DONDZRO 7
I Yini Mfumu Wa Xikwembu Nkulukumba?
1. I Yini Mfumu Wa Xikwembu Nkulukumba?
I yini leswi yentxaka leswaku Yesu a va Hosi leyi fanekelaka?—MARKA 1:40-42.
Mfumu wa Xikwembu Nkulukumba i wuhosi bya le tilweni. Wu ta siva mimfumu hinkwayu leyi nga kone wu tlhela wu yentxa leswaku ku zrandzra ka Xikwembu Nkulukumba ku yentxeka a tilweni ni la misaveni. Madzrungula lama khanelaka hi Mfumu wa Xikwembu Nkulukumba i manene. Ku nga li khale, Mfumu wa Xikwembu Nkulukumba wu ta hetisisa ku navela ka vhanu hinkwavu ka leswaku va va ni mfumu lowunene. Wu ta yentxa leswaku vhanu hinkwavu va hanya hi ntwananu la misaveni.—Dondzra Daniel 2:44; Mattheo 6:9, 10; 24:14.
Mfumu i mfumu hi loko wu ni hosi. Yehovha a hlawule N’wanakwe, Yesu Kriste, kuva Hosi ya Mfumu Wakwe.—Dondzra Apfuletelo 11:15.
Hlalela vídeo I Yini Mfumu Wa Xikwembu Nkulukumba?
2. Ha yini Yesu a li Hosi leyi fanekelaka?
N’wana wa Xikwembu Nkulukumba i Hosi leyi fanekelaka hikusa a ni wumbilu nakone a zrandzra swa ku lulama. (Mattheo 11:28-30) Handle ka leswo, a ni ntamu lowu dzringanaka wa ku pfuna vhanu hikusa a ta fuma misava hinkwayu na a li tilweni. Ntsrhaku ka loko a pfuxiwile, a tlhantukele a tilweni a ya tsrhama vokweni dzra xinene dzra Yehovha a yimela nkama. (Ba-Heberu 10:12, 13) Hi wugamu, Xikwembu Nkulukumba a mu nyike ntamu wa kuva a sungula ku fuma.—Dondzra Daniel 7:13, 14.
3. I vamani lava taka fuma na Yesu?
Ntlawa lowu vitaniwaka “tinsasi”, kumbe vaxwengi, wu ta fuma na Yesu a tilweni. (Daniel 7:27) Vaxwengi va ku sungula lava hlawuliwiki ku ve vapostola va ku dumbeka va Yesu. Yehovha a ye mahlweni a hlawula vavanuna ni vavasati va ku dumbeka swanga vaxwengi ku ta tlhasa namunhla. Ku fana na Yesu, vone va pfuxiwa hi mizri wa moya.—Dondzra Yohan 14:1-3; 1 Ba-le-Korinte 15:42-44.
I vhanu vangani va yaka a tilweni? Yesu a va vitane “ntlhambinyana”. (Luka 12:32) Hi wugamu va ta tlhanganisa 144.000. Va ta fuma misava hinkwayu na Yesu.—Dondzra Apfuletelo 14:1.
4. Ku yentxeke yini loko Yesu a sungula ku fuma?
Mfumu wa Xikwembu Nkulukumba wu sungule ku fuma hi 1914. * Ntxhumu wa ku sungula lowu Yesu a wu yentxiki swanga Hosi a ve ku txukumetela Sathana ni mademoni yakwe la misaveni. Sathana a hlundzruke swinene nakone a sungule ku vanga dleve-dleve misaveni hinkwayu. (Apfuletelo 12:7-10, 12) Ku sukela kolanu, swidzrilo swa vhanu swi ye swi yandzra swinene. Tiyimpi, tindlala, mintungu ni ku tsrekatsreka ka misava, hinkwaswu swi yentxa xiyenge xa “xikombiso” xa leswaku ku nga li khale Mfumu wu ta lawula timhaka hinkwatu ta misava.—Dondzra Luka 21:7, 10, 11, 31.
5. Xana Mfumu wa Xikwembu Nkulukumba wu yentxa yini swoswi?
Hi kola ka ntizro wa ku zrezra misaveni hinkwayu, Mfumu wa Xikwembu Nkulukumba swoswi wu tlhanganisa xitsrhungu lexikulu xa vhanu va matiko hinkwawu. Vhanu va ntsrandzra-vahlayi lava nga ni moya wa ku zrula va ndzruluka vafumiwa va Yesu. Mfumu wa Xikwembu Nkulukumba wu ta va sizrelela loko wu helisa xiyimu xa ku biha lexi nga kone namunhla la misaveni. Xileswo, hinkwavu lava djulaka ku pfuneka hi Mfumu wa Xikwembu Nkulukumba va fanela ku dondzrela ku va vafumiwa va Yesu lava yingisetaka.—Dondzra Apfuletelo 7:9, 14, 16, 17.
Hi nkama wa 1.000 wa malembe, Mfumu wu ta yentxa leswaku ku hetiseka leswi Xikwembu Nkulukumba a a hambele vhanu swone a ku sunguleni. Misava yi ta va paradeyisi hinkwaku. Hi wugamu, Yesu a ta tlhelisela Mfumu ka Tatana wakwe. (1 Ba-le-Korinte 15:24-26) Xana u tiva mhunu lweyi u nga navelaka ku mu bulela hi Mfumu wa Xikwembu Nkulukumba?—Dondzra Amapsalma 37:10, 11, 29.
^ par. 6 Akuva u tiva leswi yengetelekiki mayelanu ni ndlela leyi wuprofeta bya Bibele byi profetiki lembe dzra 1914 ha yone, vona matluka 217-220 ya buku ledzri liki I Yini Leswi Hi Nga Swi Dondzraka A Bibeleni?
