Ο Νικολά ντα η Σελίν τθερένας εκ γιαβέρ δυσκολία. Ο Μπέθελ κι Γαλλία μανγκλάς λένταρ τι τζαν εκχέ γιαβερέ κχανγκιριάτε. Βον βακερένα: «Κι αρχή ισινάμας μπουτ χαρούμενοι αλλά σοράν αρχισάλαμ τι σικλιντίνας αμαρέ αμαλένγκε. Να ισινάμας ατζέκ αζόμ πασέ ι πφραλέντζαρ κι νεβί κχανγκιρί». a Παρόλο σο υπαρχίντιβενα δυσκολίες, σαρ μπορίνενα τι τζαν-λεν λατσσές εκχέ νεβέ κχανγκιριάτε; Σαρ μπορίνενα τι βοηθίνεν-τουμέν ο γιαβερά; Ντα σαρ μπορίνενα τι ντεν ντα τι λεν ζορ ο εκ κατά γιαβέρ κι νεβί κχανγκιρί;

ΣΤΑΡ ΑΡΧΕΣ ΣΟ ΚΑ ΒΟΗΘΙΝΕΝ-ΤΟΥΜΕΝ

1. Τι στηρίντιβεν κο Ιεχωβά. (Ψαλμ. 37:5) Η Καζούμι, κι Ιαπωνία, νασλί κατά κχανγκιρί σο ισινέ για 20 μπρεσά επειδή λάκο ρομ έπρεπε τι συνεχίνελ πι μπουτί σε εκ γιαβέρ τθαν. Σαρ “μουκχλάς κο Ιεχωβά πο ντρομ”; Βόι βακερέλα: «Πουτράβας μο γκι κο Ιεχωβά κάθε φαρ σο νταράβας, σο νιωθίναβας κορκορί ντα ανησυχίναβας. Ντα κάθε φαρ βοβ ντέλας-μαν ι ζορ σο χρειαζίντιβαβας».

Σαρ μπορίνενα τι στηρίντιβεν ατζέ πο μπουτ κο Ιεχωβά; Σαρ εκ φυτός χρειαζίντιβελα πανί ντα λατσσέ στοιχεία κατά τσικ για τι μπαριόλ, αντικάς-ντα αμαρί πίστη χρειαζίντιβελα πνευματικός πανί ντα χαμπέ για τι αβέλ ζουρανί. Ο Νικολά, σο βακερντάμ λέσκε πο οπρέ, σκεφτιντάς λατσσές ο παράδειγμας ι Αβρααμίσκο, ι Ιησούσκο ντα ι Παυλόσκο. Βον κερντέ μπουτ θυσίες για τι υπηρετίνεν ι Ντεβλές, ντα λένγκο παράδειγμας κερντάς-λες πο σίγουρος ότι ο Ιεχωβά κα βοηθίνελας-λες. Ισί μπουτ λατσσό τι τθερέν εκ λατσσό πρόγραμμας για τι σικλιαρέν-τουμέν κατά Γραφή. Ανταβά κα βοηθίνελ-τουμέν τι ντεν-λεν πέρα σο-ντα αλλαγές αβένα τουμαρέ ζωγιάτε. Επίσης κα σικλιόν τι ενθαρρύνεν ι γιαβερέν τουμαρέ νεβέ κχανγκιριάτε.

2. Μα συγκρίνεν. (Εκκλ. 7:10) Ο Ζιλ έπρεπε τι σικλιόλ σε εκ μπουτ διαφορετική κουλτούρα  κάνα γκιλό κατά Μπενίν κι Αμερική. Βοβ βακερέλα: «Έπρεπε τι βακεράβ ι ιστορία μι ζωγιάκι κάθε νεβέ τζενέσκε σο ντικχάβας». Να ισινέ σικλό τι κερέλ-λες ανταβά, οτθάρ αρχισάλο τι τσσίντελ-πες ντουρ κατά κχανγκιρί. Κάνα όμως σικλιλό πο λατσσές ι πφραλέν ντα ι πφενίν, αλλαντάς γνώμη. Βοβ βακερέλα: «Πακιάβα ότι, κάι-ντα τι αβάς κι πφουβ, σαρέ ο τζενέ ισί ίδιοι. Απλά κερένα λάφι ντα συμπεριφερίντιβενα γιαβέρτουλους. Ισί σημαντικός τι δεχτίνας ι γιαβερέν αντικάς σαρ ισί». Οτθάρ, μα κερέν συγκρίσεις ι κχανγκιριάσαρ σο ισινένας ανγκλέ. Σαρ βακερντάς εκ σκαπάνισσα, η Αν-Λιζ: «Να αβιλόμ ατθέ για τι αρακχάβ οντουβά σο μουκχλόμ παλά-μάντε. Αβιλόμ ατθέ για τι αρακχάβ νεβέ πράγματα».

