LEKTIONA 03
Nai patsah ap kowa, hoi i bibla penella?
I bibla penell menge bud, hoi menge an maro djipen kanna un an o tsiro glan mende mishto hi. Bud millione patsenn kowa. Bud wawar kamenn ap sawo phuro koowa gar te patsell. Hoi hi tuha? Nai patseh tu, kai well men i shukar, bachtelo djipen? Dikas pal, hoske i bibla moldo hi, te patsas ap late!
1. Hi i bibla i parmissa?
I bibla penell, “har tchomone tchatchepah hi” (Sikepaskro 12:10). Joi rakerell pral morsha un djuwja, kai tchatchepah djiwan. Kola situatione an i bibla dan tchatchepah (Dik pal an Luka 1:3; 3:1, 2). Historikarja un Archeologarja tchinan an pengri budi pral bud menshe dran i bibla. Jon rakrenn ninna pral bud biblakre situatione, diwessa, forja un gaba.
2. Hi i bibla an maro tsiro gomme aktuell?
An ko tsiro, kai djinan i menshe gar bud pral koowa, har kanna i natura, his an i bibla tchinlo, har kowa tchatchepah hi. Bud menshe an ko tsiro nai patsan gar, kai hi kowa tchatcho, hoi i bibla penella. O menshengro goswepen an maro tsiro sikrella, kai hi kowa exakt jaake, har an i bibla tchinlo hi. Hoske? I laba an i bibla “atchenna hako tsireske” (Gilja 111:8).
3. Hoske nai patsah ap kowa, hoi i bibla glan wi penella?
Kola profetike laba a an i bibla rakrenn pral kowa, “hoi gomme gar his” (Jesaja 46:10). Bud historistike situatione wan i biblatar exakt jaake penlo, har kowa was. Ninna wan kola tsele probleme, hoi men an maro tsiro ap i phub hi, i biblatar glan wi penlo. An kaja lektiona dikah mer kanna ap shob profetike laba. Tu kreh bare jaka, har exakt jon hi!
RODAS DUREDER
Kanna dikeh, kai kowa, hoi an o menshengro goswepen an maro tsiro penlo wella, sikrella, kai i bibla o tchatchepen penella. Pash kola shob profetike laba, hoi kanna wenna, kreh tu bare jaka!
4. O menshengro goswepen sikrell, kai an i bibla o tchatchepen hi
An o phuro tsiro patsan bud menshe, kai hi i phub ap tchomone tchiddo. Dikenn o VIDEO.
Dik, hoi glan 3 500 bersha an o liil Hiob tchindes was. Dikenn pal an Hiob 26:7, un rakrenn khetne pral:
-
Hoske hi ko lab jaake interessant?
Glan ca. 200 bersha haiwan i menshe o ersto kopo har koi panjeskri systema djala. Kanna dik, hoi an i bibla glan bud serja bersha tchindes was. Dikenn pal an Hiob 36:27, 28, un rakrenn khetne pral:
-
Hoske hin kol laba pral i panjeskri systema jaake interessant?
-
Krenn kol dui biblakre laba tiro patsepen ap i bibla sorleder?
5. I bibla penas glan wi, hoi wella
Dikenn pal an Jesaja 44:27–45:2, un rakrenn khetne pral:
-
Hawe details penas i bibla 200 bersha glan ko tsiro, kai o foro Babilon peras?
I historia sikrella: An o bersh 539 glan i Christeste peras o persetiko rai Kirus peskre lurdentsa an o foro Babilon dre. Jon mukan o pani, hoi trul o foro his, ap i wawar rig te nashell. I wudja hins pre, jaake hunte kuran jon pen gar. An maro tsiro — budeder har 2 500 bersha — hi o foro Babilon gomme paash. Kanna dik, hoi i bibla glan wi penas.
Dikenn pal an Jesaja 13:19, 20, un rakrenn khetne pral:
-
Har sikrell pes, kai wan kal profetike laba tchatchepen?
Kol babilontike ruine an o iraktiko them
6. I bibla penas glan wi, hoi mer kau diwes ap i phub dikah
I bibla penell ap maro tsiro: “Pharo tsiro” (2. Timoteo 3:1). Dik, hoi i bibla pral o pharo tsiro glan wi penas.
Dikenn pal an Mateo 24:6, 7, un rakrenn khetne pral:
-
Hoi penell i bibla, har o pharo tsiro wi dikell?
Dikenn pal an 2. Timoteo 3:1-5, un rakrenn khetne pral:
-
Hoi penell i bibla, har i menshe an o pharo tsiro hi?
-
Hoi penals tu: Har hin i menshe an maro tsiro?
BUD PENENNA: “I bibla hi i parmissa un i legenda.”
-
Hoi hi tiri baresta argumenta, hoske tu ap i bibla patseh?
HOI KATE PENLO WAS
I historia, o menshengro goswepen un i profetike laba sikrenn: Mer nai patsah ap i bibla.
Hoi penals tu?
-
Hi i bibla i parmissa? Hi i bibla o tchatchepen?
-
Hawe laba an o menshengro goswepen sikrenn, kai hi an i bibla o tchatchepen?
-
Hoi penals tu: Penell i bibla, hoi o tsiro glan mende anella? Hoske peneh tu kowa jaake?
BUDEDER
Kate hatseh: Hi kowa, hoi i bibla penella, kowa, hoi o menshengro goswepen penella?
“Hi i bibla ninna an o menshengro goswepen tchatcho?” (I artikla online)
Kate nai drawereh, har o “pharo tsiro” hi
“6 profetike laba an i bibla: Jaake wan le an maro tsiro tchatcho” (O Gardeskro Kher, Mai 1, 2011)
Kate well tuke penlo, har i profetike laba pral o griechtiko them tchatcho wan.
Kate nai drawereh pral kowa, har profetike laba kran, kai i morsh ap i bibla patsella.
“Me patsum, kai della kek Dewel” (O Gardeskro Kher Nr. 5 2017)
a Te penell o Dewel glan wi hoi wella, hi kowa i profetiko lab.
