Si e Amperetsia le Devleski vareso kai ningeras ando ilo?
So phenel e Biblia
E Amperetsia le Devleski nai vareso kai le kristianuria ningeren ando ilo. a E Biblia sikavel ke e Amperetsia ando cheri la (Mate 4:17). Vi sikavel ke gata amperetsil de anda o cheri. Aida dikhas.
Ande Amperetsia le Devleski si manush kai amperetsin, manush kai len pe pala late, zakonuria ai e buki te kerdiol e voia le Devleski ando cheri ai pe phuv (Mate 6:10; Sicharimos [Apokalipsis] 5:10).
E Amperetsia le Devleski amperetsila pel “manush anda suako foro, them ai shib” anda e Phuv (Daniel 7:13, 14). O Del thodias e Amperetsia ai dias la e voia te ningerel le manushen, nai vareso kai alosaren le manush (Psalmo 2:4-6, E Nevi Viasta ai o Psalmo [ENV]; Isaías 9:7).
O Jesus phendias peske chache apostolenge ke sas te aven lesa ande Amperetsia ando cheri. Soske? Vo phendias te beshen pel tronuria, godo kamel te phenel te aven amperaturia le Jesusosa (Luk 22:28, 30).
E Amperetsia le Devleski mundarela ka peske dushmaia (Psalmo 2:1, 2, 8, 9; 110:1, 2, ENV; 1 Korintiana 15:25, 26).
E Biblia chi sikavel ke e Amperetsia kai si ando cheri amperetsil de anda o ilo le manushengo. Pala godo, e Amperetsia le Devleski nai vareso kai ningerelpe ando ilo. Numa so sikavel e Biblia si ke trobun te aresen ande amaro ilo le lashe viesti “pai amperetsia” vai “e vorba pa e amperetsia le Devleski” (Mate 13:19; 24:14).
So kamelas te phenel o Jesus kana phendias: “E Amperetsia le Devleski mashkar tumende”?
Uni manush chi aliaren mishto kai si e amperetsia le Devleski, ke but manush chi sikaven vorta so phendias o Jesus ando Luk 17:21. Gindin ke o Jesus kamelas te phenel ke e Amperetsia le Devleski si ando ilo le manushengo. Aida dikhas so mai phendias o Jesus te azhutil amen te aliaras mai mishto kako verseto.
Nashtilas te avel e Amperetsia le Devleski ando ilo le manushengo kai kamenas te mundaren ka o Jesus.
O Jesus phendias kakala vorbi kal fariseuria, uni bare rasha, kai mai angle gindisaile sar te mundaren les (Mate 12:14; Luk 17:20). Pala so phendias o Jesus, sas ande lengo ilo e Amperetsia le Devleski? No, ke o Jesus phendias lenge ke von sas pherdo “xoxaimos ai bezex” (Matei 23:27, 28, ENV).
E Biblia sikavel mishto so kamelas te mothol o Jesus kana phendias “e Amperetsia le Devleski mashkar tumende”. Pala godo e Amperetsia le Devleski sas “mashkar” le fariseuria. Sostar? Ke o Jesus, o alome katar o Del te amperetsil, sas kotse lentsa (Luk 1:32, 33).
a But khangeria sikaven ke e Amperetsia le Devleski si ando ilo le manushengo. Iek ejemplo si, ando Estados Unidos, e Convención de Bautistas del Sur phendias ke e Amperetsia le Devleski si kana “o Del amperetsil ando o ilo ai o traio le manushesko”. Ai o papa Benedicto XVI, ande lesko libro Jesús de Nazaret, phendias ke: “E Amperetsia le Devleski aresel kana o ilo ashunel”.
Shai avela plachal tu
BARE PRAME KAI SIKAVEL E BIBLIA
So si e Amperetsia le Devleski?
Kana o Jesus avilo pe phuv butivar dias duma pa e Amperetsia le Devleski. Ai pe but vriama le manush mangen ando rhugimos te avel godia Amperetsia.
