Papela dzra ku sungula ledzri yaka ka Vatesalonika 1:1-10
1 Hi mine Pawulo, ni na Silvhanu* na Timotewu. Ni tsralela bandla dzra Vatesalonika ledzri lumbaka Xikwembu Nkulukumba Papayi na Hosi Yesu Kriste:
Ingiki mi nga va ni timpswalu letikulu ni ku zrula.
2 Minkama hinkwayu hi tlangela Xikwembu Nkulukumba loko hi mi dzrimuka a swikhongotweni swezru,
3 hikusa a mahlweni ka Papayi wezru Xikwembu Nkulukumba a hi wu dzrivali ntizro lowu mi wu yentxiki hi lipfumelo ni hi lizrandzru, ni ndlela leyi mi swi tiyiseleliki ha yone swikazratu hi kola ka dumbo ledzri mi nga na dzrone ka Hosi yezru Yesu Kriste.
4 Vamakwezru lava zrandzriwaka hi Xikwembu Nkulukumba, ha swi tiva leswaku Xikwembu Nkulukumba hi yene a mi hlawuliki,
5 hikusa a madzrungula lamanene lawa hi mi zrezreliki wone a hi ma zrezranga hi mazritu ntsena kambe hi ma zrezre ni hi ntamu lowukulu, hi moya wa ku xwenga ni hi ku kholwiseka lokukulu nakone ma swi tiva leswi hi swi yentxiki makazri kwenu akuva hi mi pfuna.
6 Hikusa mi yamukele zritu dzra Xikwembu Nkulukumba hi ku nyonxa loku pfaka ka moya wa ku xwenga nambileswi a mi li mahlomulweni manyingi,
7 xileswo mi ve xikombiso ka vapfumeli hinkwavu va le Makedoniya ni le Akaya.
8 A me hangalasa zritu dzra Yehovha a Makedoniya ni le Akaya ntsena, kambe a lipfumelo dzrenu ka Xikwembu Nkulukumba dzri hangalake a mimbangwini hinkwayu, lakakuva a swa ha vileli kuva hi hlaya ntxhumu.
9 Hikusa vone va tsrhamela ku hi byela mayelanu ni ndlela leyi hi kumaniki na n’wine ha yone hi khambi dzra ku sungula ni leswi mi swi tsrhikisiki xiswone swithombe swenu mi ndzruluka mi tizrela Xikwembu Nkulukumba wa ntiyiso lweyi a hanyaka,
10 na mi yimela N’wanake lweyi a pfaka matilweni, lweyi a mu pfuxiki ku feni, ku nga Yesu, lweyi a taka hi huluxa ka mahlundzru ya Xikwembu Nkulukumba lama taka.
Tintlhamuxelo ta le hansi
^ Lweyi a tlhelaka a vitaniwa Silasi.
