Дила 7:1-60
7 О ӷлавно рашай пушля: «Када чаче?»
2 О Стефа́но ԥэндя: «Ԥрала и пативалэ мануша, ашунэн. Англа кода сар амаро дад о Авраамо ля тэ жувэл андо Хара́но, амаро ашунгло Дэл сыкаделя лэсти андэ Месапата́мия
3 и ԥэндя: „Ашав пэско краё и лэ родос и жа интя, каринг мэ тути сыкавава“.
4 О Авраамо ужылятар па пэстирэ краёря, кай жувэнас и халдеёря, и ля тэ жувэл андо Хара́но. Ай кала муля лэско дад, о Дэл ԥэндя лэсти тэ ужал котар и тэ пэрэжал пэ кадэва краё, кай тумэ щас жувэн.
5 Но андэ кодэя время лэсти катэ на дорэсляпэ лэ Дэвлэстар нисаво котор ԥув, дажэ пэ палматэ. И всаек о Дэл дя алав, кай дэла кадэва котор ԥув лэсти и лэстирэ бэятонэнди, хоть пэ кодэва маменто во сас бездетно.
6 О Дэл ԥэндя, кай лэ Авраамостирэ бэяцэ лэна тэ жувэн пэ чужи краёря, лэн стерэна рабонэнца и лэнди на дэна жызня 400 бэрш.
7 „Но мэ спушава лэ народостар, саво стерэла лэн рабонэнца, — ԥэндя о Дэл, — и посли када вонэ ужана котар и лэна тэ терэн мэрни дила пэ кадэва ҭан“.
8 О Дэл кадяжэ стердя лэ Авраамоса о доӷоворо, па саво во и всаворэ лэстирэ шавэ трэбуй тэ опшындён. Кала кай о Авраамо арақаделя о Иса́ко, во опшындя лэс по восьмо дес. Кай о Иса́ко арақаделя о Иа́ково, ай кай о Иа́ково — 12 шавэ*, савэндар жылэ 12 коленоря.
9 Лэ Иосифостирэ ԥрала завидуинас лэсти и важ када битиндэ лэс андо Египто. Но о Дэл сас лэ Иосифоса
10 и фэрисардя лэс всаворя бидатар. Во дя лэсти годявэрнимос и поможысардя тэ затерэл патив англа фараоно, англа египецко царё. О фараоно стодя лэс тэ правий андо Египто и тэ диқэл пала лэско цэр.
11 Пэ вся Египто и пэ вся Ханаа́но дя и бида — заляпэ о боқалимос, и амарэ ԥурэнди найсо сас тэ хан.
12 О Иа́ково ашундя, кай андо Египто исин зэрно, и бишалдя интя амарэ ԥурэн.
13 Ай кала лэ Иосифостирэ ԥрала до дуйто авелэ андо Египто, во ԥэндя лэнди, ко во сыно, и о фараоно уӷангля пала лэ Иосифоско ери.
14 Тоди о Иосифо ақардя андо Египто пэстирэ дадэс лэ Иаковос и всаворэ́ ерес — 75 манушэн.
15 Кадя о Иа́ково ля тэ жувэл андо Египто. Котэ во муля, и котэ жэ мулинэ и амарэ ԥурэ.
16 Лэндирэ кокаля пэрэандярдэ андо Шэхе́мо и стодэ андэ моӷилка, сави о Авраамо тиндя* кай лэ Хаморостирэ шавэ.
17 Пашолас и время, кала трэбуй сас тэ ашэл кадя, сар о Дэл дя алав лэ Авраамости. Лэ Иаковостирэ бэяцэ андо Египто ашэнас май зоралэ, и лэн ашэлас май бут.
18 Но андо Египто ля тэ правий авэр царё, саво на ӷанэнас лэ Иосифос.
19 Во хытрияса обжаласпэ амарэ народоса и заставияс амарэ ԥурэн тэ вишон лэ ԥарнэндирэ бэятонэн, кай вонэ тэ на вижувэн.
20 Андэ кодэя время арақаделя о Маисеё. Во сас фартэ шукарно*, и трин шон пала лэстэ диқэнас андо цэр кай лэско дад.
21 Ай кала лэс прижыляпэ тэ мэкэн, лэс арақля лэ фараоностири щей и барярдя сар пэстирэ шавэс.
