Mânro dad hai mânri dei sas-le catolici iagasa ando ilo. Tha, cana prinjiande andai Biblia că o anav le Devlesco si Iehova, von cărdile Martori le Iehovasche iagasa ando ilo. Mai anglal, mânro dad cărdea țâne statui caștune le Isusosa. Tha, pala codoia, folosisardea i buchi cai jianelas te cherel-la sar tâmplaro caște cherel anda i partea de telal amare chăreschi i iechto sala le Regatoschi anda San Juan del Monte, pașa i Manila, i capitala andai Filipine.

Cărdilem ando bărș 1952. Sas man ștar phrala hai trin pheia mai bare. Mânro dad hai mânri dei sicade amen sar te avel amen iech spiritualitatea zurales lași. Cana somas șiavorro, mânro dad zuriardea man te citisarav iech capitolo andai Biblia ande fiesavo ghies hai studiisardea manța anda mai but anda amare publicații. Poiechdata, mânre părinți acharenas amende chăre le phralen cai vizitin le congregații hai le reprezentanți catar i filiala. Le experiențe phende cadale phralendar bucurisarde but amari familia. Von zuriarde amen te șioas i predicarea po dintuno than andi amari viața.

Sichilem but mânre dadestar hai mânra deiatar, cai sas-len iech pachiamos zuralo ando Iehova. Pala so mânri dei pelea nasfali hai mulea, me hai mânro dad astardem o pionierato auxiliaro ande 1971. Tha, pala codoia, ande 1973, cana sas man 20 bărș, mânro dad mulea. Cana hasardem le duien ando merimos, mânro ilo așilea nango hai simțosardem man corcoro. Tha i speranța ciaci hai zurali andai Biblia ajutisardea man te încărav mânro pachiamos zuralo hai vi te avel man iech sastimos hai iech spiritualitatea lași. (Evr. 6:19) Pala țâra timpo so mânro dad mulea, acceptisardem te slujiv sar pioniero specialo ando Coron, iech insula duriardi andai provincia Palawan.

Sas man 21 bărșa cana arăslem ando Coron. Barilem ande iech foro, cadea că așilem le muiesa pâtărdo cana dichlem că pe i insula ci sas but mașini hai că țâra manușen cai beșenas code sas-len curento hai pai. Chiar cana code sas chichiva phrala,  ci sas man iech partenero anda o pionierato hai poiechdata trebulas te jiav corcoro andi predicarea. Ande iechto șion, sas manghe zurales doro mânra familiatar hai mânre amalendar. Pi riat, dichlem caring o cerii cai sas pherdo cerhaia hai șiordem but asfa. Avilea manghe te mechav i repartiția cai sas manghe dini hai te jiav parpale chăre.

Ande codol ghiesa cana simțosardem man corcoro, pâtărdem mânro ilo caring o Iehova. Anav manghe amintea chichiva buchia cai zuriarde man cana citisardem i Biblia hai le publicații. Butivar, avilea manghe andi goghi o Psalmo 19:14. Hachiardem că, dacă avelas te gândiv man le buchiande cai placian le Iehovas, sar avelas ca so cherel vo hai ca lesche calități, vo avelas te avel „mânri Stânca hai mânro Eliberatoro”. Ajutisardea man but iech articolo anda o Turno de Veghe, cai bușiolas „Ci san niciechdata corcoro” a. Citisardem-les butivar. Pe iech rig, ande codol ghiesa simțosardem că som numai le Iehovasa hai daisardem te mangav man lesche anda sea o ilo, tha vi te sichioav hai te gândisarav man mai but.

Na pala but timpo pala so arăslem ando Coron, somas numime phuro andi congregația. Anda codoia că somas o corcoro phuro, ande fiesavo curco trebulas te încărav i Școala anda o Servicio Teocratico, i întrunirea de serviciu, o sicaimos le lilesco andi congregația hai o studio le Turnosco de Veghe. Sa cadea, ande fiesavo curco, încărdemas vi i cuvântarea publico. Iech buchi sas ciaci: ci sas man timpo te simțosarav man corcoro!

