Η ΑΓΙΑ ΓΡΑΦΗ ΝΑΝΕ ΕΠΙΣΤΗΜΟΝΙΚΟΣ ΒΙΒΛΙΟΣ, ΑΛΛΑ ΒΑΚΕΡΕΛΑ ΠΡΑΓΜΑΤΑ ΣΟ ΝΑ ΤΖΑΝΕΝΑΣ-ΛΕΝ Ο ΤΖΕΝΕ ΑΖΟΜΑΝ ΣΟ ΓΡΑΦΙΝΤΙΛΙ. ΝΤΙΚΧΕΝ ΧΑΝΙΚ ΠΑΡΑΔΕΙΓΜΑΤΑ.

Κερντιλό ο σύμπαν;

Μπαρέ επιστήμονες πακιάνας ότι να κερντιλό ο σύμπαν. Ο πιο μπουτ όμως ακανά πακιάνα ότι κερντιλό. Η Γραφή βακερέλας-λες ανταβά ξεκάθαρα πριν τι λεν-λες αμπέρι ο τζενέ.—Γένεση 1:1.

Σαρ ισί η πφουβ;

Κο πουρανέ μπρεσά, μπουτ τζενέ πακιάνας ότι ισινέ ίσια. Πριν 2.500 περίπου μπρεσά, Μπαλαμέ επιστήμονες βακερένας ότι ισινέ στρογγυλή. Όμως, 300 μπρεσά πριν τι βακερέν-λες ανταβά, ο Ησαΐας βακερντάας ότι η πφουβ ισί «κύκλος», ντα χρησιμοποιηντάς εκ λέξη σο μπορίνελα επίσης τι βακέρντιβελ «σφαίρα».—Ησαΐας 40:22· υποσημείωση.

Χαλάντιβελα ο ουρανός;

Ο Αριστοτέλης, σο τζουβντιόλας πριν από περίπου 2.500 μπρεσά, σικλιαρέλας ότι σάντε η πφουβ χαλάντιβελα, ενώ ο ουρανός να κα μπορίνελας ποτές τι κερνιόλ ή τι χαλάντιβελ. Ανταβά πακιάνας-λες ο τζενέ για μπουτ μπρεσά. Αλλά πριν 100 μπρεσά, χάνικ επιστήμονες αγαντέ σο μανγκέλα τι βακερέλ ι εντροπία. Η εντροπία μανγκέλα τι βακερέλ ότι ο πράγματα είτε κο ουρανός είτε κι πφουβ, ισί κερντέ τι κερνιόν ή τι χαλάντιβεν. Εκ κατά επιστήμονες σο πακιάλας-λες ανταβά, ο Λόρδος Κέλβιν, ντικχλάς ότι η Γραφή βακερέλα ι ουρανόσκε: «Σαρ σέα κα κερνιόν σαρέ». (Ψαλμός 102:25, 26) Ο Κέλβιν πακιάλας, σαρ σικλιαρέλα η Γραφή, ότι ο Ντεβέλ μπορίνελα μα τι μουκχέλ τι καταστραφίντιβεν οντουλά σο κερντάς.—Εκκλησιαστής 1:4.

Σαρ ατσσόνα ο πλανήτες πουμαρέ θεσιέντε, σαρ για παράδειγμας αμαρί πφουβ;

Ο Αριστοτέλης σικλιαρέλας ότι σαρέ ο πράγματα κο ουρανός έπρεπε κάπου τι στηρίντιβεν για παράδειγμας, βακερέλας ότι ο πλανήτες ισινέ πφαντέ αντρέ μερικέ πραγματέντε σο μοιάζενας σαρ μπάλες, ντα αντρέ λέντε ισινέ κο μασκάρ η πφουβ. Όμως, πριν 200 μπρεσά, ο επιστήμονες αρχισάλε τι πακιάν ότι ο τσεργανιά ντα ο πλανήτες ίσως τι ατσσόνα κι μπαρμπάλ. Κο βιβλίος Ιώβ, όμως, σο γραφισάλο πριν 3.500 μπρεσά, διαβάνασα ότι ο Δημιουργός “ιμπλαβέλα ι πφουβ κο πουθενά”.—Ιώβ 26:7.