22 О Маисеё сытеля всаворэсти*, сости сытярэнас андо Египто, и сас састо по алав и пэ дила.
23 Кала лэсти ашэля 40 бэрш, во закамля тэ диқэл, сар жувэн лэстирэ ԥрала, и израильтя́норя.
24 Кала о Маисеё додиқля, кай еқэса андар лэндэ обжанпэ несправедливо, во зашутяпэ пала лэстэ и, кай важ лэстэ тэ рий, умардя лэ египтянинос.
25 Во гиндояс, лэстирэ ԥрала полэна, кай о Дэл камэл тэ спасый лэн через лэстэ, но вонэ када на полинэ.
26 Пэ авэр дес во авеля каринг лэндэ и додиқля, сар дуй израильтя́норя марэнпэ. Кай тэ помирий лэн, во ԥэндя: „Тумэ жэ ԥрала. Состэ тумэ марэнпэ?“
27 Но кодэва, ко марэлас пэстирэ ԥралэс, отшутя лэ Маисеёс и ԥэндя лэсти: „Ко стодя тут амарэ барэдэрэса и сындомареса?
28 Можэт, ту камэс тэ умарэс и ман, сар арати умардян лэ египтянинос?“
29 Кала о Маисеё ашундя када, во унашля и ля тэ жувэл андо Мадиа́но. Котэ лэстэ арақаделэ дуй шавэ.
30 Прожылэ 40 бэрш, и андэ пустыня паша плай Сина́ё лэсти через и яг сыкаделя о анӷело, кала ԥаболас о кусто.
31 Кала о Маисеё додиқля када, во фартэ удивисайля. Ай кала во поджыля май пашэ, кай май драго вся тэ роздиқэл, ашунделя лэ Иеговаско* ӷолосо:
32 „Мэ тирэ ԥурэнго Дэл, лэ Авраамоско, лэ Исакоско и лэ Иаковоско Дэл“. О Маисеё затиносайля даратар и на ля тэ роздиқэл о кусто.
33 О Иегова ԥэндя лэсти: «Злэ и сандали, важ кода кай о ҭан, пэ саво ту тердёс, — када свынто ԥув.
34 Мэ диқлэм, кай мэрнэ народости андо Египто на дэн жызня, ашундэм, сар во ровэл лэ ԥаримастар, и змэклэмпэ тэ спасысарав лэс. Важ када мэ бишалав тут андо Египто“.
35 Вонэ на прилинэ лэ Маисеёс и ԥэндэ: „Ко стодя тут барэдэрэса и сындомареса?“ Но када лэс о Дэл бишалдя сар барэдэрэс и спасителёс через о анӷело, саво сыкаделя лэсти андо кусто.
36 Када во виандярдя лэн, кала терэлас чудеса и удивительно дила андо Египто, паша Лоли моря, ай потом 40 бэрш андэ пустыня.
37 Када о Маисеё ԥэндя лэ израильтянонэнди: „О Дэл дэла тумэнди анда тумарэ ԥрала пэстирэ особонэ манушэс, кацавэс жэ, сар мэ“.
38 Када во сас андэ пустыня лэ израильсконэ народоса, амарэ ԥурэнца. Када лэса дэлас дума о анӷело по плай Сина́ё, и када лэсти о Дэл дя вечни* алава, кай тэ пэрэдэл тумэнди.
39 Амарэ ԥурэ отԥэнделэ лэс тэ ашунэн, одбанделэ лэстар и закамлэ тэ ринпэ андо Египто.
40 Вонэ взвисайлэ каринг о Аро́но: „Стер амэнди дэвлэн, савэ андярэна амэн, важ кода кай амэ на ӷанас, со тердяпэ кадэлэ Маисеёса, саво виандярдя амэн анда Египто“.
41 Андэ кодэла деса вонэ стердэ гуруворэс, андэ́ жэртва кадэла статуэткати и стодэ празнико.
42 Важ када о Дэл одбанделя лэндар и домэкля, кай вонэ тэ тэлён лэ қамэсти, лэ шонэсти и лэ черӷаенди по небо*, сар пистросардэ лэ Дэвлэстирэ особи мануша: „Израильтя́норя, хэба манди тумэ 40 бэрш анэнас жэртвы андэ пустыня?
