti njira yadidi toera kuaphedza ndi kuapfundzisa pya Umambo wa Mulungu na kuaphedza toera akhale na uxamwali wakuwanga na Yahova. w21.05 tsa. 7 ¶19-20

Maseze mautongi mazinji a madzindza lero asalonga kuti asatumikira Mulungu, iwo nee asafuna kusiya pidzo pyawo. Ninga pikhacita mautongi a mu ndzidzi wa Yezu, mautongi lero asaida Nyakudzodzwa a Yahova mukutcinga atowereri ace akukhulupirika. (Mabasa 4:25-28) Kodi Yahova asacitanji? Lemba ya Masalmo 2:10-12 isatawira: “Cincino imwe amambo, citani pinthu mwandzeru; imwe anyakutonga miseru a pa dziko yapantsi, tawirani kusandikwa. Gopani Yahova mbamuntumikira, pontho n’gopeni mwakutsandzaya. Lemedzani mwana toera Mulungu akhonde kuipirwa, pontho toera mukhonde kufa, thangwi Iye nkhabe nentsa kuipirwa. Anyakutsandzaya ndi onsene ale anathawira kuna Iye.” Mafala anewa asapangiza kuti Yahova ndi wakukoma ntima, pontho asapasa mwai anthu anewa toera acite cisankhulo cadidi. Natenepa iwo aciri na ndzidzi toera kucita macinjo mbatawira Umambo wa Yahova. (Iza. 61:2) Nakuti ndzidzi uli kumala anthu asafunika kucita pinthu mwakucimbiza toera kudziwa undimomwene mbatumikira Yahova. w21.09 tsa. 15-16 ¶8-9

Paulu alonga kuti ife tisafunika kukomerwa na pinthu piri na ife, mwakukhonda tsalakana khala ndi pyakucepa peno ndi pizinji. (Afil. 4:12) Cinthu cakufunika kakamwe kuna ife ndi uxamwali wathu na Mulungu, tayu pinthu pyakumanungo piri na ife. (Abha. 3:17, 18) Onani pidalonga Mose kuna Aizraeli pidamala iwo pyaka 40 n’thando: ‘Yahova Mulungu wanu asakupasani nkhombo mu pinthu pyonsene pinacita imwe. Yahova Mulungu wanu akhali na imwe mu pyaka 40, pontho nkhabe cinthu cidasowa imwe.’ (Dheu. 2:7) Mu pyaka pyenepi pyakukwana 40, Yahova apasa Aizraeli cakudya cikhacemerwa mana. Nguwo zawo zidabuluka na iwo ku Ejitu nee zasakala. (Dheu. 8:3, 4) Yahova anakomerwa kakamwe tingaona pinthu piri na ife kukhala pyakukwana. Iye asafuna kuti tipereke takhuta ngakhale thangwi ya pinthu pyakucepa pinatipasa iye, pontho tisafunika kubvesesa kuti pinthu pyenepi ndi muoni unabuluka kuna iye. w22.01 tsa. 5 ¶10-11

Amuna akumanga banja, imwe muli na basa yakutsalakana banja yanu, natenepa musaphata basa mwakuwanga toera kutsidzikiza na kutsalakana banja yanu. Mungathimbana na nyatwa, panango munanyerezera kuti imwe muli na mphambvu toera kumalisa nyatwa zenezi mwekhene. Mbwenye lekani kunyindira mphambvu zanu. M’mbuto mwace, citani phembero panu mwekha toera Yahova akuphedzeni. Kusiyapo pyenepi, citani phembero pabodzi na nkazanu. Sakani citsogolero ca Yahova mukupfundza Bhibhlya na mabukhu anabuluswa na gulu yace, pontho phatisirani uphungu unagumanika mwenemo. Anango panango nee anaphedzera pisankhulo pinacita imwe pyakuti pisabverana na midida ya Bhibhlya. Kusiyapo pyenepi, panango iwo analonga kuti kukhala na kobiri na pinthu pyakumanungo kunakwanisa kutsidzikiza kakamwe banja yanu. Mbwenye kumbukani citsandzo ca Mambo Yosafate. (2 Kro. 20:1-30) Iye anyindira Yahova, pontho apangiza pyenepi kubulukira mu pinthu pikhacita iye. Yahova nee asiya mamuna unoyu wakukhulupirika, pontho iye nee anakusiyanimbo.​—Mas. 37:28; Aheb. 13:5. w21.11 tsa. 15-16 ¶6, 8

