Madzrungula lamanene Lama Tsraliwiki hi Marka 15:1-47
15 Na bya ha ku xa, a vaprista lavakulu, vakulukumba ni vatsrali, ina, Sanedri hinkwadzru, va hlengeletanile akuva va vonisana leswaku va nga yentxa yini hi Yesu. Ntsrhaku ka loko va mu tsrimbile, va mu teke va mu yisa ka Pilatu.
2 Kutani Pilatu a mu vutisa a ku: “Xana u Hosi ya Vayuda?” Yesu a mu hlamula a ku: “Wene ha byaku u hlaya swone.”
3 Kambe a vaprista lavakulu a va mu lumbeta mintxhumu ya yinyingi.
4 Kutani Pilatu a tlhela a mu vutisa a ku: “A wu na xa ku xi hlaya? A wu swi twi hinkwaswu leswi va ku lumbetaka swone?”
5 Kambe Yesu a nga mu hlamulanga ntxhumu, lakakuva Pilatu a hlamala.
6 Ka nkhuvu wun’wana ni wun’wana, a a talisa ku ntsrhunxela vhanu xib’otxhwa xin’we lexi a va xi hlawula.
7 Hi nkama wolowo a ku ni wanuna lweyi a vitaniwaka Barabasi lweyi a a pfaleliwe djele kun’we ni vapfukeli van’wana va mfumu, lava loko va pfukele mfumu va dlayeteliki vhanu.
8 Kutani a xitsrhungu xi ya ka Pilatu xi sungula ku mu kombela leswaku a xi yentxela leswi a a talisa ku xi yentxela swone.
9 A va vutisa a ku: “Mi djula leswaku ni mi ntsrhunxela Hosi ya Vayuda?”
10 Hikusa Pilatu a a swi tiva leswaku a vaprista lavakulu va mu nyikele hi leswi a va mu tsrhohoka.
11 Kambe a vaprista lavakulu va hlohlotela a xitsrhungu leswaku xi kombela kuva ku ntsrhunxiwa Barabasi a matsrhan’wini ya Yesu.
12 Pilatu a tlhela a ku: “Kutani ni mu yentxa yini lweyi mi mu vitanaka Hosi ya Vayuda?”
13 Va tlhela va bandlukana va ku: “A a hayekiwi mhandzrini!”*
14 Kambe Pilatu a ya mahlweni a va vutisa a ku: “Ha yini? A yentxe yini xa ku biha?” Nambitanu, va bandlukana ngopfu swinene va ku: “A a hayekiwi mhandzrini!”*
15 Kutani Pilatu, hi ku djula ku nyonxisa xitsrhungu, a va ntsrhunxela Barabasi; nakone ntsrhaku ka loko a zrumise leswaku Yesu a pshwitiwa, a mu nyikeli leswaku a ya dlayiwa a mhandzrini.
16 Kutani a masotxha ma mu teka ma famba na yene kaya ka govhernadori,* ma tlhasa ma vitana ntlawa hinkwawu wa masotxha.
17 Kutani ma mu tsrimba kapulana dzra ku pshwuka ma tlhela ma hamba hazri ya mitwa ma mu tlhanteka nhlokweni;
18 ma sungula ku mu losa ma ku: “Hi loselile* Hosi ya Vayuda!”
19 Nakone ma mu ba nhloko hi nhonga, ma mu thukela mazri ma gama ma mu khinsamela.
20 Loko ma heta ku mu hamba xihlekiso, ma mu susa kapulana dzra ku pshwuka ma mu yambexa mpahla yake. Kutani ma famba na yene akuva a ya gongondzreliwa a mhandzrini.
21 Ma tlhela ma sindzrisa Simoni wa le Kirene, lweyi a a li papayi wa Alexandri na Rufu, leswaku a zrwala mhandzri ya Yesu ya nxanisa.* Yene a o khaluta hi ndlela na a buya hi ntlhaveni.
22 Xileswo va yisa Yesu a mbangwini lowu vitaniwaka Golgota, leswi loko swi ndzruluteliwa swi liki: “Mbangu wa Pala.”
23 A mbangwini wolowo, a masotxha ma dzringise ku mu nyika vhinyu ledzri txheliwiki mintxhumu ya ku bava ngopfu, kambe a yale ku nwa.
24 Kutani ma mu gongondzrela a mhandzrini ma gama ma hamba wuhlolotwana akuva ma tiva leswaku loko ma yavelana mpahla yake i mani a taka teka yini.
25 A ku li kolomu ka ma 9 wora* loko va mu gongondzrela a mhandzrini.
26 Nakone a mazritu lawa a va mu lumbeta ha wone lawa a ma tsraliwile, a ma ku: “Hosi ya Vayuda.”
27 Va patsre ni ku gongondzrela swigevengu swibidzri a matlhelweni kwake, xin’we ka tlhelo dzra xinene, xin’wana ka tlhelo dzra ximatsri.