Ο πρεσβύτεροι-ντα δεν πρέπει τι συγκρίνεν πουμαρί νεβί κχανγκιρί ι πουρανέ κχανγκιριάσαρ. Κάνα ο πφραλά κι νεβί κχανγκιρί κερένα ο πράγματα διαφορετικά, ανταβά να μανγκέλα τι βακερέλ πάντα ότι κερένα-λεν λάθος. Ισί λατσσό τι σικλιόν ο πρεσβύτεροι πο λατσσές σαρ ισί ο πράγματα οντουλέ τθανέστε πριν τι αρχίνεν τι βακερέν πουμαρέ ιδέες. (Εκκλ. 3:1, 7β) Ισί πο λατσσό τι σικλιαρέν ι πφραλέν πουμαρέ λατσσέ παραδειγμάσαρ αντίς τι προσπαθίνεν ζορίσαρ τι κερέν-λεν τι σκεφτίνεν σαρ σκεφτίνενα βον.​—2 Κορ. 1:24.

3. Τι κερέν μπουτ πράγματα τουμαρέ νεβέ κχανγκιριάτε. (Φιλιπ. 1:27) Η μετακόμιση μανγκέλα μπουτ χρόνος ντα ζορ, αλλά ισί σημαντικός τι τζαν κο συναθροίσεις​—άμα αβέλα-πες πασάλ—ντιπ κατά αρχή. Ο πφραλά ντα ο πφενιά τουμαρέ νεβέ κχανγκιριάτε πρέπει τι ντικχέν-τουμέν μπουτ φαρ για τι νιωθίνεν πασέ τουμέντε ντα τι μπορίνεν τι βοηθίνεν-τουμέν. Η Λουσίντα, σο γκιλί πι ντουέ τσσαΐντζαρ σε εκ μπαρί πόλη κι Νότια Αφρική, βακερέλα: «Μο αμαλά βακερντέ μάνγκε τι προσπαθίναβ μπουτ τι αβάβ πασέ ι τζενέντζαρ μι νεβέ κχανγκιριάτε, τι νικιάβ γιαβερέντζαρ κο έργος ντα τι νταβ απαντήσεις κο συναθροίσεις. Επίσης, βακερντάμ κο πφραλά ότι κα μπορίνενας τι χρησιμοποιήνεν αμαρό κχερ για τι αβέν-πες ξεκινήματα».

Άμα «μαρένα-τουμέν πασέ ο εκ ι γιαβερέσαρ» κο πράγματα σο κερέλα τουμαρί κχανγκιρί, ανταβά κα βοηθίνελ τι αβέν πο ζουρανέ εμ τουμέν εμ τουμαρέ πφραλά. Ο πρεσβύτεροι κι κχανγκιρί της Αν-Λιζ βακερντέ λάκε τι προσπαθίνελ τι συνεργαζίντιβελ σαριλέντζαρ κο έργος. Σο αβιλό-πες; Η Αν-Λιζ βακερέλα: «Μπουτ σουγκό, αγαντόμ ότι ανταβά ισί εκ μπουτ λατσσό τρόπος τι νιωθίνες ότι ισινάν κομμάτι ι κχανγκιριάκο». Επίσης, άμα μανγκένα τι καθαρίνεν ντα τι περιποιήνεν ι Αίθουσα Βασιλείας, κα σικαβέν τουμαρέ πφραλέντε ντα πφενίντε ότι ακανά ντικχένα ι νεβί κχανγκιρί σαρ τουμαρί. Καζόμ πο μπουτ κερένα πράγματα τουμαρέ κχανγκιριάσαρ, αζόμ πο σουγκό ο πφραλά ντα ο πφενιά κα νιωθίνεν άνετα τουμέντζαρ ντα τουμέν κα νιωθίνεν ότι ανταγιά ισί τουμαρί φαμιλί.