Mulungu aticita munjira yakuti tinakwanisa kupangiza makhaliro ace, natenepa tisafuna kakamwe kuona anthu mbakatsalakanwa mwadidi. (Gen. 1:26) Nakuti ndife akusowa ungwiro, midzidzi inango nee tinakwanisa kutonga munjira yadidi ngakhale tisanyerezera kuti tisadziwa pyonsene pidacitika. Mwacitsandzo, kumbukani kuti Yona akhadaipirwa maningi thangwi Yahova abvera ntsisi Aninive. (Yona 3:10–4:1) Mbwenye onani pidacitika pidaabvera Yahova ntsisi. Anthu a ku Ninive adatcunyuka akupiringana 120.000 apulumuswa. Pakumalisa pyaoneka kuti ndi Yona akhadaphonyeka, tayu Yahova. Yahova nee asafunika kupanga anthu mathangwi a pisankhulo pyonsene pinacita iye. Mwandimomwene, Yahova atawirisa atumiki ace a mu ndzidzi wakale kulonga maonero awo thangwi ya pisankhulo pidacita iye peno pikhafuna iye kucita. (Gen. 18:25; Yona 4:2, 3) Pontho midzidzi inango iye afokotoza mathangwi a cisankhulo cace. (Yona 4:10, 11) Ngakhale tenepo, Yahova nee asafunika kutawiriswa mbadzati peno pakumala kucita pinthu.​—Iza. 40:13, 14; 55:9. w22.02 tsa. 3-4 ¶5-6

Ife tinakwanisa kukhala ninga “mwanang’ono” tingaona anango ninga ‘akulu kakamwe kupiringana ife.’ (Afil. 2:3) Tingawangisira kucita pyenepi, tinacalira kugwegwedusa anango. Ife tisafunika kudziwa kuti abale na alongo athu ndi akulu kupiringana ife mu pinthu pinango. Ife tinakwanisa kubvesesa pyenepi tingayang’ana makhaliro awo adidi. Natenepa ife tisafunika kubvera uphungu udapereka mpostolo Paulu kuna Akorinto: “Mbani adakucitisa kukhala wakusiyana na anango? Mwandimomwene, ninji ciri na iwe cakuti nee wacita kucipaswa? Mphapo khala wacita kucipaswa, thangwi yanji usagaya ninga nee wacita kucipaswa?” (1 Akor. 4:7) Na thangwi ineyi ife tisafunika kucalira kuona kuti ndife akufunika kakamwe kupiringana anango. Mwacitsandzo, abale akuti asacita mwadidi kakamwe nkhani zawo peno alongo akuti asatomesa mapfundziro a Bhibhlya mazinji asafunika kupasa mbiri Yahova thangwi ya pinthu pyenepi pinacita iwo. w21.06 tsa. 21-22 ¶9-10

Amwazi mphangwa azinji asanentseka kakamwe toera kugumana anthu m’manyumba mwawo. Abale na alongo asakhala m’mbuto zakuti nyumba zizinji zisaonerwa na magwardha akuti nee asatawirisa munthu toera kupita mu nyumba zenezi mwakukhonda tawiriswa na mwanaciro. Amwazi mphangwa anango nee asagumana anthu azinji m’manyumba peno asamwaza mphangwa mupisa pyakuti piri na anthu akucepa. Amwazi mphangwa anango asafamba nsindzo wakulapha kakamwe toera kugumana nyumba, mbwenye angafika panyumba ineyi panango nee asagumana munthu. Khala ife tisathimbana na pinentso pyenepi mucisa cathu, nee tisafunika kubwerera nduli. Yeserani kumwaza mphangwa m’midzidzi yakusiyana. Ife tinakwanisa kugumana anthu azinji tingamwaza mphangwa mu ndzidzi unagumanika iwo panyumba. Ngakhale kuti anthu nee asagumanika m’manyumba mwawo mu ndzidzi uzinji, iwo anakwanisa kubwerera m’manyumba mwawo m’midzidzi yakusiyana. Natenepa, abale na alongo azinji asamwaza mphangwa namasikati peno namasiku thangwi asagumana anthu azinji. Kusiyapo pyenepi, anaciro nyumba panango anakhala akusudzuka kakamwe toera kucedza m’midzidzi ineyi. w21.05 tsa. 15 ¶5, 7

Kodi pyenepi pisacitikambo lero? Inde. Anthu azinji asaipirwa na Mboni za Yahova thangwi nee zisacita khundu m’maphwando awo a ntsiku yakubalwa na Khisimisi. Kusiyapo pyenepi, anthu anango asaipirwa na Mboni za Yahova thangwi izo nee zisacita khundu m’maphwando a dziko na misambo inango yakuikha anyakufa yakuti nee isabverana na pinalonga Bhibhlya. Ale anaipirwa na Mboni za Yahova thangwi ya pyenepi asanyerezera kuti akulambira Mulungu munjira yakutawirika. Mbwenye iwo nee anakwanisa kukomeresa Mulungu angapitiriza na misambo ineyi ya dziko yakuti nee isabverana na pinapfundzisa Bhibhlya. (Marko 7:8, 9) Ninji cinafuna kutiphedza toera tikhonde kuluza cikhulupiro cathu? Ife tisafunika kufuna kakamwe mitemo ya Yahova na midida yace. (Mas. 119:97, 113, 163-165) Tingafuna Yahova, ife tinacalira misambo yonsene inaida iye. Pontho nee tinatawirisa kuti cinthu cinango cikhale cakufunika kakamwe kuna ife kupiringana kufuna kwathu Yahova. w21.05 tsa. 6 ¶15-16

