Muvumbi Wezru Lweyi A Nga Ni Lizrandzru Awa Hi Hlayisa
1. MUVUMBI WEZRU A YENTXA LESWAKU DAMBU DZRI HUMA
Xana wa swi kota ku yanakanya leswaku a wutomi a byi tava hi ndlela yini a misaveni loko a ku nge na dambu? Dambu dzri nyika ntamu minsinya akuva yi humexa makamba, yi beka swiluva, yi beka mihandzru ni tinyingi. Nakone dambu dzri yentxa leswaku minsinya yi mpswompswa mati ka misava hi mitsru yi ma yisa ka makamba. Ntsrhaku ka leswo, a mati ma gama ma tlhelela mpfukeni.
2. MUVUMBI WEZRU A NISA MPFULA A MISAVENI
A mpfula i nyiko ya ku hlamalisa ya Xikwembu Nkulukumba leyi yentxaka leswaku misava yi hi humexela swakuda. Xikwembu Nkulukumba a hi nyika timpfula ta tilu ni minguva ya mihandzru, a hi yandzrisela swakuda a va a tata timbilu tezru hi ku nyonxa.
3. MUVUMBI WEZRU A HI NYIKA SWAKUDA NI SWA KU YAMBALA
Vapswali vanyingi va tikazrata ngopfu akuva va kumela ndangu wavu swakuda ni swa ku yambala. Kambe vona leswi Matsralwa ma swi hlayaka: ‘Langusani tinyanyana ta tilu; hikusa a ti byali, a ti tsrhoveli, a ti hlengeleti ntxhumu swintlhanteni; a ku va Tatana wenu wa le tilwini lweyi a ti phamelaka. Xana n’wine a n’wi ti tluli ngopfu xana?’—Mattheo 6:25, 26.
‘Dondzrani hi magon’hwa ya nhova, leswi ma milisaka xiswone . . . kambe ndzri n’wi byela leswaku Solomoni, a ku phatimeni kwakwe hinkwaku, a nga yambalanga swanga ha dzrin’we dzra wone. Imbosi byanyi bya nhova lebyi nga kone namunhla, Xikwembu Nkulukumba a byi yambexisaka xileswi . . . xana a nga ka a nga yambexi ngopfu n’wine?’—Mattheo 6:28-30.
Leswi Xikwembu Nkulukumba a nga ni wuswikoti bya ku hi nyika swakuda ni mpahla, handle ka ku ganaganeka a nga hi pfuna ku kuma swin’wana ni swin’wana leswi hi swi vilelaka. Loko hi yentxa ku zrandzra ka Xikwembu Nkulukumba, Yene a ta tovokisa minzamu yezru ya ku djula ku tihlayisa swi nge na mhaka leswaku ho tidzrimela swakuda swezru kumbe ha ha li ku djuleteleni ka ntizro akuva hi kota ku xava leswi hi swi vilelaka.—Mattheo 6:32, 33.
Handle ka ku ganaganeka, hi ni swivangelo leswinene swa kuva hi zrandzra Xikwembu Nkulukumba loko hi yanakanyisisa hi hinkwaswu leswi a hi nyikaka swone swa ku fana ni dambu, mpfula, tinyanyana ni magon’hwa kumbe swiluva. Nhloko-mhaka leyi landzrelaka yi ta hi komba ndlela leyi Muvumbi a khanelaka ni vhanu ha yone.
