4 | Библейски советоря, савэ поможын
АНДЭ БИБЛИЯ ԤЭНЭНПЭ: «Всаворэ алава андэ Писания... лашэ» (2 ТИМОФЕЮ 3:16).
Со када сыкавэл?
И Библия — када най медицынско справочнико. Но андэр латэ исин лашэ советоря, кадяжэ и важ кодэла, кастэ исин проблемы лэ зорэса через о психическо насвалимос. Роздиқам дэсавэ кацавэ советоря.
Сар када можэт тэ поможый?
«Най лэ зоралэнди трэбуй о врачо, ай лэ насвалэнди» (МАТФЕЁ 9:12).
Андэ Библия ԥэнэнпэ, кай дэкала амэнди трэбуй личения кай и врачоря. Бут касти ашэля фэдэр, кала вонэ уӷанглэ май бут пала пэско психическо насвалимос и жылэ кай о врачо.
«И зарядка анэн найбари польза важ и тила» (1 ТИМОФЕЮ 4:8).
Кала амэ диқас пала пэско физическо зор, и о психическо зор можэт тэ ашэл май лашо. Терэн зарядка, хан правильно хамос и висовэнпэ.
«О радосно ди личий, сар лашо драб, ай оди, савэсти фартэ ԥарэс, залэл о зор» (ПРИТЧИ 17:22).
Кала адиносарас анда Библия и алава, савэ подритярэн, и стас цэли, савэ можэм тэ домардювас, када дэл амэнди зор. Если амэ старысавас пэ вся тэ диқас лащя ригатар и патяс, кай англэ вся авэла драго, тоди када поможыя тэ борисавас, кала исин психическо насвалимос.
«И мудрость кодэлэ манушэндэ, савэ сэжи» (ПРИТЧИ 11:2).
Можэт тутэ на хутилэл зор тэ терэс вся, со ту камэс. Важ када прилэ помощь аврэндар. И друӷоря и чаче камэн тути тэ поможын, но, можэт, на ӷанэн, сар именно. Важ када росԥэн лэнди, со тути трэбуй, но на аштяр лэндар фартэ бут. Ав блаӷодарно пала любо помощь.
Со ԥэнэн кодэла, касти поможысардя и Библия?
«Мэ полавас, кай манца варисо най кадя, важ када мэ жылэм кай о врачо, и во ԥэндя, саво мандэ насвалимос. Када поможысардя тэ полав, со манца терэлпэ, и тэ уӷанав, сар тэ личисавав» (Нико́ул a, савятэ биполярно ростройство).
«Амэ ла хулаяса кажно тэсара адиносарас и Библия, и када поможый манди тэ гиндосарав пала лашимос. Андэ деса, кала манди фартэ ԥарэс, мэ всегда виарақав андэр латэ алава, савэ ман подритярэн» (Пи́тэро, савэстэ депрессия).
«Манди сас лажаво тэ росԥэнав аврэнди пала кода, со манца терэлпэ. Ек мэрни пашутни подруӷа драго виашундя ман и поля. Блаӷодаря лати мэ полэм, кай мэ най екжэни и манди ашэля пэ бутэстэ май фэдэр» (Чи Ю, савятэ ростройство пищевого поведения).
«И Библия поможысардя манди тэ полав, кала тэ терав бути, ай кала тэ отцыював. Латирэ мудри алава поможын манди, кала мэ ростроисавав» (Тимоти, савэстэ обсессивно-компульсивно ростройство).
a Дэсавэ манушэн на ақарэн кадя, сар катэ пистромэ.
