Papela ledzri yaka ka Varoma 10:1-21
10 Vamakwezru, leswi ni va navelelaka swone a mbilwini yanga ni ku va kombelela ka Xikwembu Nkulukumba i kuva va huluxiwa.
2 Hikusa ni mboni ya leswaku va mu hisekela Xikwembu Nkulukumba, kambe a va ku tivi ha hombe ku zrandzra kwake.
3 Leswi va kalaka va nga swi tivi leswi Xikwembu Nkulukumba a swi vonaka na swi lulamile va tibekele milawu yavu, xileswo a va wu yingisetanga nawu wa Xikwembu Nkulukumba wa leswi lulamiki.
4 Hikusa Kriste a helise Nawu, akuva mun’wana ni mun’wana lweyi a kombisaka lipfumelo a voniwa a li lweyi a lulamiki.
5 Moxe a tsrale mayelanu ni leswi mhunu a fanelaka ku swi yentxa akuva a voniwa a li lweyi a lulamiki hi ku ya hi Nawu, a ku: “Lweyi a yentxaka mintxhumu leyi a ta hanya hi kola ka yone.”
6 Kambe mayelanu ni wululami lebyi kumiwaka hi ku kombisa lipfumelo, a zritu dzra Xikwembu Nkulukumba dzri li: “U nga hlayi a mbilwini yaku u ku: ‘I mani lweyi a taka tlhantukela tilweni?’ leswi liki, akuva a tisa Kriste a misaveni,
7 kumbe ‘i mani lweyi a taka pela xikheleni xa ku yenta?’ leswi liki, akuva a humesa Kriste a mu susa ka lava fiki.”
8 Kambe a tsralwa dzri li yini? Dzri li: “A zritu dzri le kusuhi na wene, a non’wini waku ni le mbilwini yaku”; ku hlayiwa “dzrungula” ledzri hi dzri zrezraka ledzri djulaka leswaku mhunu a va ni lipfumelo.
9 Hikusa loko u hlaya a livaleni hi nomu waku leswaku Yesu i Hosi, u tlhela u kombisa lipfumelo a mbilwini yaku dzra leswaku Xikwembu Nkulukumba a mu pfuxile ka lava fiki, u ta huluxiwa.
10 Hikusa akuva mhunu a va lweyi a lulamiki a fanela ku va ni lipfumelo a mbilwini yake, kambe akuva a huluxiwa, a fanela ku hlaya dzrungula hi nomu wake.
11 Hikusa a tsralwa dzri li: “A nga kone ni mun’we lweyi a kombisaka lipfumelo kwake lweyi a taka danisiwa.”
12 Hikusa a ku na ku hambana xikazri ka Muyuda ni Mugriki. Hinkwavu a Hosi yavu hi yoleyi ya yin’we, leyi nyikaka matovoko manyingi* hinkwavu lava yi vitanaka.
13 Hikusa “mun’wana ni mun’wana lweyi a vitanaka vito dzra Yehovha a ta huluxiwa”.
14 Nambitanu, va ta mu vitanisa kuyini na va ngi ngi sama va kombisa lipfumelo kwake? Nakone va ta dzri kombisisa kuyini lipfumelo kwake na va ngi ngi sama va yingela ku vulavuliwa ha yene? Kone va ta yingelisa kuyini na ku nga na lweyi a zrezraka?
15 Handle ka leswo, va ta zrezrisa kuyini na va nga zrumiwanga? Hi lani swi tsraliwiki ha kone: “Xongani ka minkondzro ya lava zrezraka madzrungula lamanene ya mintxhumu leyinene!”
16 Nambitanu, a hi hinkwavu va yingisetiki madzrungula lamanene. Hikusa Ezaya a li: “Yehovha, i mani lweyi a kombisiki lipfumelo ka mintxhumu leyi a yi yingeliki kwezru?”*
17 Xileswo, a mhunu a zranga a yingela dzrungula a gama a kombisa lipfumelo. Nakone leswi swi yingeliwiki i dzrungula dzra mayelanu na Kriste.
18 Kambe na vutisa, xana Israyele o kala a nga vanga na wone mukhandlu wa ku yingela dzrungula? Nakunene a ve na wone, hikusa a Matsralwa ma li: “A dzrungula ledzro dzri yingeliwe a misaveni hinkwayu, nambi lava tsrhamaka mimbangwini ya le kule* va dzri yingelile.”
19 Kambe ni tlhela ni vutisa, xana Israyele o kala a nga swi twisisanga? Ku sungula Moxe a li: “Ni ta tizrisa vhanu va matiko akuva ni mi yentxa mi va ni matsrhoho; ni ta tizrisa tiko ledzri phuntiki akuva ni mi yentxa mi hlundzruka ngopfu.”
20 Kambe Ezaya a hlaye mazritu ya Xikwembu Nkulukumba na a nga txhavi ntxhumu a ku: “Ni kumiwe hi lava a va nga ni djuleteli; ni tiviwe hi lava a va nga vutiseli ha mine.”
21 Kambe a hlaya leswi mayelanu na Israyele: “Siku hinkwadzru lava kalaka va nga yingiseti nakone va womiki tinhloko, ni va nalavutele mavoko yanga.”
Tintlhamuxelo ta le hansi
^ Kumbe: “leyi hananaka”.
^ Kumbe: “ka leswi hi va dzrunguleliki swone?”
^ Kumbe: “a wugan’wini bya misava”.
