Dhanyeli 2:1-49
-
Mambo Nabhukodhonozore adzudzumika na ndoto idalota iye (1-4)
-
Nkhabepo adakwanisa kumpanga mabvekero a ndoto idalota iye (5-13)
-
Dhanyeli asaka ciphedzo ca Mulungu (14-18)
-
Kusimba Mulungu thangwi yakupangiza pinthu pyakubisika (19-23)
-
Dhanyeli apanga mambo mabvekero a ndoto (24-35)
-
Mabvekero a ndoto (36-45)
-
Mwala wa Umambo unadzanyedza dzimunthu (44, 45)
-
-
Dhanyeli alemedzwa na mambo (46-49)
2 Mu caka caciwiri ca utongi wace, Nabhukodhonozore akhala na ndoto zizinji. Iye akhadzudzumika kakamwe+ kwakuti nee akhakwanisa kugona.
2 Natenepa mambo acemeresa anyantsembe anacita pyakulotera, anyakucita pya masalapita, anyakucita pyaungʼanga na Akaldheya* toera abwere kudzafokotozera mambo ndoto zace. Natenepa iwo abwera mbalimira patsogolo pa mambo.+
3 Buluka penepo mambo aapanga: “Ine ndalota, pontho ndiri wakudzudzumika kakamwe toera kudziwa pidalota ine.”
4 Akaldheya atawira mambo mu cilongero ca Ciaramaki:*+ “Imwe mambo, khalani na umaso kwenda na kwenda. Tipangeni ife atumiki anu ndoto yanu, pontho tinakufokotozerani mabvekero ace.”
5 Mambo atawira Akaldheya: “Awa ndi mafala anga akumalisa: Imwe mungacimwana kundipanga ndoto yanga, pontho mungacimwana kundifokotozera mabvekero ace, munadzagwandwa-gwandwa, pontho nyumba zanu zinadzakhala pimbuzi pya anthu onsene.*
6 Mbwenye mungandipanga ndoto yanga na mabvekero ace, ndinadzakupasani miyoni mizinji na cilemedzo cikulu.+ Natenepa ndipangeni ndoto na mabvekero ace.”
7 Paulendo waciwiri iwo atawira: “Mambo tipangeni ife atumiki anu ndoto yanu, buluka penepo tinakufokotozerani mabvekero ace.”
8 Mambo aapanga: “Ine ndisadziwa kuti imwe musadembuka kutawira thangwi musafuna ndzidzi uzinji toera kunyerezera, thangwi imwe musadziwa mafala akumalisa adalonga ine.
9 Mungakhonda kundipanga ndoto, pana cinthu cinafuna kukucitikirani, imwe monsene munadzatcunyuswa munjira ibodzi ene. Mbwenye imwe mwabverana toera kundipanga uthambi na kundinyengeza, mbamudikhira kuti ndinacinja manyerezero anga. Natenepa ndipangeni ndoto toera ine ndikwanise kukhala na cinyindiro cakuti imwe munakwanisa kufokotoza mabvekero ace.”
10 Akaldheya atawira mambo: “Nkhabepo munthu pa dziko yapantsi wakuti anakwanisa kucita pinaphemba imwe mambo, thangwi nkhabepo mambo wankulu peno ntongi adaphemba kale pinthu ninga pyenepi kuna nyantsembe wakulotera, nyakucita masalapita peno Nkaldheya.
11 Mambo pinaphemba imwe mphyakunentsa, nkhabepo munthu pa dziko yapantsi wakuti anakwanisa kukupangani kusiyapo alungu.”
12 Natenepa mambo aipirwa kakamwe mbapereka ntemo toera kupha anthu onsene audziwisi a mu Bhabhilonya.+
13 Pidakhazikiswa ntemo unoyu, pontho amuna audziwisi pikhafuna iwo kuphiwa, iwo asakambo Dhanyeli na andzace toera kuapha.
14 Pa ndzidzi unoyu, Dhanyeli aphatisira ndzeru na luso toera kulonga na Ariyoki nkulu wa anyankhondo anaonera mambo, wakuti akhadabuluka toera kuenda kapha amuna audziwisi a ku Bhabhilonya.
15 Iye abvundza Ariyoki nkulu wa anyankhondo a mambo: “Thangwi yanji mambo akhazikisa ntemo wakunentsa kakamwe?” Buluka penepo, Ariyoki apanga pyenepi Dhanyeli.+
16 Natenepa Dhanyeli aenda kuna mambo mbaphemba ndzidzi toera afokotoze ndoto ya mambo.
17 Buluka penepo, Dhanyeli aenda kunyumba mbapanga andzace, Ananiya, Mizaeli na Azariya pinthu pidacitika.
18 Iye aphemba andzace kuti acite phembero kuna Mulungu wakudzulu toera aabvere ntsisi thangwi ya cibisobiso ceneci toera Dhanyeli na andzace akhonde kufudzwa pabodzi na amuna anango audziwisi a ku Bhabhilonya.
