XIDONDZRO 43
Xana Vakriste Va Fanela Ku Byi Vonisa Kuyini Byala?
A misaveni hinkwayu, vhanu va ni mavonela ya ku hambana hi byala. Van’we va swi zrandzra ku nwa byala ni vanghanu. Vambeni va vona swi yampswa kuva va nga nwi nikutsrongo. Kasi vambeni mfuzri va byi kukutlela va za va popswa. Xana Bibele dzri li yini hi byala?
1. Xana swi bihile ku nwa byala?
Bibele a dzri soli ku nwa byala. Ku hlaya ntiyiso, loko dzri khanela hi swihanano swa ku siyanasiyana leswi hi nyikiwiki ha Xikwembu Nkulukumba, Bibele dzri patsra ni ‘vuvhinya lebyi tsrhavisaka mbilu ya mhunu’. (Amapsalma 104:14, 15) Vavanuna ni vavasati vambeni va ku dumbeka lava ku khaneliwaka ha vone a Bibeleni, a va nwa byala.—1 Timoteo 5:23.
2. I xilayu muni lexi Bibele dzri xi nyikaka lava nwaka byala?
Yehovha awa swi sola ku nwa ngopfu ni ku popswa. (Ba-le-Galatia 5:21) A Zritu dzrake dzri li: ‘U nga tolovelani ni swinwi swa vuvhinya.’ (Amaproverbia 23:20) Xileswo, loko hi djula ku nwa byala, nambiloko hi li wuswezru, a hi fanelanga ku nwa lakakuva hi hluleka ku yanakanya ha hombe, ku lawula mazritu ni mintizro yezru kumbe lakakuva hi hona wutomi byezru. Loko swi hi hlula ku lawula manwela yezru, hi fanela ku tiyimisela ku byi tsrhika hi ku helela.
3. Hi nga xi hloniphisa kuyini xiboho xa vambeni mayelanu ni byala?
Mun’wana ni mun’wana a fanela ku titekela xiboho mayelanu ni ku nwa byala. A hi na mfanelo ya ku sola lweyi a hlawulaka ku nwa hi ku dzringanisela, nambi ku sindzrisa lweyi a nga swi djulikiki ku nwa. (Ba-le-Roma 14:10) Hi hlawula kuva hi nga nwi loko ku yentxa leswo swi ta khunguvanyisa vambeni. (Dondzra Ba-le-Roma 14:21.) ‘A mhunu a nga tidjulele swakwe ntsena, kambe mhunu mun’wana ni mun’wana a a djulele van’wana leswi va fanekelaka.’—Dondzra 1 Ba-le-Korinte 10:23, 24.
KELISISA
Kambisisa minsinya ya milawu ya Bibele leyi nga ku pfunaka ku vona leswaku swa fanela ku nwa kumbe im-him, ni leswaku u nga nwa mpimu muni. Tlhela u tiva leswi u nga swi yentxaka loko u ni xikazratu xa ku hluleka ku pimela manwela.
4. Teka xiboho xa leswaku u ta nwa kumbe im-him
Xana Yesu a a byi vonisa kuyini byala? Akuva u kuma nhlamulo, kambisisa hlolana dzra ku sungula ledzri a dzri yentxiki. Dondzrani Yohan 2:1-11, mi gama mi bulisana hi swivutiso leswi:
-
Hi nga dondzra yini ka hlolana ledzri mayelanu ni leswi Yesu a byi vonisaka xiswone byala ni lava byi nwaka?
-
Leswi Yesu a kalaka a nga solanga ku nwa byala, xana mukriste a fanela ku mu vonisa kuyini lweyi a tinwelaka?
Nambileswi mukriste a ntsrhunxekiki ku nwa byala, a swi hlayi swone leswaku minkama hinkwayu a nga tinwela loko a byi djula. Dondzrani Amaproverbia 22:3, mi gama mi kambisisa leswaku a swiyimu leswi landzrelaka swi nga mu pfunisa kuyini mhunu ku vona leswaku swa fanela kuva a nwa kumbe im-him:
-
U ya ku fambiseni kumbe a ku tizriseni ka mutxhini wa kukazri.
-
U ni nyimba.
-
Dotori a ku byele leswaku u nga nwi.
-
Swa ku kazratela ku pimela loko u nwa.
-
A nawu a wu ku pfumeleli ku nwa byala.
-
U ni mhunu lweyi a hlawulaka kuva a nga nwi hi leswi khale a swi mu kazratela ku tipimela loko a nwa.
Xana u fanela ku va nyika byala vhanu lava tiki mutxhatwini kumbe ka swikhumbyana swin’wana swa ku tihungata? Akuva u vona leswi nga ku pfunaka ku teka xiboho, vonani VHIDIYU.
