Amambo Waciwiri 19:1-37
19 Mambo Ezekiya pidabva iye pyenepi, apandula nguwo zace, abvala masakha mbapita n’nyumba ya Yahova.+
2 Buluka penepo, mambo atuma Eliyakimu wakuti akhali ntsogoleri wa anthu a panyumba ya mambo, Sebhina wakuti akhali mulembi na akulu a anyantsembe; iwo abvala masakha toera aende kuna mprofeta Izaiya+ mwana wa Amoji.
3 Iwo apanga Izaiya: “Ezekiya alonga tenepa: ‘Lero ndi ntsiku ya nyatwa, ya kusandikwa* na yakupaswa manyadzo; ndife ninga nkazi wakuti ndzidzi wace wakubala wafika, mbwenye iye nee ali na mphambvu toera kubala.+
4 Panango Yahova Mulungu wanu anabvesera mafala onsene a Rabhisake, ule adatumwa na mbuyace wakuti ndi mambo wa Asirya toera kutikana Mulungu wa m’maso,+ pontho iye anadzatcunyuswa thangwi ya mafala adabva Yahova Mulungu wanu. Natenepa, citani phembero+ thangwi ya anthu adasala mu dziko ino.’”
5 Buluka penepo atumiki a Mambo Ezekiya aenda kaonana na Izaiya.+
6 Natenepa Izaiya aapanga: “Ndokoni mukampange mbuyanu kuti: ‘Yahova alonga tenepa: “Leka kugopa+ thangwi ya mafala adabva iwe, mafala adalonga atumiki a mambo wa Asirya toera kundixola nawo.+
7 Ndinadzaikha manyerezero muna iye, iye anadzabva mphangwa mbabwerera ku dziko yace; pontho ine ndinadzacitisa kuti iye aphiwe na supada mu dziko yace.”’”+
8 Rabhisake pidabva iye kuti mambo wa Asirya abuluka ku Lakisi,+ abwerera kuna iye mban’gumana akumenyana na Libhina.+
9 Mambo abva mphangwa izi thangwi ya Tiraka, Mambo wa ku Etiopya: “Iye abwera kudzamenyana na imwe.” Natenepa iye atuma pontho anthu+ kuna Ezekiya, mbalonga:
10 “Ndokoni mukampange tenepa Ezekiya Mambo wa ku Yuda: ‘Leka tawirisa kuti Mulungu wako ananyindira iwe akunyengeze, mbalonga: “Yerusalemu nee anadzaperekwa m’manja mwa mambo wa Asirya.”+
11 Ona! Iwe wabva pidacita amambo a ku Asirya m’madziko onsene, iwo aafudza.+ Ndiwe basi anafuna kupulumuka?
12 Kodi iwo apulumuswa na alungu a madzindza adafudzwa na ambuyanga? Ali kupi Gozani, Arani,+ Rezefi na anthu a ku Edheni akuti akakhala ku Tele-Asari?
13 Ali kupi mambo wa ku Amati, mambo wa ku Arpadhi, mambo wa nzinda wa ku Sefarvaimu, wa ku Ena na wa ku Iva?’”+
14 Ezekiya akwata matsamba m’manja mwa ale adaabweresa, mbaaleri. Buluka penepo, Ezekiya aenda panyumba ya Yahova mbaafuthula* pamaso pa Yahova.+
15 Ezekiya atoma kucita phembero+ pamaso pa Yahova, mbalonga: “Yahova Mulungu wa Izraeli, imwe musakhala pa mpando waumambo padzulu* pa akerubhi,+ imwe ndimwe basi Mulungu wandimomwene pakati pa maumambo onsene a pa dziko yapantsi.+ Imwe mwacita kudzulu na dziko yapantsi.
16 Yahova bveserani mwadidi!+ Fungulani maso anu+ imwe Yahova, pontho onani! Bveserani mafala adatumiza Senakeribhe toera kuxola imwe Mulungu wa m’maso.
17 Yahova, ndimomwene kuti amambo a ku Asirya afudza anthu a madzindza anango pabodzi na madziko awo.+
18 Pontho iwo aponya alungu awo pa moto, thangwi iwo nee akhali alungu,+ mbwenye akhali pinthu pidacitwa na manja a anthu,+ matabwa na miyala. Na thangwi ineyi, iwo akwanisa kuafudza.
19 Mbwenye cincino Yahova Mulungu wathu, taphata miyendo, tipulumuseni m’manja mwace toera maumambo onsene a pa dziko yapantsi adziwe kuti imwe basi Yahova, ndimwe Mulungu.”+
20 Buluka penepo, Izaiya mwana wa Amoji atumiza mphangwa izi kuna Ezekiya: “Yahova Mulungu wa Izraeli alonga tenepa: ‘Ndabva phembero idacita iwe+ kuna ine thangwi ya Senakeribhe mambo wa Asirya.+
21 Awa ndi mafala adalonga Yahova thangwi ya iye:
“Mwali, mwana wankazi wa Sioni asakupwaza, mbakusingirira.