Η ΑΓΙΑ ΓΡΑΦΗ, ΠΑΡΟΛΟ ΣΟ ΝΑΝΕ ΕΚ ΙΑΤΡΙΚΟΣ ΒΙΒΛΙΟΣ, ΤΘΕΡΕΛΑ ΧΑΝΙΚ ΑΡΧΕΣ ΣΟ ΣΙΚΑΒΕΝΑ ΟΤΙ ΒΑΚΕΡΕΛΑ ΜΠΟΥΤ ΣΗΜΑΝΤΙΚΑ ΠΡΑΓΜΑΤΑ ΓΙΑ ΤΗΝ ΥΓΕΙΑ.

Ι νασφαλέν έπρεπε τι τσσουβέν-λεν κι καραντίνα.

Ι Μωυσίσκο Νόμος βακερέλας ότι οντουλά σο τθερένας λέπρα έπρεπε τι ατσσόν ντουρ κατά γιαβερά. Ο γιατροί όμως πριν από περίπου 700 μπρεσά αγαντέ καζόμ σημαντικός ισί τι κερέν-λες ανταβά κάνα αβιλέας ο μπαρέ νασφαλίματα, μάλιστα ανταβά κερέλα μπαρό λατσσιπέ αντιβές-ντα.—Λευιτικό, κεφάλαια 13 ντα 14.

Ο τζενέ έπρεπε τι τθοβέν πουμαρέ βαστά κάνα ασταρένας εκχέ μουλές.

Ο γιατροί ισινέ σικλέ τι εξετάνεν ι μουλέν ντα σοράν, χωρίς τι τθοβέν πουμαρέ βαστά, τι φροντίνεν ι νασφαλέ τζενέν. Ανταβά πράγμας κερντάς μπουτέν τι μερέν. Ο γιατροί αγαντέ πριν από περίπου 150 μπρεσά ότι ανταβά ισινέ λάθος. Όμως, ι Μωυσίσκο Νόμος βακερέλας ότι κον ασταρέλας εκχέ μουλές μαγαρίντιβελας. Βακερέλας επίσης ότι κον μανγκέλας τι αβέλ πάκι έπρεπε τι τθοβέλ-πες πανίσαρ. Σαρέ ανταλά οδηγίες ι Ντεβλέσκε κερένας λατσσιπέ κι υγεία-ντα.—Αριθμοί 19:11, 19.

Σο έπρεπε τι αβέλ-πες άμα εκ τζενό τζάλας οκόρινγκ.

Κάθε μπρες, πιο μπουτ από μισός εκατομμύριος τσσαβέ μερένα κατά ευκοίλια, ανταβά αβέλα-πες επειδή ο τζενέ σο τζάνα οκόρινγκ να πραχούνενα οντουλά σο κερένα ντα ο χουρντέ ασταρένα-λεν. Ι Μωυσίσκο Νόμος βακερέλας ότι κάνα εκ τζενό τζάλας οκόρινγκ έπρεπε τι πραχούνελ οντουλά σο κερέλας.—Δευτερονόμιο 23:13.

Ο ντιβές σο κερένας ι περιτομή.

Ο Νόμος ι Ντεβλέσκο βακερέλας ότι ο μουρσά έπρεπε τι κερέν περιτομή κάνα πφάντενας οχτώ ντιβεσένγκε. (Λευιτικό 12:3) Μπουτ τζενέ πακιάνα ότι ο ρατ τθουλιόλα φυσιολογικά κάνα ο μαξίμια αβένα εκχέ εβδομαδάκε. Κο πουρανέ μπρεσά, σο να υπαρχίντιβενας αζόμ λατσσέ θεραπείες, ο Ισραηλίτες μπεσένας τι κερέν ι περιτομή κάνα νακχέλας πιο μπουτ από εκ εβδομάδα, ανταβά σικαβέλα ότι αρακχαβένας-πες γκοντιάσαρ.

Ο συναισθήματα επηρεάνενα ι υγεία.

Μπουτ γιατροί ντα επιστήμονες βακερένα ότι ο λατσσέ συναισθήματα, σαρ ισί η χαρά, η ελπίδα, η εκτίμηση ντα η συγχώρηση, κερένα λατσσιπέ κι υγεία. Η Γραφή βακερέλα: «Ο χαρούμενος γκι ισί λατσσό φάρμακος, αλλά ο πφανγκό γκι κερέλα ι τζενές τι χασαρέλ πι ζορ».—Παροιμίες 17:22.