28 *——
29 Lava a va khaluta hi ndlela a va zruketela Yesu na va hlakahla tinhloko va ku: “Ha! Wene a wu ku u ta gilhita tempele u tlhela u dzri yaka hi masiku mazrazru,
30 tihuluxi ka, u xika a mhandzrini ya nxanisa.”*
31 Hi lani ku fanaka, a vaprista lavakulu ni vatsrali na vone a va mu poyilela va ku: “Van’wana a va huluxile; kambe yene a nga swi koti ku tihuluxa!
32 A a xiki a mhandzrini ya nxanisa* swoswi, yene Kriste, Hosi ya Israyele, akuva hi ta swi vona kutani hi mu kholwa.” Nambi lava a va gongondzreliwe matlhelweni kwake a va mu zruka.
33 Ku sukela kolomu ka ma 12* ku ve ni munyama a misaveni hinkwayu ku ya tlhasa kolomu ka ma 15 wora.*
34 Hi nkama wolowo wa ma 15 wora, Yesu a hlaye hi zritu dzra ku tlakuka a ku: “Eli, Eli, lama sabaktani?” Leswi loko swi ndzruluteliwa swi liki: “Xikwembu Nkulukumba wanga, Xikwembu Nkulukumba wanga, u ni tsrhikele yini?”
35 Loko van’we ka lava a va yime kolanu va twa leswo, va ku: “Ma mu twa! A vitana Eliya.”
36 Kutani mhunu wa kukazri a tsrutsruma a ya teka xipontxhi a xi peta ka vhinyu dzra ku bava, a xi tlhoma ka nhonga a mu nyika akuva a nwa, a ku: “Mu tsrhikani! Hi djula ku swi vona loko Eliya a ta buya a mu xixa.”
37 Kambe Yesu a bandlukana swinene a gama a fa.*
38 A kortina ledzri nga tempeleni* dzri handzruka hi xikazri ku sukela henhla ku ya hansi.
39 Kutani loko muzrangeli wa masotxha lweyi a a yime mahlweni kwake a vona leswi yentxekiki loko a fa, a ku: “Hakunene wanuna lweyi a a li N’wana wa Xikwembu Nkulukumba.”
40 A ku ni vavasati lava a va yime hi kule va hlalela leswi a swi yentxeka, a xikazri ka vone a ku na Mariya Magadala, Mariya mamana wa Yakobe Lwentsrongo na Yose, kun’we na Salome.
41 Vavasati lava a va fambafamba na yene nakone a va mu pfuna nkama lowu a a li Galileya. Futsrhi a ku ni vavasati van’wana vavanyingi lava fambiki na yene a Yerusalema.
42 Leswi kutani a dzri ya ku peleni, nakone a ku li siku dzra ku Lulamisela Savata,*
43 ku te Yosefa wa le Arimateya, lweyi a a li xizro lexi hloniphiwaka xa Tribunali Ledzrikulu dzra Vayuda, lweyi na yene a a yimela ku ta ka Mfumu wa Xikwembu Nkulukumba. Wanuna lweyi a kanye mbilu a ya ka Pilatu a ya kombela ntsrumbu wa Yesu.
44 Kambe loko Pilatu a byeliwa leswaku Yesu a file, a nga kholwanga, xileswo a vitana muzrangeli wa masotxha a mu vutisa leswaku Yesu a file kumbe a ha hanya.
45 Ntsrhaku ka loko muzrangeli wa masotxha a mu kholwisile leswaku a file, Pilatu a nyike Yosefa ntsrumbu wa Yesu.
46 Loko Yosefa a xave panu ya ku basa ya lisima,* a ye mu hawula a mu tsrondzriyela hi panu yoleyo kutani a mu beka ka sizra ledzri a dzri kovotliwile a zribyeni; a gama a vumbulutela zribye a pfala nyangwa wa sizra.
47 Kambe Mariya Magadala na Mariya mamana wa Yose va tame va lavisa lani a a lahliwe kone.
Tintlhamuxelo ta le hansi
^ Kumbe: “Mu dlaye a mhandzrini!”
^ Kumbe: “Mu dlaye a mhandzrini!”
^ Kumbe: “kaya ka Pilatu”.
^ Kumbe: “Xawani”.
^ Vona Ntlhamuxelo Wa Mazritu.
^ Hi ku kongoma: “wora dzra wuzrazru”.
^ Mazritu ya ndzrimana leyi a ma kone ka matsralwa ya khale.
^ Vona Ntlhamuxelo Wa Mazritu.
^ Vona Ntlhamuxelo Wa Mazritu.
^ Hi ku kongoma: “wora dzra wu 6”.
^ Hi ku kongoma: “wora dzra wu 9”.
^ Kumbe: “a hefemula ka wugamu”.
^ Ku hlayiwa a kortina ledzri a dzri tsravukanisa Mbangu wa ku Xwengisisa ni Mbangu wa ku Xwenga.
^ Leswi liki, hi Wawuntlhanu.
^ Kumbe: “panu leyinene ya linyu”.
