Papela dzra ku sungula ledzri yaka ka Vakorinte 11:1-34
11 Ni yetiselani, ku fana ni leswi mine ni yetiselaka Kriste.
2 Na mi kulungela hikusa ka mintxhumu hinkwayu ma ni dzrimuka nakone mintxhumu hinkwayu mi yi yentxisa xileswi ni mi dondzrisisiki xiswone.
3 Kambe ni djula mi swi tiva leswaku a nhloko ya wanuna mun’wana ni mun’wana i Kriste; a nhloko ya wansati i wanuna; ni leswaku a nhloko ya Kriste i Xikwembu Nkulukumba.
4 Wanuna mun’wana ni mun’wana lweyi a khongotaka kumbe a profetaka na a funeketi nhloko, a danisa lweyi a nga nhloko yake;
5 kambe wansati mun’wana ni mun’wana lweyi a khongotaka kumbe a profetaka na a nga funeketanga nhloko, a danisa lweyi a nga nhloko yake, hikusa loko a yentxa leswo swi fana ni loko a tsremete mpandlha.
6 Hikusa loko wansati a nga tifuneketi nhloko, a fanela ku tsremeta misisi; kambe loko swi danisa kuva wansati a tsremeta misisi kumbe a tsremeta mpandlha, a fanela ku tifuneketa nhloko.
7 Wanuna a nga fanelanga a funeketa nhloko hikusa yene i xifaniso ni ku phatima ka Xikwembu Nkulukumba, kambe a wansati i ku phatima ka wanuna.
8 Hikusa wanuna a nga pfi ka wansati, kambe wansati hi yene a pfaka ka wanuna.
9 Handle ka leswo, a wanuna a nga hambeliwanga wansati, kambe wansati hi yene a hambeliwiki wanuna.
10 Hi mhaka ya leswo ni hi mhaka ya tintsrumi, wansati a fanela ku funeketa nhloko hi xa kukazri akuva a kombisa leswaku a tibeka hansi ka nuna wake.
11 Handle ka leswo, a xikazri ka valandzreli va Hosi, a ku na wansati na ku nge na wanuna nakone a ku na wanuna na ku nge na wansati.
12 Hikusa ku fana ni leswi wansati a pfaka ka wanuna, na yene wanuna a pswaliwa hi wansati; kambe a mintxhumu hinkwayu yi pfa ka Xikwembu Nkulukumba.
13 Swi kambelani ha wuswenu: Xana i swinene kuva wansati a khongota ka Xikwembu Nkulukumba na a nga tifuneketanga nhloko?
14 Xana leswi mhunu a nga tumbuluxisiwa xiswone a swi mi dondzrisi leswaku loko wanuna a ni misisi ya ku leha o tixixa,
15 kambe loko wansati a ni misisi ya ku leha swi mu nyika lisima? Hikusa a nyikiwe misisi akuva yi funeketa nhloko yake.
16 Nambitanu, loko mhunu wa kukazri a nga pfumelelani na yone mhaka leyi, a nhlamulo yezru hi leswaku a hi na xihena xin’wana, nambi mabandla ya Xikwembu Nkulukumba a ma na xone.
17 Kambe loko ni mi nyika swileleto leswi, a ni mi kulungeli hikusa a mintlhanganu yenu a matsrhan’wini ya kuva yi mi pfuna yo mi vavisa.
18 Hikusa xa ku sungula ni twa leswaku loko mi tlhangana a bandleni ku ni ku yavana a makazri kwenu. Nakone na kholwanyana leswaku leswo swa yentxeka.
19 Hikusa nakunene ku ta va ni swintlawantlawana a makazri kwenu, kambe leswo swi ta yentxa leswaku swi voneka ha hombe leswaku i vamani lava nyonxeliwaka hi Xikwembu Nkulukumba.
20 Loko mi tlhangana a mbangwini wun’we, leswo nakunene a mi swi yentxeli kuva mi da Xilalelo xa Hosi.
21 Hikusa loko ku tlhasa nkama wa ku da Xilalelo xa Hosi, mun’wana ni mun’wana a zranga hi ku da swakuda swake lakakuva mun’we a va na a twa ndlala kasi mun’wana a va na a popswile.
22 Mo pfumala mimiti ya ku ya da ni ku ya nwela ka yone ke? Kumbe mo dzrela bandla dzra Xikwembu Nkulukumba ni ku djula ku yentxa leswaku lava pfumalaka va va ni tingana? I mpswini leswi ni nga mi byelaka swone? Xana ni fanela ku mi kulungela? Ka mhaka leyi, a ni mi kulungeli.
23 Hikusa leswi ni swi dondzriki ka Hosi hi swoleswi ni mi dondzrisiki swone, leswaku ka wusiku lebyi Hosi Yesu a a ta wongiwa ha byone a teke pawu,
24 kutani ntsrhaku ka loko a nkhensile, a dzri khemelela a ku: “Pawu ledzri dzri yimela mizri wanga, lowu nyikeliwaka hi nkonta yenu. Tamani mi yentxa leswi akuva mi ni dzrimuka.”
25 Ntsrhaku ka loko va lalelile, a yentxe leswi fanaka ni hi kopo, a ku: “A kopo ledzri dzri yimela xipfumelelanu leximpshwa lexi tiyisekisiwaka hi ngati yanga. Tamani mi yentxa leswi, loko mi dzri nwa, akuva mi ni dzrimuka.”
26 Hikusa nkama wun’wana ni wun’wana mi daka pawu ledzri ni ku nwa kopo ledzri, mi va na mo twalisa lifu dzra Hosi, ku ya tlhasa loko yi ta.
27 Xileswo, lweyi a daka pawu kumbe a nwaka kopo dzra Hosi na swi nga fanelanga a ta va ni nandzru wa ku dohela mizri ni ngati ya Hosi.
28 Mun’wana ni mun’wana a fanela ku zranga hi ku tikambela ha hombe, ku li kone a taka da pawu ni ku n’wa kopo.
29 Hikusa lweyi a daka a tlhela a nwa na a nga swi twisisi leswi mizri wu yimelaka swone, o tivitanela yavanyiso.
30 Hi leswo swi yentxaka leswaku a makazri kwenu ku va ni vanyingi lava heliki ntamu ni lava vabyaka, ni va vanyinginyana lava fiki.*
31 Kambe loko a ho tikambela ha hombe leswi hi nga xiswone, a hi nge ti yavanyisiwa.
32 Nambitanu, loko hi yavanyisiwa, ho layiwa hi Yehovha akuva hi nga ti khatisiwa kun’we ni misava.
33 Xileswo vamakwezru, loko mi tlhangana akuva mi ta da Xilalelo xa Hosi, yimelananani.
34 Loko mhunu a twa ndlala, a a di na a ha li kaya, akuva loko mi tlhangana mi nga yavanyisiwi. Kambe a timhaka leti saliki, ni ta ta ti lulamisa loko ni tlhasa kohalanu.
Tintlhamuxelo ta le hansi
^ Leswi liki, ku hela ntamu, ku vabya kumbe ku fa hi tlhelo dzra moya.
