О Иисусо сытярэлас, кай исин кати ек чачуни вера. Кацави вера, када сар дром, саво андярэл каринг и вечно жызня. О Иисусо ԥэндя, кай кадэва дром най всаворэ виарақэн (Матфея 7:14). Лэ Дэвлэсти чалёл, кала о мануш тэлёл лэсти кати кадя, сар пистромэ андэ лэско Алав, андэ Библия. Всаворэ мануша, савэ кадя тэлён лэ Дэвлэсти, андэ ек вера. (Адиносар Иоанна 4:23, 24; 14:6; Эфесянам 4:4, 5.)

Дик видео «Чалён ли лэ Дэвлэсти всаворэ веры?».

О Иисусо ԥэндя, кай и хохавнэ пророкоря пэрэбандярэна о чачимос, савэсти во сытярэлас. Но най вся и время вушэро тэ ӷатярас кацавэ манушэн. Васо? Важ кода кай вонэ ԥэнэн пэ пэстирэ қандиря христиански и гиндон, кай вонэ жан пала Христос. Но сар тоди тэ полас, кай и чачуни вера, ай кай и хохавни? Кати андэ чачуни вера и мануша терэн кода, со терэлас о Иисусо и андярэн пэс кадя, сар во. (Адиносар Матфея 7:13—23.)

Подам дума пала панч маменторя.

• И чачунэ христианоря патян, кай и Библия, када лэ Дэвлэско Алав. Вонэ терэн вся, кай тэ жувэн па библейски принцыпоря. Важ када и чачуни вера на шолпэ пэ авэр веры, андэ савэ тэлён лэ Дэвлэсти кадя, сар ԥэнэн и сытярэн и мануша (Матфея 15:7—9). Кай и чачунэ христианоря и дума на розжалпэ ла диласа. (Адиносар Иоанна 17:17; 2 Тимофею 3:16, 17.)

•   И чачунэ лэ Христостирэ ученикоря стон патив по алав лэ Дэвлэско, Иегова. О Иисусо часто ԥэнэнас лэ Дэвлэско алав, кала дэлас дума лэ манушэнца. Кадя во сыкавэлас патив каринг лэско алав. Во росԥэнэнас лэ манушэнди важ о Дэл и сытярэлас лэн тэ мангэнпэ пала кода, кай лэ Дэвлэско алав тэ авэл свынто (Матфея 6:9). Ко адес росԥэнэн пала лэ Дэвлэско алав котэ, кай ту жувэс? (Адиносар Иоанна 17:26; Римлянам 10:13, 14.)

• И чачунэ христианоря росԥэнэн пала лэ Дэвлэско Царство. О Дэл бишалдя лэ Иисусос тэ росԥэнэн и лащи новость пала Царство. Кати о Царство улэла вся о ԥаримос и биды, савэ исин кай и мануша. Вся и жызня жы кай пэстири смэрть о Иисусо росԥэнэнас пала кадэва Царство (Луки 4:43; 8:1; 23:42, 43). Во ԥэндя, кай лэстирэ ученикоря терэна кадяжэ. Ко адес, сар о Иисусо, ԥирэн и росԥэнэн пала лэ Дэвлэско Царство? (Адиносар Матфея 24:14.)

• Лэ Иисусостирэ ученикоря ритярдён май дур лэ найлашимастар, саво исин андэ люма. Вонэ на ӷулен андэ политика и на жан против власть (Иоанна 17:16; 18:36). Кадяжэ вонэ на терэн найлашимос и билажавардимос, саво исин андэ люма. (Адиносар Иакова 4:4.)

• И чачунэ христианоря фартэ любин ек еқэс. И Библия поможысардя лэнди тэ любин всаворэ манушэн анда разни нацыи. И хохавнэ веры часто подритярэн и войны, но и чачунэ христианоря отԥэндён када тэ терэн (Михей 4:1—3). Кадяжэ, кай тэ поможын лэ манушэнди и тэ подритярэн лэн, вонэ тратин пэстирэ ловэ и время, и на родэн нисави выӷода. (Адиносар Иоанна 13:34, 35; 1 Иоанна 4:20.)

Ко андэ вся сытярэл па Библия? Ко стол патив по алав лэ Дэвлэско, Иегова? Ко росԥэнэн пала кода, кай кати лэ Дэвлэско Царство улэла вся о ԥаримос и биды, савэ исин андэ люма? Анда сави вера и мануша фартэ любин ек еқэс и на подритярэн и войны? Сар ту гиндос, пала кастэ катэ жал и дума? (Адиносар 1 Иоанна 3:10—12.)