Tinaphatisira tani uphungu wa mpostolo Paulu? Ife tisafunika kuwangisa cikhulupiro cathu mukupfundza Mafala a Mulungu ntsiku zonsene, kucita phembero ndzidzi onsene na kupitiriza kucita mabasa anapaswa ife na Yahova. (2 Tim. 4:4) Tingakhala na cikhulupiro cakuwanga, ife nee tinadzudzumika tingabva mphangwa zauthambi zinalonga pya Mboni za Yahova. (Iza. 28:16) Tingafuna Yahova, Mafalace na abale na alongo athu pinatiphedza toera tikhonde kupeuswa na ale adasiya undimomwene. Mu ndzidzi wa apostolo, anthu azinji agwegweduka mbasiya kutowera Yezu. Ngakhale tenepo, anango azinji antowera. Anthu anewa asaphataniza m’bodzi wakuti akhacita khundu mu Thando Ikulu Yakutongera Miseru ya Ayuda na “mwinji ukulu wa anyantsembe.” (Mabasa 6:7; Mat. 27:57-60; Marko 15:43) Munjira ibodzi ene, anthu azinji kakamwe lero nee asasiya kutowera Yezu. Thangwi yanji? Thangwi iwo asadziwa undimomwene unagumanika m’Bhibhlya, pontho asakomerwa na undimomwene unoyu. Bhibhlya isalonga: “Ale anafuna mwambo wanu asakhala na ntendere uzinji kakamwe; nkhabe cinthu cinafuna kuagwegwedusa.”​—Mas. 119:165. w21.05 tsa. 13 ¶20-21

Mpostolo Paulu akhadziwa kuti akwanisa kucita pinthu pyonsene na ciphedzo ca Yahova, tayu na mphambvu zace. Mukuphatisira nzimu wace wakucena, Yahova apasa mphambvu Paulu toera kucita mwakukwana utumiki wace. Mwakukhonda tsalakana kutcingwa, kuikhwa nkaidi na pinentso pinango. Timoti wakuti akhaphata basa pabodzi na Paulu, akhanyindirambo kakamwe ciphedzo ca Yahova toera kucita mwakukwana utumiki wace. Timoti aperekera Paulu m’maulendo mazinji aumisionaryo. Kusiyapo pyenepi, Paulu akhatumambo Timoti toera kacedzera mipingo. (1 Akor. 4:17) Panango Timoti akhala na mabvero akuti nee mbadakwanisa kucita basa ineyi. Panango ndi thangwi ineyi idacitisa Paulu kumpanga kuti: “Nee munthu m’bodzi asafunika kukupwaza thangwi yakukhala kwako m’phale.” (1 Tim. 4:12) Kusiyapo pyenepi, Timoti akhathimbanambo na nyatwa mu ndzidzi unoyu. Iye ‘akhaduwala kazinji kene.’ (1 Tim. 5:23) Mbwenye Timoti akhadziwa kuti nzimu wakucena wa Yahova mbudampasa mphambvu toera kumwaza mphangwa  zadidi na kutumikira abale ace.​—2 Tim. 1:7. w21.05 tsa. 21 ¶6-7

Mafala anagumanika pa Tiyago 1:19 asaphatambo basa kuna ale anapereka uphungu. Tiyago alemba: “Munthu asafunika kukhala wakucimbiza kubva, wakudembuka kulonga, wakudembuka kuipirwa.” Nkulu wa mpingo panango ananyerezera kuti asadziwa pinentso pyonsene pinathimbana na m’bale peno mulongo. Mbwenye iye asapidziwadi? Misangani 18:13 isalonga: “Kutawira mbudzati kubvesesa undimomwene wa pinthu, ndi udzemwa, pontho kusapasa manyadzo.” Mphyadidi kakamwe kubvundza munthu toera alonge ekhene pinthu pidacitika. Natenepa, nkulu wa mpingo asafunika kubvesera mbadzati kulonga. Nkulu wa mpingo panango asafunika kubvundza: “Ninji pinakunentsani?” “Ndinacitanji toera kukuphedzani?” Akulu a mpingo angasaka ndzidzi toera kudziwa pinthu pinacitikira abale na alongo awo, iwo anakhala akukhunganyika toera kuaphedza na kuawangisa. Kupasa uphungu wadidi pisaphataniza pizinji kupiringana basi ene kuleri malemba a m’Bhibhlya na kupereka maonero. Abale na alongo athu asafuna kupibva kuti tisaatsalakana, tisabvesesa mabvero awo, pontho tisafuna kuaphedza. w22.02 tsa. 17 ¶14-15