УРОКО 8
Васо о Дэл домэкэл о найлашимос и биды?
1. Катар ляпэ о найлашимос?
О Дэл ужэ бут время домэкэл, кай и мануша тэ правин, и драго дицэля, кай и мануша нэ моӷут екжэнэ тэ улэн вся о ԥаримос и биды
О найлашимос жыля тоди, кала о Сатана пэрво разо хохадя. Спэрва о Сатана сас совершэно анӷело, но во «на ашэляпэ андо чачимос» (Иоанна 8:44). Во закамля, кай лэсти тэ тэлён сар лэ Дэвлэсти, хоть и тэ тэлён трэбуй кати лэ Создателёсти. О Сатана обдилярдя ла пэрвона жувля, ла Ева, и вой кангля лэс, ай най лэ Дэвлэс. О Адамо заля латири риг. Кода, со витидя о Адамо, андя каринг и биды и смэрть. (Адиносар Бытие 3:1—6, 19.)
Кала о Сатана подмардя ла Ева тэ на кандэл лэ Дэвлэс, во жыля против лэ Дэвлэстири власть. Бут мануша залинэ лэ Сатанастири риг и отԥэнделэ, кай о Дэл тэ авэл лэнго Правителё. Кадя о Сатана ля тэ правий кадэла люмаса. (Адиносар Иоанна 14:30; 1 Иоанна 5:19.)
2. Сас ли варисо най кадя андэ кода, со создал о Дэл?
Вся, со терэл о Дэл, совершэно. Важ када спэрва и мануша и анӷелоря моӷли андэ вся тэ кандэн лэ Дэвлэс (Второзаконие 32:4, 5). Но инке о Дэл дя амэнди свобода, кай амэ екжэнэ тэ витидас. Кадя амэ можэм тэ сыкавас, кай амэ кандас лэс, важ кода кай любисарас. (Адиносар Иакова 1:13—15; 1 Иоанна 5:3.)
3. Васо о Дэл идоси домэкэл о найлашимос?
Пэ дэсави время о Иегова домэкля, кай и мануша тэ жан против лэстири правления. Но васо? Кай тэ сыкавэл, кай кала и мануша лэна екжэнэ тэ правин, када на анэна нисаво лашимос (Экклезиаст 7:29; 8:9). И када драго дицол важ вся и время, скати жувэн и мануша. Ни кай ек правителё на вижыля тэ улэл о ԥаримос и биды. (Адиносар Иеремия 10:23; Римлянам 9:17.)
Лэ манушэндири правления анэн ԥаримос, ай кала правий о Дэл, када анэн ек о лашимос (Исаия 48:17, 18). Йто о Иегова стерэла кадя, кай ни ек мануш на лэла тэ правий. Пэ ԥув жувэна кати кодэла, ко витидя лэ Дэвлэс пэстирэ Правителёса (Исаия 11:9). (Адиносар Даниил 2:44.)
Дик видео «Васо о Дэл домэкэл ԥаримос и биды?».
4. Со амэнди кодэлэстар, кай лэ Дэвлэстэ исин терпения?
О Сатана ԥэндя, кай и мануша кандэн лэ Дэвлэс важ кода, кай лэнди варисо трэбуй лэстар, ай най важ кода, кай любин лэс. Камлоп ту тэ сыкавэс, кай када хохаимос? Ту можэш када тэ стерэс! Кай о Дэл исин терпения и важ када кажно андар мэндэ можэт тэ сыкавэл, кастири правления во витидэл, лэ манушэндири чи лэ Дэвлэстири. Кода, со амэ витидям, дицол па амари жызня. (Адиносар Иов 1:8—12; Притчи 27:11.)
5. Сар тэ сыкавас, кай о Дэл амаро Правителё?
Кода, со амэ витидас, сыкавэл, камас амэ, кай о Дэл тэ авэл амаро Правителё чи най
Кай тэ сыкавас, кай о Дэл амаро Правителё, амэнди трэбуй тэ виарақас и чачуни вера, сави сытярэл тэ жувас па Библия (Иоанна 4:23). Трэбуй тэ на ӷуляс андэ политика и андэ войны. Кадэлэса амэ сыкаваса, кай амэнди на чалёл лэ Сатанастири правления. Кадя терэлас екжэно о Иисусо. (Адиносар Иоанна 17:14.)
О Сатана, сар правителё, терэл вся, кай о билажавардимос и авэр найлашимос тэ дицол лащя ригатар. Если амэ на жувас кадя, сар всаворэ, дэко анда родо и друӷоря моӷут тэ приасанпэ амэндар и дажэ тэ на дэн амэнди тэ сытювас па Библия (1 Петра 4:3, 4). Важ када трэбуй тэ витидас, кастири дружба амэнди май куч. Ласа амэ тэ родас друӷонэн машкар кодэла, ко любий лэ Дэвлэс и тэ жувас па лэстирэ годявэрнэ законоря? Если амэ заласа лэ Дэвлэстири риг, амэ доԥэнаса, кай о Сатана хохавно и кай и мануша моӷут тэ кандэн лэ Дэвлэс, дажэ кала фартэ ԥарэс. (Адиносар 1 Коринфянам 6:9, 10; 15:33.)
Лэ Дэвлэстири любовь каринг и мануша доԥэнэн, кай о найлашимос и биды будэр на авэна. Тэ жан лэ Дэвлэстирэ дромэса, када со май лащи жызня. Кодэла, ко патян андэ када, лэна тэ жувэн вечно пэ ԥув. (Адиносар Иоанна 3:16.)