4. Κερέν νεβέ αμαλέν. (2 Κορ. 6:11-13) Ο πο λατσσό τρόπος για τι κερέν αμαλέν ισί τι πφαμπόν ι γιαβερένγκε. Οτθάρ, τι τζαν νωρίς κο συναθροίσεις ντα σοράν μα τι νασέν σουγκό, για τι τθερέν χρόνος τι κερέν λάφι ι γιαβερέντζαρ ντα τι γνωρίνεν-λεν. Προσπαθίνεν τι σικλιόν λένγκε  ναβά. Άμα κα ντεν-τουμέν γκοντί ο ναβά ι γιαβερένγκε, κα σικαβέν λένγκε αγάπη ντα κα αβέν θαρροτοί, βον κα μανγκέν τι κερέν τουμέντζαρ παρέα ντα σίγουρα κα αβέν λατσσέ αμαλά.

Αντίς τι αγχώνεν ντα τι σκεφτίνεν σο τι κερέν για τι μπεϊντίνεν-τουμέν τουμαρέ νεβέ πφραλά, τι προσπαθίνεν τι αβέν τουμαρό νεαυτός. Κερέν σο κερντάς η Λουσίντα, σο βακερέλα: «Ντικχλάμ ότι ισί μπουτ λατσσό τι καλίνας πρώτα αμέν ι γιαβερέν αμαρέ κχερέστε, σόσκε αντικάς κα τθεράς λατσσέ αμαλέν».

«ΤΙ ΔΕΧΤΙΝΕΝ ΛΑΤΣΣΙΜΑΣΑΡ Ο ΕΚ Ι ΓΙΑΒΕΡΕΣ»

Μερικά τζενέ μπορεί τι αγχώνεν τι τζαν αντρέ σε εκ Αίθουσα Βασιλείας σο ισί πφερντί τζενέντζαρ σο να τζανένα-λεν. Οτθάρ, σαρ κα μπορίνενας τι κερέν-λες πο εύκολος ι νεβέ τζενένγκε σο αβένα τουμαρέ κχανγκιριάτε; «Τι δεχτίνεν λατσσιμάσαρ ο εκ ι γιαβερές», βακερντάς ο απόστολος Παύλος, «σαρ ο Χριστός-ντα δεχτιντάς λατσσιμάσαρ τουμέν». (Ρωμ. 15:7) Ο πρεσβύτεροι μπορίνενα τι μοιάζεν κο Χριστός ντα τι βοηθίνεν ι νεβέ τζενέν τι νιωθίνεν ότι δεχτίνενα-λεν λατσσιμάσαρ. (Ντικχέν ο πλαίσιος « Σαρ κα Τζαλ Λατσσές Τουμαρί Μετακόμιση») Όμως, σαρέ αντρέ κι κχανγκιρί, ατζέ-ντα ο χουρντέ, μπορίνενα τι βοηθίνεν ι νεβέ τζενέν τι νιωθίνεν άνετα.

Τι δεχτίνας ι γιαβερέν λατσσιμάσαρ να μανγκέλα τι βακερέλ σάντε τι καλίνας-λεν αμαρέ κχερέστε, αλλά εμ-ντα τι βοηθίνας-λεν. Για παράδειγμας, εκ πφεν, πφιραντάς-πες κι πόλη εκχέ γιαβερέ πφενιάσαρ, σο μόλις αβιλίας λάκε περιοχιάτε, για τι σικαβέλ λάκε σαρ τι χρησιμοποιήνελ ο λεωφορεία ντα ο τρένα. Ανταβά κερντάς μπαρί εντύπωση κι νεβί πφεν ντα κερντάς-λα τι νιωθίνελ άνετα πι νεβέ κχερέστε.

