Мэ арақаделэм и вибарелэм паша форо Рим. Котэ жувэнас чорорэ мануша, савэ терэнас ԥари бути. Мэрни жызня на сас, сар ядин. Мэ пэстиря да никала на диқлэм. Ай лэ дадэса амэ на ладисарасас. Ман сытярэлас и вулица.

Кала манди инке на сас дэш бэрш, мэ лэм тэ чорав. Ай в 12 мэ пэрво разо нашлэм цэрал. О дад най еқварэс ман залэлас анда ваздии. Мэ вся и время всаворэнца спорисававас, сымас ӷрубо, мандэ сас холи пэ вся парни люма. Кала манди сас 14 бэрш, мэ на совсем ужылэмтар цэрал. Мэ лэм тэ прилав наркотикоря и тэ жував пэ вулица. Тэ ратярав манди сас най кай. Важ када мэ заӷулявас андэ чужи машыны, ай тэсара жавас тэ халадював каринг о фантано.

Мэ лэм профессионально тэ чорав, най кати пэ мелочь, но и лэм тэ обчорав квартиры и цэра. Мэ ашэлэм ашунгло машкар дэсавэ мануша и ман прилинэ андэ ашунгли банда. Важ кода кай мэ сымас буйно и вспыльчиво, мэ ашэлэм авторитето андэ кадэя банда. Мэ вся и время паша пэстэ ԥирававас пистолето. Ай пэ рят ставас лэс тала шэран. Мэ сымас жэстоко, акушаваспэ, теравас билажавардимос, чоравас, прилавас наркотикоря. Када сас мэрни жызня. Ман вся и время родэнас и рая. Ман най еқварэс астарэнас и бэшарэнас.

Еқварэс, кала мэ на бэшавас андо бар, мэ авелэм каринг мэрни биби. Каринг кодэя время, вой и латирэ дуй бэяцэ ашэлэ лэ Иеговастирэ свидетеля. Вонэ ман ақардэ пэ собрания и мэ жылэм, важ кода кай камлэм тэ уӷанав, со котэ. Андо Зало Царство мэ ԥэндэм, кай бэшава кати паша вудар, кай тэ диқав всаворэн, ко авэл. Канешно, паша мандэ сас о пистолето.

Кода, со мэ додиқлэм пэ кодэя собрания, парудя мэрни жызня. Сэрав, мэ погиндосардэм, кай, ԥэнэса, мэ попэлэм пэ авэр планета. Мэ диқлэм, кай вонэ сас ради, кай мэ авелэм. Идоси нащи бистрав и доброта, сави сас андэ лэндирэ яқа. Мэ кацаво никала на диқлэм.

Мэ лэм тэ изучаю и Библия лэ Иеговастирэ свидетелёнэнца. Со май бут мэ уӷанавас, со май фартэ полавас, кай манди трэбуй тэ парував вся мэрни жызня. Ман ля лэ одестар кода, со пистромэ андэ Притчи 13:20: «Ко ԥирэл кодэлэнца, ко мудро, ашэла мудро, ай ко сԥандёлпэ найгодявэрнэнца, попэрэла андэ бида». Мэ полэм, кай манди трэбуй сас тэ ашавав и банда. Када сас найвушэро, но лэ Иеговаса, мандэ када вижыля.

Мэ андэ вся камавас тэ авав вужо. Манди трэбуй сас бут зор, кай тэ мэкав и цыӷарки и наркотикоря. Мэ отшындэм пэстирэ лунги бал и вилэм и чея анда кан, и парашэлэм тэ акушавпэ. Пэрво разо андэ жызня мэ лэм пэс тэ ритярав андэ вас.

Манди никала на чалёлас тэ адиносарав и тэ сытював. Важ када манди сас фартэ ԥарэс тэ авав внимательно, кала манца проандярэнас изучения, но мэ старался. Мэ май фартэ лэм тэ любисарав лэ Иеговас. И варисо андэр мандэ ля тэ парудёл. Мэрни совесть ля ман тэ хал. Мэ дэкала гиндосаравас, кай о Иегова ман на простия, важ кода кай мэ стердэм бут найлашимос лэ манушэнди. Андэ кацавэ маменторя, мэ адиносаравас пала Давидо. Сар о Иегова простисардя лэстирэ ӷрехоря. И кадэлэстар манди ашэлас май вушэро по ди (2 Самуила 11:1—12:13).

Инке, со манди сас ԥарэс, када тэ росԥэнав пала Дэл па цэра (Матфея 28:19, 20). Ман шолас андэ потос, кала гиндосаравас, кай додиқава кодэлэн, касти мэ стердэмас вэрыто. Но прожыля время, мэ парашэлэм тэ дарав. Акана мэ фартэ лошало, кай моӷу тэ росԥэнав аврэнди пала амаро небесно Дад, саво любий тэ простий.

Кода, кай мэ уӷанглэм лэ Иеговас, спасысардя манди жызня. Бут анда кодэла, ко сас манди друӷоря, мулинэ или бэшэн андо баруно. Акана мэ ӷанав, васо тэ жував. И на дарав кодэлэстар, со авэла. Мэ сытелэм тэ кандав и тэ ритярав пэс андэ вас. И ашэлэм найӷордо. Мэ лэм всаворэнца тэ обжавпэ драго. Мандэ бахтало ери, лащи хулаи, савя ақарэн Кармен. Амэ ласа поможысарас аврэ манушэнди тэ уӷанэн и Библия. Када анэн амэнди бари лош.

Ай инке мэ чесно затерав. Дэкала мэ зажав андо банко, но акана най лэ пистолетоса, ай ла вадраса и ла швабраса.