Ando 1949, murho dat kai sas ando Niamtso gelo ande Australia te rodel buki ande mineria ai kai keren luso (electricidad). Beshelas ando kimpo ando foro Victoria, kotse ansurisailo murha dasa. Me arakhadilem ando 1953.

Uni borsh mai angle murhi dei astardias te sikiol pa e Biblia le marturentsa le Jehovaske, pala godia de tsinorhara sikilem so phenel e Biblia. Ka murho dat nas leske drago chi iek religion. Vo sas iek manush kai joliavolas fuga. Makar murhi dei daralas lestar; voi chi meklias te sikiol pa e Biblia ke sas lake drago but so sikiolas. Kana murho dat nas khere voi sikavelas amen, murha phea ai man, so voi sikiolas. Phenelas amenge ke e Phuv sas te avel iek paraiso ai ke sas te avas veselime te kerasa so phenel e Biblia (Psalmo 37:10, 29, E Nevi Viasta ai o Psalmo [ENV]; Isaías 48:17).

Sar murho dat sas iek manush kai joliavolas fuga, kana sas man 18 borsh gelemtar kheral. Makar pakiavas man ande so sikilem de tsinorhara, chi lem opre so phenel e Biblia ai chi thodem ande murho traio so sikilem. Astardem te kerau buki ai te lasharau o luso andel minas angarengi ai kana sas man 20 borsh ansurisailem. Trin borsh mai angle arakhadili amari pervo shei, ai godo azhutisardias man te dau po gor so si le dieli mai bare ande murho traio. Zhanavas ke e Biblia shai azhutilas murha familia, pala godia astardem te sikiuau pa e Biblia le marturentsa le Jehovaske. Ka murhi rhomni nas lake drago le Marturia. Te na mai zhau kai kidenpe le Marturia phendias mange: mekes te sikios pa e Biblia vai zhastar kheral. Chi zhanavas so te kerau, pala godia kerdem so phendias mange ai meklem te dau duma le Marturentsa. La vriamasa dem po gor ke chi trobuvas te kerau godo.

Iek gies, le manush kai kerenas buki mantsa sikade mange patretsi ai videuria marime. Zhanavas ke nas vorta, numa nashtivas te mekau te dikhau ai aliaravas man doshalo. Seravas mange so sikilem ande Biblia ai zhanavas ke o Del sas joliariko pe mande. La vriamasa meklem te aliarau man gadia ai nashtivas te mekau te dikhau patretsi ai videuria marime.

Bish borsh durilem katar so sikadias man murhi dei. So keravas sikavelas so sas ande murho shero. Phenavas lashave ai dieli marime. So gindivas pa o sexo nas vorta ai makar simas ansurime, ankliavas avria zhuvliantsa. Iek gies dikhlem man pe oglinda ai gindisailem: “Ke zhungalo manush sim”. Chi kamavas man, ai chi aliaravas man vuzho.

Meklem man murha rhomniasa ai murho traio chi zhalas vorta. Pala godia rhugisailem ka o Jehova sa murhe ilesa. Astardem pale te sikiuau pa e Biblia makar nakhle 20 borsh. Murho dat mulo sas ai murhi dei sas marturo le Jehovasko.

Murho traio nas sar phenel e Biblia. Numa akana kamavas chachimasa te avel man e pacha kai o Del shinavel ande pesko suato. Chi mai kamavas te phenau lashave ai dieli marime ai te joliavau ande fuga. Meklem o traio zhungalo kai sas man, te khelau mange pe lovende, te piau pimos ai meklem te chorau ande buki kai sas man.

Le manush kai kerenas buki mantsa chi aliarenas sostar kamavas te parhudiuvau. Trin borsh thode zor pe mande te kerau so keravas de mai anglal. Te avela ke joliavavas vai phenavas dieli kai nas vorta, von phenenas mange: “Pale avilo o purano Joe!”. Godola vorbi dukhalas man but! Aliaravas ke chi keravas khanchi vorta.

Kai keravas buki sas but pornografia. Ka suako chaso tradenas peske patretsi marime. Thavas mandar te mekau godola prame, numa von kamenas te peraven man. Dem duma le Marturesa kai sikavelas man pa e Biblia te azhutil man, vo ashundias man kana phendem leske pa so nakhavas. Sikadias mange uni texturia ai vi sar shai kerau te na mai dikhau godola dieli. Ai phendias mange te rhugiu but ka o Jehova te azhutil man (Psalmo 119:37, ENV).

Iek gies kidem le manushen kai kerenas buki mantsa ai phendem lenge te den biaria ka dui manush kai kamenas te meken o pimos. Savorhe tsipisarde: “Sar te keras godo?! Von thon zor te meken o pimos!”. Pala godia phendem lenge ke vi me kamavas te mekau o traio kai sas man. De kin godo gies aliarde ke kamavas te mekau e pornografia ai mekle te keren mange dieli te kerau pale so keravas de mai anglal.

La vriamasa o Jehova azhutisardias man ai meklem palpale le dieli chorhe kai keravas. Ando 1999 boldilem sar marturo le Jehovasko. Naisiu ka o Jehova ke shai avel man iek traio veselime ai lasho.

Akana aliarau sostar ka o Jehova nai leske drago le dieli kai keravas. Sar iek lasho dat, kamelas te arakhel man katar le dieli nasul kai kerel e pornografia. Che vorta le suaturia kai si ando Proverbios 3:5, 6: “Pakia tu ando Jehova sa kire ilesa, ai na pakia tu ande so aliares. Ser tuke lestar ande sa so keresa, ai vo lasharela kire droma”. Le zakonuria la Bibliake na numa arakhen amen vi keren te zhal amenge mishto pe sa o traio (Psalmo 1:1-3, ENV).

Nas mange drago o traio kai sas man, numa akana aliarau man mishto ai si man pacha ando ilo. Si man iek traio vuzho, aliarau ke o Jehova si mantsa ai ke iertisardias mange. Ando borsh 2000 ansurisailem iekha zhuvliasa kai si Marturo kai bushelpe Karolin. Voi kamel ka o Jehova gadia but sar mande. Akana ande amaro kher si pacha. Aliaras amen veselime te avas ande iek familia vuzhi ai pherdo kamlimos.