Ando Coron, i predicarea sas zurales șucar hai dichelas-pe but rezultatea. Chichiva anda le manușa casa sichilem, ji la urmă, bolde-pe. Tha sas vi zumaimata. Poiechdata, trebulas te jiav telal iech paș ghies ji ando teritorio, bi te jianav cai avelas te sovav ande codoi riat. Ando teritorio la congregațiaco sas vi mai but țâne insule hai, caște arăsav lende, trebulas poiechdata te jiav iecha barcasa chiar cana sas furtuna, hai me ci jianglemas te naiuvav. Ande sea codol pharimata, o Iehova ferisardea man hai ajutisardea man te avav zuralo. Pala codoia, hachiardem că o Iehova pregătisardea man anda le pharimata vi mai phare prin save avelas te nachav anda i nevi repartiția.

Ande 1978, somas bișialdo andi Papua-Noua Guinee, caring o nordo la Australiaco. I Papua-Noua Guinee si iech them ande savo si but plaina. Si cam sa cadea de bari sar i Spania. Somas uimime cana așundem că aproape trin milioanea manușa cai beșenas ande codo them denas duma mai but sar 800 șiba. Tha sas mișto că le mai but anda lende prinjianenas vi i șib pidgin melaneziano, cai bușiol vi tok pisin.

Somas bișialdo anda iech țâra timpo ande iech congregația de șib englezo anda Port Moresby, i capitala anda codo them. Tha pala codoia gălem ande iech congregația cai delas-pe duma i șib tok pisin hai cărdem iech curso la șibaco. So sichilemas co curso folosisardemas andi predicarea. Cadea că daisardem te sichioav i șib mai sigo. Na pala but vremea, daisardem te încărav iech cuvântarea publico ande tok pisin. Daștin te hachiaren chichi de uimime somas cana, pala mai țâra sar iech bărș de cana arăslem andi Papua-Noua Guinee, somas numime o phral cai vizitil le congregații de i șib tok pisin, hai trebulas te cherav cadaia andel thana duriarde iech catar aver!

Anda codoia că le congregații sas dur iech averestar, trebulas te cherav but congresea hai te  phirav but. Cana astardem te cherav cadai buchi, simțosardem man zurales corcoro hai sea le buchia sas-le neve: iech șib nevi, iech them nevi hai buchia cai cherenas-len le manușa neve. Ci daisardem te jiav catar iech congregația ca aver pi phuv anda codoia că sas but plaina hai sas pharo te arăses. Cadea că trebulas te jiav le avionosa cam ande fiesavo curco. Poiechdata, somas o corcoro manuș anda o aviono, cai sas-les iech corcoro motoro cai ci sas-lo prea lașio. Cadal droma ci daravenas man mai țâra sar le droma cai chărdemas-len la barcasa.

Țâra manușen sas-len telefono, cadea că dem duma le phralența andal congregații prin lila. Butivar, arăslem andi congregația angla mânre scrisori hai trebulas te pușiav le manușen cai beșenas ande codo than cai beșenas le Martori le Iehovasche. Tha, de fiesavi data cana arăslem, arachlem le phralen. Cana dichlem sar von primin man anda sea o ilo, sea o timpo somas zuriardo te cherav mai but cadai phari buchi. Simțosardem o vast le Iehovasco ande but buchia, hai mânro amalimos lesa cărdilea zurales pașardo.

Cana încărdem i dintuni întrunirea pe iech insula cai bușiol Bougainville, iech rrom hai iech rromni pașile mandar, asaie manghe hai pușle man: „Mai anes tuche amintea amendar?”. Andem manghe amintea că phendem lenghe anda o Iehova cana avilem i iechto data ando Port Moresby. Astardem te sichioav i Biblia lența, tha pala codoia dem o studio avere phralesche anda codo than. Acana sas-le bolde! Cadaia sas iech anda le but binecuvântări cai sas manghe dine le Iehovastar ande le trin bărșa cai beșlem andi Papua-Noua Guinee.

