Иоано 14:1-31
14 «Мэк тумаро ди на́ замардёл даратар. Патян андо Дэл и андэр мандэ патян.
2 Андэ мэрнэ Дадэско цэр исин бут цэра, кай тэ жувэн. Ай тэ авелоп када най кадя, мэ ԥэндоп тумэнди, важ кода кай мэ жав тэ стерав кадя, кай тумэндэ тэ авэл ҭан.
3 Кала мэ жава и стерава, кай тумэндэ тэ авэл ҭан, мэ рисавава и залава тумэн каринг пэстэ, кай и тумэ тэ авэн котэ, кай мэ.
4 Тумэ ӷанэн о дром интя, каринг мэ жав».
5 О Фама́ ԥэндя лэ Исусости: «Учителё*, амэ на ӷанас, каринг ту жас. Катар амэнди тэ ӷанас интя о дром?»
6 О Исусо ԥэндя: «Мэ — дром, чачимос и жызня. Кати через мандэ можно тэ пашон* каринг о Дад.
7 Если тумэ ӷанэн ман, тоди ӷанэн и мэрнэ Дадэс. Акана тумэ лэс ӷанэн и диқлэ лэс».
8 О Фили́по мангля лэстар: «Учителё, сыкав амэнди лэ Дадэс, и амэнди када хутила».
9 О Исусо ԥэндя лэсти: «Фили́по, мэ тумэнца ужэ скати время и ту идоси ман на ӷанэс? Кодэва, ко диқля ман, диқля и лэ Дадэс. Васо жэ тоди ту мангэс: „Сыкав амэнди лэ Дадэс“?
10 Ту чаче на патяс, кай мандэ ек гиндо лэ Дадэса и кай лэ Дадэстэ ек гиндо манца? Кода, со мэ ԥэнав тумэнди, мэ ԥэнав най корко пэстар — када о Дад, савэстэ ек гиндо манца, терэл пэстири дила через мандэ.
11 Патян манди, кай мандэ ек гиндо лэ Дадэса и кай лэ Дадэстэ ек гиндо манца. Ай если тумэ на патян манди, тоди патян мэрня дилати, сави мэ терав кадя, сар камэл во.
12 Патян: кодэла, ко патял андэр мандэ, лэна тэ терэн кацави жэ дила, сави и мэ терав. Вонэ стерэна дажэ май бари дила, важ кода кай мэ жав каринг о Дад.
13 И со тэ на манглоп тумэ через мэрно алав, мэ стерава када, кай о Дад тэ ашэл ашунгло через о Шаво.
14 Если мангэна пала варисостэ через мэрно алав, мэ када стерава.
15 Если тумэ любин ман, тоди тумэ лэна тэ ритярэн мэрно законо.
16 Мэ мангава лэ Дадэс, и во дэла тумэнди аврэ помошникос*, саво авэла тумэнца вечно, —
17 када лэ чачимаско зор. Кадэва зор не можэт тэ авэл кай и люма, важ кода кай вой на диқэл лэс и на ӷанэн. Ай тумэ ӷанэн пала лэстэ, важ кода кай во тумэнца и андэр тумэндэ.
18 Мэ на ашавава тумэн екжэнэн* и па чачимастэ авава каринг тумэндэ.
19 Инке набут, и ман и люма будэр на диқэла, но тумэ ман диқэна, важ кода кай мэ жував и тумэ лэна тэ жувэн.
20 Андэ кодэва дес тумэ уӷанэна, кай мандэ ек гиндо мэрнэ Дадэса, тумэндэ ек гиндо манца и мандэ ек гиндо тумэнца.
21 Ко прижанэн и ритярэл мэрно законо, во любий ман. Ай кодэлэс, ко любий ман, лэла тэ любий мэрно Дад, и мэ тожэ лава лэс тэ любисарав и поможысарава лэсти тэ ӷанэн ман».
22 Тоди о Иу́да (най о Искарио́то) ԥэндя лэсти: «Учителё, сар када? Васо ту камэс, кай тут тэ ӷанас амэ, ай най о миро*?»
23 О Исусо ԥэндя: «Ко любий ман, во лэла тэ приритярдёл мэрнэ алавэнди, и мэрно Дад лэла тэ любий лэс. Амэ лэ Дадэса аваса каринг лэстэ и ласа тэ жувас лэса.
24 Ко на любий ман, во на приритярдёл мэрнэ алавэнди. Ай и алава, савэ тумэ ашунэн, — най мэрнэ, ай лэ Дадэстирэ, саво бишалдя ман.
25 Мэ ԥэнав тумэнди вся када, пока мэ тумэнца.
26 О помошнико, о свынто зор, саво о Дад дэла мэрнэ алавэстар, сытярэла тумэн всаворэсти и поможыя нисо тэ на бистрэн анда мэрнэ алава.
27 Мэ ужавтар, но тумэндэ вся и время авэла спокойно жызня, сави мэ дав. Мэ дав тумэнди спокойно жызня, но най кадя, сар дэл и люма. Мэк тумаро ди на́ дарал и на́ загрыжойпэ.
28 Тумэ ашундэ, со мэ ԥэнавас тумэнди: „Мэ ужав и рисавава каринг тумэндэ“. Если тумэ ман любин, тоди трэбуй тэ лошавэн, кай мэ жав каринг о Дад, важ кода кай о Дад май баро мандар.
29 Мэ ԥэндэм тумэнди пала када май данглал, кай, кала када терэлапэ, тумэ тэ патян мэрнэ алавэнди.
30 Мандэ ужэ на ашэляпэ время тэ дав дума тумэнца, важ кода кай жал о правителё, кастэ андэ вас кадэя люма*. Во най хулай пэр мандэ.
31 Но и люма трэбуй тэ уӷанэн, кай мэ любисарав лэ Дадэс. Важ када мэ терав кадя, сар ԥэндя манди о Дад. Ущен, авэнтар катар.
Сноски
^ Или «Баро Хулай». Катэ и май дур андэ кадэя ӷлава.
^ Или «тэ авэн».
^ Или «кодэлэс, ко дэла зор». О Исусо ԥэнэн пала свынто зор, сар пала варисо жундо.
^ Или «сар лэ бэятонэн би лэ Дадэско».
^ Или «и люма».
^ Или «хулай пэ кадэя люма».
