Ku sukela a ku tumbuluxiweni ka vhanu, Muvumbi wezru a vulavule ni vhanu hi ku tizrisa tintsrumi ni vaprofeta. Handle ka leswo, a yentxe leswaku madzrungula yakwe ni swidumbiso swakwe mayelanu ni wumundzruku swi tsraliwa. Swidumbiso leswo swa Xikwembu Nkulukumba swi nga txintxa wutomi byaku. Kambe hi nga swi kuma kwini swidumbiso swa Xikwembu Nkulukumba?

Dzrungula ledzri Xikwembu Nkulukumba a hi nyikaka dzrone dzri kumeka ka Matsralwa ya ku Xwenga. (2 Timoteo 3:16) Kambe Xikwembu Nkulukumba a va tizrise hi ndlela yini vaprofeta akuva va tsrala dzrungula dzrakwe? (2 Petros 1:21) Xikwembu Nkulukumba a beki mimpimiso yakwe a miyanakanywini ya vatsrali, kutani vone va tsrala dzrungula dzrakwe. Leswo hi nga swi fananisa ni loko n’wamabindzru wa kukazri a djula ku zrumela papela kutani a kombela matsralana wakwe akuva a dzri tsrala. N’wamabindzru hi yene n’winyi wa papela nambi leswi a kombeliki matsralana akuva a dzri tsrala. Hi ndlela leyi fanaka, Xikwembu Nkulukumba a tizrise vhanu akuva va tsrala dzrungula dzrakwe kambe hi ntshima hi yene n’winyi wa Matsralwa ya ku Xwenga.

A dzrungula dzra Xikwembu Nkulukumba i dzra lisima swinene lakakuva a djula leswaku ‘vhanu va matiko, ni tinxaka, ni tindzrimi, ni tintsrhundzru hinkwatu’ va dzri dondzra va tlhela va dzri twisisa. (Apfuletelo 14:6) Hi ku tovokisiwa hi Xikwembu Nkulukumba, Bibele dzra kumeka hinkwadzru kumbe hi swiyenge hi tindzrimi leti tlulaka 3.000 wa tone. Bibele dzri tlula buku dzrin’wana ni dzrin’wana ledzri nga kone lani misaveni.