Amambo Waciwiri 3:1-27
3 Yeoramu+ mwana wa Akabu adzakhala mambo wa Izraeli ku Samariya mu caka 18 ca Mambo Yosafate wa ku Yuda, pontho iye atonga mu pyaka 12.
2 Iye akhacita pinthu pyakuipa pamaso pa Yahova, mbwenye nee akhadapiringana babace peno mai wace, thangwi iye abulusa muti wakulambirwa wa Bhaale udasasanya babace.+
3 Mbwenye iye apitiriza kucita madawo mabodzi ene ninga adacita Yerobhoamu mwana wa Nebhati mbacitisa Aizraeli kudawa nawo.+ Iye nee asiya kucita madawo anewa.
4 Mesa mambo wa ku Moabhe akhafuya mabira, pontho iye akhakwata anamabira 100.000 na mabira acimuna akukhonda kukwedzwa maweya akukwana 100.000 mbaapereka ninga nsonkho kuna mambo wa Izraeli.
5 Akabu pidafa iye,+ mwakukhonda dembuka mambo wa ku Moabhe asandukira mambo wa Izraeli.+
6 Mu ndzidzi unoyu, Mambo Yeoramu abuluka ku Samariya, mbacemeresa anyankhondo onsene a Izraeli.
7 Iye atumizambo mphangwa izi kuna Yosafate Mambo wa ku Yuda: “Mambo wa ku Moabhe andisandukira. Munaenda pabodzi na ine kamenyana na Moabhe?” Iye atawira: “Ndinaenda.+ Imwe na ine ndife m’bodzi. Mbumba yanu na mbumba yanga ndi ibodzi ene, pontho makavalo anu na anga ndi mabodzi ene.”+
8 Buluka penepo iye abvundza: “Tinaenda na njira ipi?” Yeoramu atawira: “Tinaenda na njira ya kuthando ya Edhomi.”
9 Mambo wa Izraeli, mambo wa Yuda na mambo wa ku Edhomi,+ atoma ulendo wawo. Pidamala iwo ntsiku zinomwe mbakafamba, iwo nee akhalibve na madzi toera anyankhondo na pinyama pikhali na iwo amwe.
10 Mambo wa Izraeli alonga: “Dzedze kuna ife! Yahova agumanya ife amambo atatu, basi ene toera kutipereka m’manja mwa Moabhe!”
11 Penepo Yosafate abvundza: “Kuno nkhabeko mprofeta wa Yahova wakuti tinakwanisa kubvundzisa Yahova kubulukira kuna iye?”+ Natenepa, m’bodzi wa atumiki a mambo wa Izraeli atawira: “Alipo Elizeu+ mwana wa Safati wakuti akhathiriza madzi Eliya toera asambe manja.”*+
12 Buluka penepo Yosafate alonga: “Mafala a Yahova ali na iye.” Na thangwi ineyi, mambo wa Izraeli, Yosafate na mambo wa ku Edhomi aenda kuna iye.
13 Elizeu abvundza mambo wa Izraeli: “Thangwi yanji mwabwera kuna ine?*+ Ndokoni kabvundzisa aprofeta a pai wanu na aprofeta a mai wanu.”+ Mbwenye mambo wa Izraeli atawira: “Lekani kulonga pyenepi, ndi Yahova adacemera ife amambo atatu toera atipereke m’manja mwa Moabhe.”
14 Natenepa Elizeu alonga: “Ndiri kudumbira mu dzina ya Yahova wa anyankhondo, Mulungu wa m’maso ule anatumikira ine,* kuti mambo Yosafate+ wa ku Yuda mbadakhonda kukhala pano, ine nee mbandidacita pinafuna imwe.+
15 Cincino ndibweresereni nyakuimba arpa.”*+ Nyakuimba arpa pidatoma iye kuimba, mphambvu ya Yahova yabwera kuna iye.+
16 Iye alonga: “Yahova alonga tenepa: ‘Kumbani madjenje mazinji n’gowa* ino,
17 na thangwi ineyi Yahova alonga: “Nkhabe kudzaoneka mphepo peno kubvumba kwa madzi; mbwenye gowa* ino inadzala na madzi,+ pontho imwe, pifuyo pyanu na pinyama pyanu pyakuthuka mitolo munadzamwa madzi anewa.”’
18 Mbwenye kuna Yahova pyenepi nkhabe nentsa,+ thangwi iye anadzaperekambo Moabhe m’manja mwanu.+
19 Imwe musafunika kufudza mizinda yonsene yakutsidzikizwa mwadidi+ na mizinda yonsene yakufunika kakamwe, kugwanda miti yonsene yadidi, kufikira mbuto zonsene zinabuluka madzi, pontho ponyani miyala m’minda yonsene yadidi toera ikhonde kulimwa.”+
20 Pyacitika kuti pa ndzidzi wakupereka ntsembe za pyakudya namacibese,+ madzi abuluka kukhundu ya ku Edhomi mbadzadza gowa yonsene.
21 Amoabhe onsene abva kuti amambo abwera toera kudzamenyana na iwo, na thangwi ineyi acemeresa amuna onsene akuti mbadakwanisa kuenda kunkhondo, pontho iwo apakana m’madire a dziko yawo.
22 Pidalamuka iwo namacibese, ceza ca dzuwa cikhayetimira m’madzi, pontho kukhundu ya Amoabhe, madzi akhaoneka akufuira ninga ciropa.
23 Iwo alonga: “Ndi ciropa! Mwakukhonda penula amambo aphana na masupada unango na ndzace. Natenepa imwe Amoabhe, tendeni tikatapate!”+
24 Pidapita iwo mu nsasa wa Aizraeli, Aizraeli alamuka mbatoma kupha Amoabhe. Penepo Amoabhe atoma kuthawa,+ pontho Aizraeli aathamangisa mbaenda na kuapha mpaka kupita mu dziko ya Moabhe.
25 Iwo afudza mizinda, pontho m’bodzi na m’bodzi wa iwo aponya mwala m’minda yonsene yadidi, mbaidzadza na miyala; iwo afikira mbuto zonsene zikhabuluka madzi,+ pontho agwisa miti yonsene yadidi.+ Pakumalisa, basi ene idasala ndi miyala ya mpanda wa nzinda wa Kiri-Arezeti,+ pontho anyakuponya miyala na funda azungulira nzinda unoyu mbaufudza.
26 Mambo wa ku Moabhe pidaona iye kuti ali kukundwa, akwata amuna 700 akuti akhali na masupada toera afungule njira mpaka kuna mambo wa ku Edhomi,+ mbwenye iwo nee akwanisa.
27 Natenepa iye akwata mwanace wakutoma wakuti mbadatonga ninga mambo pa mbuto yace mbampereka ninga ntsembe yakupisa+ padzulu pa mpanda. Anthu aipirwa kakamwe na Aizraeli, natenepa iwo asiya kumenyana na mambo wa ku Moabhe mbabwerera ku dziko yawo.
Pidzindikiro Pyapantsi
^ Peno: “wakuti akhali ntumiki wa Eliya.”
^ Peno: “Ndinapyonji ine.”
^ Fala na Fala: “ule wakuti ndalimira pamaso pace.”
^ Peno: “nyakuimba.”
^ Peno: “uwadhi.”
^ Peno: “uwadhi.”