Dondzrani Ba-le-Roma 13:13 ni 1 Ba-le-Korinte 10:31, 32. A ntsrhaku ka ku dondzra tsralwa ha dzrin’we, bulisanani hi xivutiso lexi:
-
Xana ku tizrisa minsinya leyi ya milawu swi nga ku pfunisa kuyini ku teka xiboho lexi taka nyonxisa Yehovha?
Ku nwa byala i xiboho xa ximhunu xa mukriste mun’wana ni mun’wana. Nambiloko minkama yimbeni mukriste a nwa byala, a nga ha hlawula kuva a nga nwi hi minkama yin’wanyana
5. Teka xiboho mayelanu ni ntsrengo lowu u taka nwa wone
Loko u hlawula ku nwa byala, dzrimuka leswi: Nambileswi Yehovha a nga swi solikiki ku nwa byala, awa swi sola ku nwa ku tlula mpimu. Ha yini? Dondzrani Hošea 4:11, 18, mi gama mi bulisana hi xivutiso lexi:
-
Ku nga yentxeka yini loko mhunu o nwa ku tlula mpimu?
Hi nga swi tingawulisa kuyini ku nwa ku tlula mpimu? Hi fanela ku dzringanisela, hi tiva mpimu wezru. Dondzrani Amaproverbia 11:2, mi gama mi bulisana hi xivutiso lexi:
-
Ha yini swi li wutlhazri ku tibekela mpimu lowu u taka wu nwa?
6. Leswi nga ku pfunaka ku tsrhika ku nwa ku tlula mpimu
Vona leswi pfuniki wanuna wa kukazri ku tsrhika ku kukutlela byala. Vonani VHIDIYU, mi gama mi bulisana hi swivutiso leswi landzrelaka.
-
Hi ku ya hi vhidiyu, xana byala a byi yi hlohlotelisa kuyini ndlela leyi Dmitry a a tikhoma ha yone?
-
Xana a swi kotile ku tekela ku byi tsrhika?
-
A swi kotise kuyini hi wugamu ku byi tsrhika?
Dondzrani 1 Ba-le-Korinte 6:10, 11, mi gama mi bulisana hi swivutiso leswi:
-
Xana ku popswa ku ni khombo dzra ku gama kwini?
-
I yini xi kombisaka leswaku mhunu lweyi a nwaka ku tlula mpimu a nga swi kota ku txintxa?
Dondzrani Matewu 5:30, mi gama mi bulisana hi xivutiso lexi:
-
Ku tsrema voko swi fanekisela ku tikazrata leswaku u nyonxisa Yehovha. U nga yentxa yini loko swi ku kazratela ku tsrhika ku nwa byala ku tlula mpimu? a
Dondzrani 1 Ba-le-Korinte 15:33, mi gama mi bulisana hi xivutiso lexi:
-
Xana vanghanu va nga yi khumbisa kuyini ndlela leyi u nwaka ha yone?
LOKO MHUNU A KU VUTISA LESWI: “Xana ku nwa swi bihile?”
-
U nga hlamulisa kuyini?
NKATSRAKANYU
Yehovha a hi nyike byala leswaku hi tinyonxisa ha byone, kambe awa swi sola ku nwa ku tlula mpimu ni ku popswa.
Mpfuxeto
-
He dzrini vonela dzra Bibele hi byala?
-
He wani makhombo ya ku nwa ku tlula mpimu?
-
Xana hi swi hloniphisa kuyini swiboho swa vambeni mayelanu ni byala?
HANDZRISISA
Xana vampshwa va nga tekisa kuyini swiboho leswinene mayelanu ni byala?
Gungula mintxhumu leyi u nga yi yentxaka leswaku u hlula xikazratu xa ku nwa ngopfu.
“Tiva Ku Lawula Byala” (Xihondzro Xa Ku Zrindzra, 1 ka Janeru wa 2010)
Xana vakriste va fanela ku gunyanisa makopo?
“Swivutiso Swa Vadondzri” (Xihondzro Xa Ku Zrindzra, 15 ka Fevhereru wa 2007)
Vona leswi wanuna wa kukazri a hlulisiki xiswone xikazratu xa ku kukutlela byala, ka dzrungula ledzri liki “A Ni Li Tambori Dzra Ku Boxeka”.
“Bibele Dzri Txintxa Wutomi Bya Vhanu” (Xihondzro Xa Ku Zrindzra, 1 ka Mayu wa 2012)
a Lava va nga ni mavabyi ya ku nwa byala ku tlula mpimu, swi nga ha djula va vulavula ni dotori leswaku a va pfuna ku byi tsrhika. Vadotori vanyingi va hlaya leswaku lava nga ni mavabyi ya ku nwa byala ku tlula mpimu, swi nga yampswa va byi tsrhika hi ku helela.