Angla te tiliarav anda o Coron, ande 1978, prinjiandem iecha șucar pheia, cai bușiolas Adel. Voi cherelas but buchia anda o Iehova. I Adel cărdea pionierato regularo hai bariardea pesche duie șiaven, o Samuel hai i Shirley. Hai mai but, voi lea sama vi pesca deiatar phuri. Ande mai 1981, gălem parpale ando Filipine caște solaharav man la Adelasa. Pala codoia, cărdeam pionierato regularo ande iech than hai leam sama amara familiatar.

Chiar cana sas man buchia cai trebulas te cherav-len andi familia, ande 1983 somas numime pale pioniero specialo hai le phrala bișialde man andi insula Linapacan, andai provincia Palawan. Sea amari familia muchisailea ande codo than duriardo, cai ci sas niciech Martoro. I dei la Adelachi mulea cam pala iech bărș. Tha cărdeam mai dur but andi predicarea, cadea că sas amenghe mai ușoro te nachas părdal cado pharimos. Astardeam te sichioas andai Biblia bute manușența cai paruvenas penghi viața, cadea că, ji la urmă, trebulas amenghe iech țâni sala le Regatoschi. Cadea că, vazdeam iech chiar amen. Pala numai trin bărșa de cana arăsleam, samas bucurime te dichas că ca i Comemorarea avile 110 manușa. But anda codol manușa zuriarde pengo amalimos le Iehovasa hai bolde-pe pala so tiliardeam andai insula.

Ande 1986, somas bișialdo ando Culion, pe iech insula cai sas leprozerie. Pala codoia, vi i Adel sas numime pioniera specialo. Pala țâra timpo, sas amenghe dar te predichisaras le manușenghe cai dichelas-pe că silen lepra. Tha le vestitori ande codo than phende amenghe că codola cai sas-len cado nasfalimos primisarde iech tratamento hai că na-i sar te las vi amen o nasfalimos. Chichiva anda  cadal manușa phirenas ca le întruniri ande iech chăr iecha pheiaco. Hachiardeam cadaia hai, pala țâra timpo, i predicarea ande cado teritorio cărdea amen bucurime. Sas zurales șucar te das iech speranța le manușenghe cai pachianas că o Del ci camel-len, hai cai ci sas-le mișto dichle le manușendar. Amaro ilo bariolas bucuriatar cana dichleam chichi de fericime sas le manușa nasfale cana așunenas că, ande iech ghies, lengo sastimos va avela perfecto. (Luca 5:12, 13)

Tha sar simțosarde-pe amare șiave te train ando Culion? Me hai i Adel achardem dui tărne pheian anda Coron te aven amența, ca amare dui șiave te avel-len lașe amala. O Samuel, i Shirley hai cadal dui tărnea sas-len șucar rezultatea andi predicarea. Von studiisarde bute șiavorrența, hai me hai i Adel sichileam lenghe dadența hai deianța. Ciacimasa, ande iech vremea, sichileam 11 familiența. Na pala but vremea, sas amen cadea de but manușa cai sichionas andai Bibia hai parude penghi viața, că daisardeam te cheras iech nevi congregația!

Mai anglal, somas o corcoro phuro de congregație anda codo than. Anda codoia, i filiala manglea man te încărav le întruniri ande fiesavo curco anda le ohto vestitori anda Culion hai pala codoia te cherav sa codoi buchi anda le enia vestitori anda iech gav cai bușiolas Marily, hai cai trebulas te jias la barcasa trin ceasurea caște arăses code. Pala so încărdeam le întruniri ande codo gav, gălemas but ceasuri telal sea la familiasa pe-l plaina caște jias te încăras studii biblico ande iech gav cai bușiolas Halsey.

Ji la urmă, cadichi de but manușa camenas te sichion anda o Del ande le gava Marily hai Halsey, că trebulas te vazdas dui săli le Regatoschi ande le dui gava. Sa cadea sar ando Linapacan, le phrala hai codola cai camenas te jianen mai but anda o Del dine amenghe sea le buchia cai trebulas caște vazdas iech sala le Regatoschi, hai vi cărde but buchi. I sala le Regatoschi anda Marily sas-la 200 thana hai daștilas te avel bariardi, cadea că daisardeam te încăras congresea ande codo than.

