Bafunzwe bazira ukwizera kwabo—Singapuru

FUNGURA

Ubu muri Singapuru hafungiwe abasore umunani b’Abahamya ba Yehova bazira ko umutimanama wabo utabemerera kujya mu gisirikare. Bane muri bo bafunzwe ku nshuro ya kabiri bazira ko bakomeje kwanga kujya mu gisirikare, igihe barangizaga igifungo cyabo cya mbere. Nta mategeko yo muri Singapuru yarenganura abo Bahamya, kuko leta y’icyo gihugu ihatira abantu bose kujya mu gisirikare, kandi ntiyubahirize uburenganzira abantu bafite bwo kutajya mu gisirikare bitewe n’umutimanama wabo.

Buri musore wese ugejeje ku myaka 18 aba asabwa kujya mu gisirikare cya Singapuru. Iyo abyanze abitewe n’umutimanama, afungirwa mu kigo cya gisirikare igihe gishobora kugera ku mwaka. Iyo arangije icyo gifungo yakatiwe, ako kanya bamusaba kwambara imyenda ya gisirikare kandi agahatirwa gukora imyitozo ya gisirikare. Iyo yongeye kubyanga ku nshuro ya kabiri, yongera gukatirwa n’urukiko rwa gisirikare igifungo gishobora kugera ku mwaka n’igice. Ubwo rero, abasore b’Abahamya ba Yehova banze kujya mu gisirikare bitewe n’umutimanama wabo, bakatirwa inshuro ebyiri zikurikiranye, igifungo gishobora kugera ku mezi 30 yose uyateranyije.

Singapuru yanze kubahiriza amategeko y’Umuryango w’Abibumbye

Umuryango w’Abibumbye wagiye usaba kenshi ibihugu biwugize ko “kubahiriza uburenganzira bw’abantu umutimanama utemerera gukora imirimo ya gisirikare, ari kimwe no kubahiriza uburenganzira abantu bafite bwo kuvuga icyo batekereza, guhitamo idini bashaka no kumvira umutimanama wabo, nk’uko bigaragazwa mu Masezerano Mpuzamahanga arebana n’Uburenganzira bw’Ikiremwamuntu.” Nubwo kuva mu mwaka wa 1965 igihugu cya Singapuru ari kimwe mu bigize Umuryango w’Abibumbye, cyagaragaje ko kitemeranya n’icyo Umuryango w’Abibumbye uvuga kuri iyo ngingo. Mu ibaruwa yo ku itariki ya 24 Mata 2002 umutegetsi umwe wa Singapuru yandikiye Komisiyo y’Umuryango w’Abibumbye Ishinzwe Uburenganzira bw’Ikiremwamuntu, yavuze ko “iyo imyizerere y’umuntu cyangwa ibikorwa bye bihabanye [n’amategeko y’urwego rw’igihugu rushinzwe umutekano], uburenganzira leta ifite bwo gucunga umutekano w’igihugu ni bwo buza mu mwanya wa mbere.” Uwo mutegetsi yavuze adaciye ku ruhande ati: “Twe ntitwemeranya n’andi mahanga ku kibazo kirebana n’abantu banga kujya mu gisirikare bitewe n’umutimanama.”

Icyo twavuga kuri

Chuang Xu Daniel Poh

Chuang Xu Daniel Poh yavutse mu mwaka wa 2003 kandi mama we ni Umuhamya wa Yehova. Igihe Daniel na barumuna be babiri bigaga Bibiliya, papa wabo utari Umuhamya na we yatangiye kwigana na bo. Abagize umuryango wabo bakundaga kuganira ku masomo bavanye mu byo bigiye mu materaniro, cyangwa ibyo biyigishije kandi buri munsi basengeraga hamwe. Uko bagendaga bakorera Yehova bashyize hamwe, byatumaga umuryango wabo urushaho gukundana cyane.

Uko Daniel yagendaga akura, yarushagaho guha agaciro ubucuti afitanye na Yehova. Ni iki cyatumye yemera ko yabonye ukuri? Yaravuze ati: “Icya mbere, kubera ko nkunda amateka, nishimira cyane ukuntu ubuhanuzi bwo muri Bibiliya bugenda busohora. Urugero, nashimishijwe n’ukuntu Bibiliya yari yaravuze ko Babuloni izarimbuka kandi ikabivuga imyaka magana abiri mbere y’uko biba. Yavuze ko ingabo z’Abamedi n’Abaperesi zari gukamya amazi y’uruzi rwa Ufurate maze zikinjira mu mujyi wa Babuloni zikawurimbura. Ibyo byose byasohoye nk’uko byari byaravuzwe. Icya kabiri, nagiye nibonera ukuntu njye n’abagize umuryango wanjye, amahame yo muri Bibiliya yagiye atugirira akamaro, ugereranyije n’abatayakurikiza. Nishimira ko ndi mu nzira y’ukuri.”

Daniel amaze kurangiza amashuri, yari yiteze ko ashobora gufungwa kubera ko yanze kujya mu gisirikare kubera umutimanama we watojwe na Bibiliya. Icyakora, yifuzaga ko niba bishoboka yahabwa imirimo ya gisiviri isimbura iya gisirikare. Yari ahangayikishijwe nuko azatandukana n’abagize umuryango we kandi hari imirimo yajyaga abafasha. Nubwo byari bimeze bityo ariko, mu mwaka wa 2023 yiyemeje kwiyegurira Yehova mbere gato y’uko basohora urutonde rw’abagomba kujya mu gisirikare. Muri Kanama 2023, Daniel yafunzwe by’agateganyo nyuma ajyanwa mu rukiko rwa gisirikare, maze akatirwa igifungo cy’imyaka ibiri n’igice. Biteganyijwe ko azafungurwa muri Gashyantare 2026.

Uko ibintu byagiye bikurikirana

Ku itariki ya 17 Nzeri 2024

Abahamya 8 bafunzwe bazira ko umutimanama wabo utabemerera kujya mu gisirikare.
Ku itariki ya 24 Mata 2002

Abategetsi ba Singapuru bemeje ko leta yabo itubahiriza uburenganzira bw’abantu umutimanama utemerera kujya mu gisirikare.
Muri Gashyantare 1995

Kuburabuza abaturage b’Abahamya ba Yehova bo muri Singapuru no kubafunga.
Ku itariki ya 8 Kanama 1994

Urukiko rw’Ikirenga rwa Singapuru rwanze ubujurire bw’Abahamya.
Ku itariki ya 12 Mutarama 1972

Leta ya Singapuru yambuye Abahamya ba Yehova ubuzimagatozi.

Ibindi wamenya

AMAKURU

Abahamya ba Yehova bafunzwe bazira ukwizera kwabo—Aho bafungiwe

Abahamya ba Yehova bafungiwe mu bihugu bitandukanye bazira ukwizera kwabo, kandi rimwe na rimwe bafungirwa mu mimerere mibi.

AMAKURU

Icyo abahanga bavuga ku kibazo cy’umutimanama

Ibihugu hafi ya byose byemera ko kwanga kujya mu gisirikare bitewe n’umutimanama ari uburenganzira bw’ibanze bw’ikiremwamuntu. Iyumvire impamvu abahanga bakora mu miryango iharanira uburenganzira bw’ikiremwamuntu bavuga ko icyo kibazo kireba isi yose.

AMAKURU