LECȚIA 52
Sostar si importanto sar hureavas-ame hai sar sicavas de avreal
Savoren placial-ame te alosaras corcore sar te hureavas-ame hai sar te sicavas de avreal. Cana las-ame pala so phenel i Biblia, daisaras te alosaras te phiravas iech hureaimos cai placial-ame, tha cai placial vi le Iehovas. Te dichas so phenel i Biblia anda cadai buchi.
1. So versetea ajutin-ame cana alosaras sar te hureavas-ame hai sar te sicavas de avreal?
Trebul ‘te hureavas-ame pachivales, te na das-ame bare, te sicavas că si amen iech goghi sastevesti’ hai te avas sea o timpo uje, caște dichiol-pe că ‘anas închinarea le Devlesche’. (1 Timotei 2:9, 10) Te dichas cadal ștar buchia: 1) ‘Te hureavas-ame pachivales’. Ca le întruniri la congregațiache dichlean că amen, le Martoren le Iehovasche placial-ame te hureavas-ame ande moduri diferime. Cu sea cadala, amaro hureaimos hai o modo sar lașiaras amare bala sicaven sea o timpo respecto caring amaro Del. 2) Sicavas că ‘na das-ame bare’ cana, prin amaro hureaimos, ci țârdas i atenția caring amende hai nici ci cheras averen te aven-le gânduri melale ande lenghi goghi cana dichen-ame. 3) Sicavas că ‘si amen iech goghi sastevesti’ cana ci camas sea o timpo te las-ame pala i mai nevi moda. 4) Prin o modo sar sicavas de avreal le coaver trebun te dichen că ‘anas închinarea le [ciace] Devlesche’, Iehova. (1 Corinteni 10:31)
2. Sostar trebul te gândisaras-ame ca amare phrala hai pheia cana alosaras sar te hureavas-ame?
Si ciaces că daisaras te alosaras so hureaimata te las pe amende, tha trebul te gândisaras-ame sar dichen aver amaro hureaimos. Amen das sea amari zor te na peravas chanicas, tha ‘te avas cuci andel iacha amare pașardesche hai te cheras so si mișto caște zuriaras-les’. (Citisaren Romani 15:1, 2.)
3. Sar daștil amaro hureaimos te cherel averen te camen te sichion anda o Iehova?
Sea o timpo das amari zor te hureavas-ame șucar, cadea sar trebul; tha vi mai but cheras cadaia cana jias ca le întruniri la congregațiache hai andi lucrarea de predicare. Ci camas ca le manușa te dichen mai but pe amaro hureaimos sar te camen te așunen i vestea lași. Mai but, camas ca o modo sar sicavas de avreal te țârdel le manușen caring o ciacimos hai cadea, te ‘te cheras mai șucar o sicaimos amare Salvatorosco’. (Tit 2:10)
HACHIAR MAI MIȘTO
Va avela te diches so daisaras te cheras ca amaro hureaimos hai o modo sar sicavas de avreal te sicaven că sam creștini.
Sicavas că das pachiv sau nici le manușen cai silen autoritatea, prin o modo sar sicavas de avreal. Sa cadea, chiar cana o Iehova dichel so si amen ando ilo, sicavas că das les pachiv vi prin o modo sar sicavas de avreal
4. Cana sicavas mișto de avreal, das pachiv le Iehovasche
Savo si o mai baro motivo sostar trebul te las sama te sicavas mișto de avreal? Citisaren Psalmo 47:2 hai pala codoia den duma:
-
Sar trebul te hureavas-ame ca le manușa te dichen că o Iehova si amaro Del?
-
Tu pachias că trebul te las sama sar sicavas de avreal cana jias ca le întruniri sau andi predicarea? Sostar?
5. Catar jianas sar trebul te hureavas-ame hai sar te sicavas de avreal
Chiar cana amaro hureaimos si cuci sau nici, vo trebul te avel ujo hai potrivime anda o than cai sam. Citisaren 1 Corinteni 10:24 hai 1 Timotei 2:9, 10 hai pala codoia den duma sostar ci trebul te las pe amende iech hureaimos . . .
-
melalo, șindo sau prea lejero.
-
cai si prea chidino pe amende, cai dichiol prin leste hai cherel le coaveren te aven-le gânduri melale cana dichen-ame.
Chiar cana le creștini ci mai sile tela i Legea le Moiseschi, von daștin te sichion anda late sar gândil o Iehova. Citisaren Deuteronomo 22:5 hai pala codoia den duma:
-
Sostar ci trebul niciechdata ca iech murș te hureavel-pe sar iech jiuvli hai iech jiuvli te hureavel-pe sar iech murș?
Citisaren 1 Corinteni 10:32, 33 hai 1 Ioan 2:15, 16 hai pala codoia den duma:
-
Sostar trebul te las sama ca o modo sar sicavas de avreal te na peravel codolen anda o than cai beșas sau le phralen andai congregația?
-
Sar placial le manușen de pașa tute te sicaven de avreal hai te hureaven-pe?
-
Pachias că si mișto ca iech creștino te phiravel sea so phiraven cadal manușa? Sostar?
Daisaras te hureavas-ame ande mai but moduri hai te sicavas de avreal diferime, tha ande sa codo timpo te avas plăcuto le Iehovasche
UNII MANUȘA PHENEN: „Si man o drepto te alosarav so hureaimos te lav pe mande”.
-
Pachias vi tu sa cadea? Sostar?
SO SICHILEAM
Cana alosaras mișto sar te hureavas-ame hai sar te sicavas de avreal, sicavas respecto caring o Iehova hai vi caring aver.
So dichleam
-
Sostar si importanto anda o Iehova sar hureavas-ame hai sar sicavas de avreal?
-
So versetea biblico ajutin-ame te alosaras sar te hureavas-ame hai sar te sicavas de avreal?
-
So pachian le manușa anda i închinarea ciaci cana dichen amaro hureaimos hai o modo sar sicavas de avreal?
RODE MAI BUT
So sicaves averenghe prin o modo sar hureaves-tu?
Va avela te diches sostar si goghiaver te gândis-tu de mai anglal dacă si mișto te cheres tuche iech tatuajo.
„So phenel i Biblia anda le tatuaje?” (Articolo pa amaro site-o)
Va avela te diches vi aver versetea biblico cai ajutin-tu te les lașe decizii.
„Anes pachiv le Devlesche prin o modo sar hureaves-tu?” (O Turno de veghe, septembria 2016)
Va avela te diches sar iech jiuvli cai camlea te avel plăcuto le Devlesche sichilea te dichel lașe iachența o modo sar aver alosaren te hureaven-pe.
„O modo sar le coaver hureavenas-pe hai sicavenas de avreal peradea-ma” (Ușten!, 22 decembria 2003)
Poate că fal-tu
PUȘIMATA ȘIUTINE BUTIVAR
So si o studio biblico le Martorența le Iehovasche?
Ande cado studio biblico gratuime le Martorența le Iehovasche, daștis te folosis orisavi Biblia cames. Daștis te achares ca o studio sea chi familia sau oricas cames.
