Matovoko Lawa Ma Taka Kumiwa Hi Lava Yingisetaka Xikwembu Nkulukumba
Muprofeta Moxe a hlaye leswaku loko hi yingiseta swileleto swa Xikwembu Nkulukumba, hi ta kuma matovoko yakwe. (Deuteronoma 10:13; 11:27) Hine a hi yingiseti Xikwembu Nkulukumba hi ku txhava ku khatisiwa, kambe hi mu yingiseta hi leswi hi mu zrandzraka. Handle ka leswo, a wumhunu bya ku xonga bya Xikwembu Nkulukumba byi hi susumetela ku mu yingiseta ni ku kala hi nga yentxi ntxhumu lowu taka mu kwatisa. ‘A ku zrandzra ka Xikwembu Nkulukumba hi loko hi bekisa swileleto swakwe.’—1 Yohan 5:3.
Kambe ku yingiseta Xikwembu Nkulukumba swi nga hi tisela matovoko hi ndlela yini? Vona swikombiso swibidzri.
1. KU YINGISETA XIKWEMBU NKULUKUMBA SWI HI YENTXA HI VA NI WUTLHAZRI
‘Hi mine Yehovha, Xikwembu Nkulukumba waku, lwa ku dondzrisaka ku ku pfuna, . . . lwa ku fambisaka ndleleni leyi u fanelaka ku famba ha yone.’—EZAYA 48:17.
Muvumbi wezru, Yehovha Xikwembu Nkulukumba, awa hi tiva ha hombe nakone a hi nyika nkongomiso lowu hi wu vilelaka. Akuva hi teka swiboho leswinene hi fanela ku dondzra Matsralwa ya ku Xwenga akuva hi tiva leswi Yene a djulaka leswaku hi swi yentxa hi tlhela hi hanya hi ku ya hi swileleto swakwe.
2. KU YINGISETA XIKWEMBU NKULUKUMBA SWI HI YENTXA HI NYONXA
‘Va ni ndjombo [va ni ku nyonxa, Tradução do Novo Mundo] lava yingelaka Zritu dzra Xikwembu Nkulukumba va va va dzri bekisa.’—LUKA 11:28.
Namunhla, magidigidi ya vhanu va kume ku nyonxa ka ntiyiso hi ku yingiseta Zritu dzra Xikwembu Nkulukumba. Vona xikombiso xa wanuna wa kukazri wa le Espanha, lweyi a a ni xikwatisana a tlhela a hanyisana ni vhanu hi ndlela leyi nga liki yinene, nambi ni nsati wakwe. Siku dzrin’wana, a dondzre leswi muprofeta Moxe a swi tsraliki mayelanu ni wumhunu bya ku nabyala bya Yosefa, n’wana wa Yakobe. Yosefa a xavisiwile swanga xikazrawa a tlhela a petiwa djele na a nga honanga ntxhumu. Nambitanu, a tame a va mhunu wa ku nabyala ni lweyi a zruliki nakone a dzrivaleli lava a va mu yentxeli wubihi. (Genesis, tindzrima 37-45) Wanuna lweyo wa le Espanha a te: “Ku yanakanyisisa hi xikombiso xa Yosefa swi ni yentxe ni djula ku va mhunu wa ku nabyala, wa munene ni lweyi a zruliki. Swoswi ni nga hlaya leswaku hakunene ni ni wutomi lebyi nyonxisaka.”
Matsralwa ya ku Xwenga ma hi nyika nkongomiso lowu yengetelekiki mayelanu ni ndlela leyi hi nga hanyisanaka ni van’wana ha yone. Hi ta swi vona ka nhloko-mhaka leyi landzrelaka.