Ande 1993, cana amare șiave barile, me hai i Adel astardeam te slujisaras sar phral cai vizitil le congregații ando Filipine. Pala codoia, andel bărșa 2000, cărdem i Școala anda o Sicaimos  Ministerialo caște daștiv te avav sicaitorii che codoi școala. Ci simțosardem man lașio te cherav cadai buchi, tha i Adel zuriardea man, cadea sar cherelas de fiesavi data. Voi andea manghe amintea că o Iehova daisardea te del man i zor cai trebulas manghe caște cherav cadai nevi buchi. (Filip. 4:13) I Adel jianelas so phenel, anda codoia că vi voi ci mechlea-pe ande peschi repartiția, chiar cana sas-la but nasfalimata.

Ando bărș 2006, cana slujisardem sar sicaitorii, i Adel pelea nasfali hai sas-la Parkinson. Ci avilea amenghe te pachias! Cana phendem lache te jias hai te las sama catar laco sastimos, i Adel phendea: „Mangav tut but te araches iech doctoro cai te ajutil man hai jianav că o Iehova va avela te ajutil man te cherav mai dur leschi buchi”. Ande le șiov bărșa cai avile, i Adel slujisardea le Iehovasche bi te rovarel-pe. Cana ci mai daisardea te jial, voi predichilas ande iech scamin cu rotile. Cana ci mai daștilas te del duma, delas răspunsuri țâne cai întrunirea, anda iech sau dui cuvintea. Butivar, le phrala hai le pheia bișialde mesajea lache cai phenenas chichi de cuci si anda lende că voi ci mechlea-pe hai așilea zurali, ji cana mulea, ande 2013. Pala le 30 bărșa ande save așilem iecha jiuvleasa fidelo hai pherdi iubirea, astardem te simțov man pale corcoro hai i duch pusadea mânro ilo.

I Adel camlea te slujiv mai dur ande mânri repartiția, hai cadaia vi cărdem. Dem mânri zor te cherav but buchia caște na simțov man corcoro. Mașcar le bărșa 2014 hai 2017, somas bișialdo te vizitiv le congregații andai șib tagalog ande iech them cai amari buchi si așadi. Pala codoia, vizitisardem le congregații andai șib tagalog anda Taiwan, Statele Unite hai Canada. Ande 2019, somas sicaitorii ca i Școala andal Evanghelizatori le Regatosche cai încărdea-pe andi șib englezo andi India hai Thailanda. Cadal repartiții cărde man te avav bucurime. Mânro ilo bariol cana cherav sea so daștiv andi buchi le Iehovaschi.

Ande fiesavi repartiția le phrala arăsăn manghe zurales drago, hai pala codoia, si manghe pharo te mechav-len. Ande codol momentea, sichilem te mechav man cu sea ando vast le Iehovasco. Simțosardem butivar lesco ajutorii, hai cadaia ajutisardea man te camav anda sea o ilo orisavo paruimos cai avel lestar. Acana, slujiv sar pioniero specialo ando Filipine. Som ande iech congregația cai cărdilea mânri familia pherdi iubirea hai cai lel sama mandar. Dav man baro te dichav sar o Samuel hai i Sherly len-pe pala o pachiamos penga deiaco. (3 Ioan 4)

Ciaces, ande mânro traio nachlem prin but pharimata. Mașcar aver, dichleam sar mânri cuci rromni pelea nasfali hai, ji la urmă, mulea. Sa cadea, trebulas te sichioav so te cherav andel situații cai ci mai somas ji atunci. Tha dichlem sar o Iehova „na-i dur niciechestar anda amende”. (Fap. 17:27) „O vast le Iehovasco na-i prea țâno” caște ajutil hai te zuriarel pesche slujitoren, chiar cana sile andel thana duriarde. (Is. 59:1) O Iehova, mânri Stânca, sas-lo pașa mande ande sea mânri viața hai mulțumiv lesche anda sea o ilo. Ci somas niciechdata corcoro.