19 Mʼmasomphenya,+ Dhanyeli apangizwa mabvekero a cibisobiso ceneci. Na thangwi ineyi, Dhanyeli asimba Mulungu wakudzulu.
20 Dhanyeli alonga:
“Dzina ya Mulungu mbisimbwe kwenda na kwenda,Thangwi ndiye basi ali na udziwisi na mphambvu.+
21 Iye asacinja midzidzi,+Asabulusa amambo mbakhazikisa amambo,+Iye asapasa ndzeru kuna anyandzeru, pontho asapasa udziwisi kuna ale ali na luso yakubvesesa pinthu.+
22 Iye asafokotoza pinthu pyakunentsa kakamwe, pontho asapangiza pinthu pyakubisika,+Iye asadziwa pinthu piri pa cidima,+Pontho iye ali na ceza.+
23 Ine ndisapereka takhuta, pontho ndisakusimbani imwe Mulungu wa ambuyanga,Thangwi mwandipasa udziwisi na mphambvu.
Pontho imwe mwandicitisa kudziwa phembo idacita ife;Imwe mwatipanga pinthu pikhadzudzumisa mambo.”+
24 Buluka penepo, Dhanyeli asaka Ariyoki, ule adakhazikiswa na mambo toera kupha amuna audziwisi a ku Bhabhilonya+ mbampanga: “Lekani kupha nee mamuna mʼbodzi waudziwisi wa ku Bhabhilonya. Ndiendeseni kuna mambo, pontho ine ndinadzanfokotozera mabvekero a ndoto yace.”
25 Mwakucimbiza, Ariyoki akwata Dhanyeli mbaenda naye kuna mambo mbampanga: “Ndagumana mamuna uyu pakati pa amuna adakwatwa ninga mabitcu ku Yuda+ wakuti anakwanisa kufokotoza ndoto yanu mambo.”
26 Mambo abvundza Dhanyeli, ule akhadapaswa dzina yakuti Bheltisezari:+ “Kodi iwe unakwanisadi kundipanga ndoto idalota ine mbufokotoza mabvekero ace?”+
27 Dhanyeli atawira mambo: “Anyaudziwisi, anyakucita masalapita, anyantsembe akulotera peno anyakudziwisa pya nyenyezi, nkhabe kwanisa kukupangani mambo cibisobiso cinafuna imwe kudziwa.+
28 Mbwenye kudzulu kuna Mulungu wakuti ndi Nyakufokotoza pinthu pyacibisobiso,+ pontho iye apangiza Mambo Nabhukodhonozore pinthu pinafuna kucitika kunkhomo kwa ntsiku zakumalisa. Ndoto yanu ndi iyi, pontho masomphenya adaona imwe mu ndzidzi ukhali imwe patalimba panu ndi awa:
29 “Imwe mambo pikhali imwe patalimba panu mukhanyerezera pinafuna kudzacitika ntsogolo, pontho ule wakuti ndi Nyakufokotoza pyacibisobiso akupangani pinafuna kudzacitika.
30 Ine ndapangwa cibisobiso ceneci, tayu thangwi ndiri na udziwisi kakamwe kupiringana anthu anango, mbwenye ndi toera kufokotoza mabvekero a ndoto ya mambo, toera mukwanise kudziwa pinanyerezera imwe muntima mwanu.+
31 “Imwe mambo, mu ndoto yanu mwaona dzimunthu ikulu kakamwe. Dzimunthu ineyi yakuti ikhali ikulu kakamwe, pontho yakuyetimira kakamwe ikhali patsogolo panu, pontho maonekero ace akhali akugopesa.
32 Nsolo wa dzimunthu ineyi ukhali wa ouro yadidi,+ diti yace na mikono yace ikhali ya parata,+ mimba yace na ntcafu zace zikhali za nkuwa,+
33 miyendo yace ikhali ya utale,+ pontho khundu ibodzi ya manyalo ace ikhali ya utale,* khundu inango ikhali ya dongo.*+
34 Pikhapitiriza imwe kuyangʼana, mwala wagwandwa paphiri, tayu na manja a anthu, mbugwera miyendo ya dzimunthu yakuti ikhali ya utale na dongo mbinyedzeka.+
35 Penepo utale, dongo, nkuwa, parata na ouro pyanyedzeka pabodzi pene mbapikhala ninga mapwepwa a pa mbuto inabubudira anthu pinthu mu ndzidzi wa malimwe; ipyo pyamburuswa na mphepo manyedzwa ace mbakhonda kuoneka pontho. Natenepa mwala udamenya dzimunthu wadzakhala phiri ikulu mbiphimbira dziko yonsene yapantsi.