ΕΥΚΑΙΡΙΑ ΓΙΑ ΤΙ ΚΕΡΕΝ ΠΡΟΟΔΟΣ

Εκ χουρντό τσιρικλό κι αρχή μπορεί μα τι μανγκέλα τι μουκχέλ πι φωλιά ντα τι πετάνελ. Αλλά άμα κα κερέλ-λες εκ φαρ, σοράν μπορίνελα τι πετάνελ μπουτ οπρέ. Αντικάς-ντα κάνα τζάνα εκχέ νεβέ κχανγκιριάτε, μπορεί κι αρχή τι σακιντίνενα τι κερέν μπουτ πράγματα, αλλά κάνα κα νακχαβέν  τουμαρί νταρ, κα μπορίνεν τι πετάνεν οπρέ, τι πουτρέν τουμαρέ φτερά κι υπηρεσία κι Ιεχωβάσκι. «Η μετακόμιση σικλιαρέλα-τουτ μπουτ πράγματα», βακερένα ο Νικολά ντα η Σελίν. «Για τι σικλιάς σαρ τι τζας-λεν λατσσές ι νεβέ τζενέντζαρ ντα τι συνηθίνας ο διαφορετικός τθαν έπρεπε τι μπαριαράς νεβέ ιδιότητες». Ο Ζαν-Σαρλ, σο βακερντάμ λέσκε κι αρχή, βακερέλα σο λατσσιπέ ντικχλάς λέσκι φαμιλί: «Κι νεβί κχανγκιρί σο γκιλάμ, αμαρέ τσσαβέ γκιλέ πο πασέ κο Ιεχωβά. Σάντε χάνικ μασεκά πο σοράν, αμαρί τσσάι αρχισάλι τι κερέλ επιδείξεις κι συνάθροιση ντα αμαρό τσσαβό αβιλό μπίμπολντο ευαγγελιζόμενος».

Σο αβέλα-πες άμα να μπορίνενα τι τζαν γιαβερέ κχανγκιριάτε, για παράδειγμας, οτθέ σο η ανάγκη ισί πο μπαρί; Μπορίνενα τι κερέν ι κχανγκιρί σο ισινέν ακανά τι αβέλ σαρ νεβί τουμένγκε άμα κα κερέν μερικά κατά πράγματα σο ντικχλάμ πο οπρέ. Καζόμ στηρίντιβενα κο Ιεχωβά, τι κερέν μπουτ πράγματα τουμαρέ κχανγκιριάσαρ. Τι νικιόν ι γιαβερέντζαρ κο έργος, τι κερέν νεβέ φιλίες ή τι κερέν πο ζουρανέ ο φιλίες σο τθερένα ακανά. Κα μπορίνενας τι ντεν βοήθεια κο νεβέ τζενέ ή οντουλέντε σο ναστί κερένα μπουτ πράγματα. Ο αληθινοί Χριστιανοί αγαντίντιβενα κατά αγάπη. Οτθάρ άμα κα βοηθίνεν ι γιαβερέν ανταβά κα ανέλ-τουμέν πο πασέ κο Ιεχωβά. (Ιωάν. 13:35) Μπορίνενα τι αβέν σίγουροι ότι «ασακέ θυσίες κερένα ι Ντεβλές τι χαιρίνελ».​—Εβρ. 13:16.

Παρόλο σο υπαρχίντιβενα δυσκολίες, μπουτ τζενέ γκιλέ-λεν λατσσές κάνα αλλαντέ κχανγκιρί. Τουμέν-ντα μπορίνενα τι τζαν-λεν λατσσές! «Κάνα αλλαντόμ κχανγκιρί, ανταβά βοηθιντάς-μαν τι κεράβ πο μπουτ τθαν αντρέ μι γκίστε», βακερέλα η Αν-Λιζ. Η Καζούμι ισί ακανά σίγουρη ότι κάνα αλλάνεσα κχανγκιρί «μπορίνεσα τι ντικχές ι βοήθεια ι Ιεχωβάσκι τροπόντζαρ σο να ντικχλάνας μέχρι αζομάν». Ντα ο Ζιλ βακερέλα: «Ο αμαλά σο κερντόμ βοηθιντέ-μαν τι νιωθίναβ σαρ μι κχερέστε. Ακανά νιωθίναβα αζόμ μπουτ ότι ισινόμ κομμάτι ι κχανγκιριάκο, σο κα δυσκολίντιβαβας μπουτ τι νασάβ».