Ninga Mudazilembera Mateu 3:1-17
3 Mu ntsiku zenezi, abwera Juwau+ Mʼbatizi mbatoma kumwaza mphangwa+ nʼthando ya Yudeya,
2 mbalonga: “Tcunyukani, thangwi Umambo wakudzulu uli cifupi.”+
3 Mwandimomwene, unoyu ndi ule adalongwa na mprofeta Izaiya+ mʼmafala awa: “Munthu ali kukhuwa nʼthando: ‘Sasanyirani njira ya Yahova!* Lungamisani miseu yace.’”+
4 Juwau akhabvala nguwo zakucitwa na maweya a kamelo mbamanga sintu* ya nthembe ncunu mwace.+ Cakudya cace cikhali nthete na uci.*+
5 Penepo, anthu a ku Yerusalemu, ku Yudeya onsene na a mupisa pyonsene pya cifupi na Nkulo wa Yordani akhaenda kuna Juwau,+
6 mbabatizwa* na iye mu Nkulo wa Yordani,+ pontho iwo akhabweka pakweca madawo awo.
7 Mbwenye pidaona iye kuti Afarisi azinji na Asadhuki+ akhabwera toera kubatizwa, iye aapanga: “Imwe ana a nyoka,+ mbani adakupangani kuti munakwanisa kuthawa ntsiku ya ukali wa Mulungu?+
8 Mphapo, citani pinthu pinapangiza kutcunyuka kwanu.
9 Lekani kunyengezeka mbamulonga: ‘Babathu ndi Abhrahamu.’+ Thangwi ine ndinakupangani kuti Mulungu angafuna, anakwanisa kuphatisira miyala iyi toera kucitira Abhrahamu ana.
10 Onani! Macado ali pa tsinde ya muti. Natenepa, miti yonsene inakhonda kubala misapo yadidi inagwandwa mbiponywa pa moto.+
11 Ine ndisakubatizani na madzi thangwi yakutcunyuka kwanu,+ mbwenye ule anabwera nduli mwanga ndi wamphambvu kakamwe kupiringana ine, wakuti masandalya ace ine sidathema tayu toera kuadula.+ Iye anadzakubatizani na nzimu wakucena,+ pontho na moto.+
12 Iye ali na foxolo mʼmanja mwace toera kucenesa mwadidi mbuwa yace. Iye anadzakoya tirigu ncikwa mwace, mbwenye mapwepwa anadzaapisa na moto+ wakuti nkhabe kuthimisika.”
13 Penepo Yezu abuluka ku Galileya mbaenda ku Yordani toera kubatizwa na Juwau.+
14 Mbwenye Juwau ayesera kumpingiza, mbalonga: “Ine ndisafunika kubatizwa na imwe, mphapo thangwi yanji imwe mwabwera kuna ine?”
15 Yezu antawira: “Leka kundipingiza, thangwi mphyakuthema kuti picitike tenepo mwakubverana na pyonsene pinafuna Mulungu.” Penepo iye nee ampingizabve.
16 Pidamala iye kubatizwa, mwakucimbiza Yezu alimira mʼmadzi, penepo kudzulu kwafunguka,+ Juwau aona nzimu wa Mulungu ukhatcita ninga nkhangaiwa mbudza kuna Yezu.+
17 Pontho kwabvekambo fala idabuluka kudzulu+ mbilonga: “Uyu ndi Mwananga+ wakufunika, anakomerwa na ine.”+
Pidzindikiro Pyapantsi
^ Onani Apendise A5.
^ Peno: “bhande.”
^ Fala na Fala: “uci wa ntsanga.”
^ Peno: “mbabizwa manungo onsene.”