36 “Pidalota imwe ndi pyenepi, mbwenye cincino tinakupangani mabvekero ace.
37 Imwe mambo, mambo wa amambo wakuti Mulungu wakudzulu akupasani umambo,+ utongi, mphambvu na mbiri,
38 wakuti apereka mʼmanja mwanu anthu onsene mwakukhonda tsalakana kunakhala iwo, pontho akupasani pinyama pya ntsanga na mbalame zakudzulu, mbakukhazikisani ninga ntongi wa pyenepi pyonsene,+ inde, imwe ndimwe nsolo wa ouro.+
39 “Umambo wanu ungamala panadzaoneka umambo unango+ ungʼono kupiringana wanu; buluka penepo padzaoneka umambo unango wacitatu wa nkuwa wakuti unadzatonga pa dziko yonsene yapantsi.+
40 “Mbwenye umambo wacinai unadzakhala wakuwanga ninga utale.+ Ninga utale wakuti usanyedza mbupeya, ninga utale wakuti usagwanda-gwanda, iwo unadzanyedza mbugwanda-gwanda makhundu a maumambo anewa onsene.+
41 “Ninga pidaona imwe, miyendo na pyala pya mʼmiyendo, khundu inango pikhali pya dongo, pontho khundu inango pikhali pya utale, umambo unoyu unadzagawikambo munjira ibodzi ene, mbwenye khundu inango ya umambo unoyu inadzakhala yakuwanga ninga utale ninga pikhadaona imwe kuti utale ukhadabvungazwa na dongo iwisi.
42 Nakuti khundu ibodzi ya pyala pya mʼmiyendo pikhali pya utale, pontho khundu inango pikhali pya dongo, natenepa khundu ibodzi ya umambo unoyu inadzakhala yakuwanga, khundu inango inadzakhala yakufewa.
43 Ninga pidaona imwe utale wakubvungazwa na dongo iwisi, makhundu a umambo unoyu anadzabvungazwa na mbumba,* mbwenye makhundu anewa nee anadzaphatana, ninga utale nkhabe phatana na dongo.
44 “Mu ntsiku za amambo anewa, Mulungu wakudzulu anadzakhazikisa umambo+ wakuti nkhabe kudzafudzwa.+ Pontho umambo unoyu nee unadzaperekwa kuna mbumba inango.+ Iwo unadzanyedza, mbufudza maumambo anewa onsene,+ pontho iwo basi unadzakhala kwenda na kwenda,+
45 ninga pidaona imwe kuti mwala wagwandwa paphiri, tayu na manja a anthu, pontho iwo wanyedza utale, nkuwa, dongo, parata na ouro,+ Mulungu Wankulu akudziwisani imwe mambo pinafuna kucitika ntsogolo.+ Ndoto idalota imwe ndi yandimomwene, pontho mabvekero ayo ndi akunyindirika.”
46 Penepo Mambo Nabhukodhonozore akotamisa nkhope yace mpaka pantsi mbalemedza Dhanyeli. Pontho iye apereka ntemo toera Dhanyeli apaswe muoni na insenso.
47 Mambo apanga Dhanyeli: “Mwandimomwene Mulungu wanu ndi Mulungu wa alungu, Mbuya wa amambo, pontho iye ndi Nyakufokotoza wa pinthu pyacibisobiso thangwi iwe wakwanisa kundipanga cibisobiso ceneci.”+
48 Natenepa mambo apasa cidzo Dhanyeli, mbampasa miyoni mizinji yadidi, pontho iye anʼkhazikisa ninga ntongi wa provinsya yonsene ya Bhabhilonya.+ Iye akhazikiswambo toera atsogolere amuna onsene audziwisi a ku Bhabhilonya.
49 Mwakubverana na phembo idacita Dhanyeli, mambo akhazikisa Sadhrake, Mezaki na Abhedhinego+ ninga atsogoleri a provinsya ya Bhabhilonya, mbwenye Dhanyeli akhatumikira panyumba ya mambo.
Pidzindikiro Pyapantsi
^ Unoyu ndi nsoka wa anthu wakuti usapangizika ninga usadziwa kakamwe pyakulotera na pya nyenyezi.
^ Dhanyeli 2:4b mpaka 7:28 pakutoma alembwa Muciaramaki.
^ Munjira inango: “khuku; nyambvu.”
^ Peno: “fero.”
^ Peno: “dongo yakumunywa.”
^ Peno: “ana a anthu.” Pyenepi pisabveka anthu ene pyawo.