Mwana wankazi wa Yerusalemu asasukusa nsolo wace thangwi ya iwe.
22 Mbani adaxola iwe mbulonga naye mwakusowa cilemedzo?+
Mbani adakhuwira iwe+Mbumuyang’ana mwakudzikuza?
Ndi Wakucena wa Izraeli!+
23 Waphatisira anthu adatuma iwe+ toera kuxola Yahova+ mbulonga:‘Na ngolo zanga zizinji za nkhondoNdinakwira padzulu pa mapiri,Mbuto zakutali kakamwe za Libhano.
Ndinadzagwanda miti yace yakulapha ya sedhro, miti yace yadidi kakamwe ya junipero.
Ndinadzaenda ku mbuto zace zakubisalira zakutali kakamwe, m’misitu yace yakupata kakamwe.
24 Ndinadzakumba micera, mbandimwa madzi a dziko inango;Ndinadzaumisa mikulo* yonsene ya ku Ejitu na manyalo anga.’
25 Iwe nee wabva? Ine ndacita kale kakamwe cisankhulo ceneci.+
Ine ndakhunganya* pyenepi kutomera kale kakamwe.+
Cincino ndinapicita.+
Iwe unadzafudza mizinda yakuwanga mbikhala madembe.+
26 Anthu a mwenemu anadzakhala akusowa ciphedzo;Iwo anadzagopa mbakhala na manyadzo.
Iwo anadzakhala ninga maudzu a ntsanga na thongwe iwisi,+Ninga maudzu a pantsoi akuti asaumiswa na mphepo yakumabulukiro a dzuwa.
27 Ine ndisadziwa mwadidi ndzidzi unakhala iwe pantsi, ndzidzi unabuluka iwe, ndzidzi unapita iwe,+Na ndzidzi unakhala iwe wakuipirwa na ine,+
28 Thangwi kuipirwa kwako na ine+ na kukhuwa kwako kwafika m’makutu mwanga.+
Ndinadzaikha cimedzo canga mphuno mwako, pontho ndinadzamanga nkhambala*+ pamulomo pako,Mbandikubweza kudabuluka iwe na njira idabwera na iwe.”+
29 “‘Cidzindikiro kuna iwe* cinadzakhala ici: Caka cino munadzadya pinthu pinafuna kumera pyokha;* pontho caka caciwiri munadzadya pinafuna kumera pa mbuto ibodzi ene;+ mbwenye caka cacitatu munadzabzwala mbeu mbamubvuna, pontho munadzatceka miti ya mauva mbamudya misapo yace.+
30 Anthu a panyumba ya Yuda anafuna kudzapulumuka, ale anafuna kusala,+ anadzakhala na mitcitci pantsi ninga miti, mbabala misapo.
31 Thangwi ku Yerusalemu kunadzabuluka anthu adasalikira, pontho Kuphiri ya Sioni kunadzabuluka anthu adapulumuka. Yahova wa anyankhondo anadzacita pyenepi+ thangwi ya phinga yace.
32 “‘Yahova alonga tenepa thangwi ya mambo wa Asirya:+
“Iye nee anadzapita mu nzinda uno+Nee anadzaponyamo pswimoPeno kumenyana nawo mbaphatisira xangoPeno kucita nthunda toera kumenyana nawo.+
33 Iye anadzabwerera na njira idabwera na iye;Iye nee anadzapita mu nzinda uno,” alonga Yahova.
34 “Ine ndinadzatsidzikiza nzinda uno+ mbandiupulumusa thangwi ya ine,+Pontho thangwi ya ntumiki wanga Dhavidhi.”’”+
35 Namasiku anewa, anju wa Yahova aenda ku misasa ya Asirya,+ mbapha anyankhondo 185.000. Anthu pidalamuka iwo namacibese, agumana anthu akufa basi.+
36 Natenepa, Senakeribhe Mambo wa Asirya abuluka mbabwerera ku Ninive,+ pontho iye akhala kweneko.+
37 Senakeribhe pikhagodama iye n’nyumba* ya Nisiroki wakuti ndi mulungu wace, anace anacemerwa Adhrameleki na Sarezeri amupha na supada,+ mbathawira ku dziko ya Ararati.+ Buluka penepo, mwanace anacemerwa Esari-Adhoni+ adzakhala mambo pa mbuto yace.
Pidzindikiro Pyapantsi
^ Peno: “kutikanwa.”
^ Fala na Fala: “mbaifuthula.”
^ Munjira inango: “pakati.”
^ Peno: “mbuto zinapita na madzi a nkulo wa Nilo.”
^ Fala na Fala: “ndatonga.”
^ Nkhambala inalongwa pano ndi ire inaphatisirwa toera kutsogolera kavalo. Nkhambala ineyi isamangirwa pa cinthu cautale cinaikhwa pamulomo wa kavalo.
^ Peno: “pinafuna kukula kubulukira ku mbeu zidagwa pantsi.”
^ Unoyu ndi Ezekiya.
^ Peno: “mu templo.”