43 Най, тумэ ԥиравэнас пэса лэ Малохостири катуна и лэ дэвлэстири лэ Ремфаностири черӷай — лэ дэвлэндирэ статуэтки, савэ тумэ стердэ, кай тэ тэлён лэнди. Важ када мэ бишалава тумэн тэ жувэн пала Вавило́но“.
44 Кай амарэ ԥурэ андэ пустыня сас свынто катуна, сави сыкавэлас, кай лэнца о Дэл. Кадэя катуна стердэ кадя, сар о Дэл ԥэндя и сыкадя лэ Маисеёсти.
45 Лэндирэ бэятонэнди дорэсляпэ кадэя катуна, и вонэ андэ́ ла пэса, кала лэ Ешуаса* авелэ по краё, кай жувэнас и народоря, савэн о Дэл видарадя лэндар. И вой котэ тердёлас жы каринг лэ Давидостирэ деса.
46 О Давидо уӷодисардя лэ Дэвлэсти и мангэлас лэ Иаковостирэ Дэвлэс, кай лэсти тэ випэрэл кацави бах тэ ваздэл важ лэстэ о цэр.
47 Но кадэва цэр построисардя о Саламоно.
48 Ай о Баро Дэл на жувэл андэ цэра, савэ строимэ лэ манушэндирэ вастэнца, сар ԥэнэн лэ Дэвлэско особо мануш:
49 „О небо — мэрно троно, ай и ԥув — ҭан важ мэрнэ пэрнэ. Саво жэ цэр тумэ важ мандэ ваздэна? — ԥэнэн о Иегова. — И кай мэ моӷу тэ жував?
50 Хэба най мэрнэ вастэнца вся када стердо?“
51 Найкандинэ мануша барунэ* одеса и ԥандадэ канэнца! Тумэ вся и время жан против о свынто зор. Тумэ терэн кода жэ, со терэнас и тумарэ ԥурэ.
52 Кас анда лэ Дэвлэстирэ особи мануша на ӷонинас тумарэ ԥурэ? Вонэ умардэ кодэлэн, ко ԥэнэнас, кай трэбуй тэ авэл о Свынто*, савэс тумэ придинэ и умардэ.
53 О Дэл дя тумэнди законо, саво сас пэрэдино через и анӷелоря, но тумэ на ритярэнас лэс».
54 Кала вонэ ашундэ када, вонэ кадя захоляйлэ, кай аж линэ тэ хан и данда.
55 Ай о Стефа́но, пэ саво сас о свынто зор, вазгля и яқа по небо и додиқля лэ ашунглэ Дэвлэс* и лэ Исусос, саво тердёл справа лэ Дэвлэстар.
56 Во ԥэндя: «Мэ диқав, сар ԥэрнаделя о небо, и диқав лэ манушэстирэ Шавэс, саво тердёл справа лэ Дэвлэстар».
57 Но вонэ заԥандадэ и кан, зацыписайлэ и динэ пэр лэстэ.
58 Вонэ виволочисардэ лэс пала форо и линэ тэ шон андэр лэстэ и бара. И мануша, савэ дошалярэнас лэс по сындо, шутэ пэстири ӥда паша тэрно мануш*, савэс ақарэнас Са́вло.
59 Кала андо Стефа́но линэ тэ шон и бара, во взвисайля каринг о Исусо: «Баро Хулай Исусо, мэрни жызня мэ отдав тути».
60 Во пэля пэ чанга и ӷромко ԥэндя: «Иегова, на́ дошаляр лэн андэ кадэва бэзэх» — и посли кадэла алава во муля*.
Сноски
^ Или, можэт, «О Исако стердя кода жэ лэ Иаковоса, ай о Иаково — пэстирэ шавэнца».
^ Или «важ сави о Авраамо дя руп».
^ Или «во сас шукарно андэ лэ Дэвлэстирэ яқа».
^ Или «всаворэ́ годявэрнимасти».
^ Ворта «жундэ».
^ Ворта «лэ небеснона халавдияти».
^ Када о Исусо Навино.
^ Ворта «найопшындэ».
^ Ворта «Правильно».
^ Или «лэ Дэвлэс и кода, сави бах лэстар марэл».
^ Или «паша пэрнэ лэ тэрнэ манушэстирэ».
^ Ворта «засутя».
