Δυστυχώς, κάνα γκιλόμ κι εφηβεία, η λατσσί φιλία σο τθεράβας ι Ιεχωβάσαρ χαλάντιλι. Μο συμμαθητές ντικχίντιβελας ότι τθερένας μπουτ ελευθερία ντα ότι με χασαράβας κάτι. Ισινέ μάνγκε βάρος η Χριστιανική ζωή ντα ο κανόνες μι φαμιλιάκε, ενώ ο πνευματικά πράγματα κχινιαρένας-μαν. Πάντα πακιάβας ότι ο Ιεχωβά υπαρχίντιβελας, αλλά να νιωθίναβας πασέ λέστε.

Να τσσιναντόμ ντιπ τι κεράβ έργος, αλλά κεράβας καζόμ αβέλας-πες πιο χάνικ. Κάνα τζάβας κο έργος, να ισινόμας ιτς προετοιμασμέ ντα ισινέ μάνγκε δύσκολος τι πουτράβ ή τι συνεχίναβ εκ συζήτηση. Οτθάρ, να τθεράβας επανεπισκέψεις ντα μελέτες, ντα αντικάς ο έργος να ντέλας-μαν χαρά. Ανταβά κερέλας-μαν μα τι μπεϊντίναβ-λες ιτς. Σκεφτίναβας: “Σαρ αβέλα-πες τι κερέλ-λες κάποιος ανταβά κάθε εβδομάδα, κάθε μάσεκ;”

Κάνα ισινόμας 17 μπρεσένγκι, μανγκάβας μα τι κερέλ-μαν καέκ κουμάντος. Οτθάρ, γκιντιντόμ μο πράγματα, νασλόμ κατά κχερ ντα γκιλόμ τι μπεσάβ κι Αυστραλία. Μο ντατ ντα μι ντάι στεναχωρισάλε μπουτ ανταλέσκε. Νταρένας,  αλλά σκεφτίνενας ότι κα συνεχίναβας τι υπηρετίναβ ι Ιεχωβάς.

Κι Αυστραλία, κεράβας ατζέ πιο χάνικ πράγματα ι Ιεχωβάσκε. Κο συναθροίσεις τζάβας σπάνια. Ταρτίνελας-μαν η παρέα ι τερνένγκι σο, βον-ντα σαρ με, να τθερένας πρόβλημας τι τζαν κι συνάθροιση ο εκ ντιβές ντα τι τζαν κο κλαμπ για τι κχελέν ντα τι πιν ο γιαβέρ ντιβές. Καζόμ σκεφτίναβα σαρ ισινέ μι ζωή οντουβά βακίτι, αγαβάβα ότι ισινόμας εμ κι αλήθεια εμ κο ντουνιάς, αλλά να νιωθίναβας άνετα πουθενά.

Ντούι μπρεσά πιο σοράν, εκ πφεν χωρίς τι αγαβέλ-λες κερντάς-μαν τι σκεφτίναβ κάι τζάλας μι ζωή. Μπεσάας παντς μπίπαντριμε πφενιά εκχέ κχερέστε, ντα φιλοξενιντάμ ι επισκοπός λέσκε ρομνιάσαρ, ι Ταμαράσαρ, για εκ εβδομάδα. Καζόμ λάκο ρομ ασχολίντιβελας ι κχανγκιριάκε πραγματέντζαρ, η Ταμάρα νακχέλας χρόνος αμέντζαρ ντα νακχάας μπουτ λατσσές λάσαρ. Ανταβά μπεϊντιντόμ-λες. Η Ταμάρα ισινέ γκοντιαβέρ ντα ισινέ εύκολος τι κερές λάσαρ λάφι. Ναστί πακιάβας σαρ αβέλας-πες εκ τζενό σο κερέλα αζόμ μπουτ πράγματα ι Ιεχωβάσκε τι κερέλ-τουτ τι νακχές λατσσές εκχέ παρεάτε.

Η Ταμάρα ισινέ μπουτ χαρούμενη τζενί. Μανγκέλας αζόμ μπουτ ι αλήθεια ντα ο έργος σο κερέλας ι γιαβερέν-ντα τι μανγκέν-λεν. Χαιρίνελας τι ντελ κο Ιεχωβά ο πιο λατσσό, ενώ με να ισινόμας ιτς χαρούμενη ντα κεράβας καζόμ αβέλας-πες πιο χάνικ πράγματα κο έργος. Λάκο λατσσό παράδειγμας ντα η ευτυχία σο τθερέλας κερντέ μπαρό λατσσιπέ μι ζωγιάτε. Ο παράδειγμας λάκο κερντάς-μαν τι ντικχάβ εκ σημαντική αλήθεια ι Γραφιάκι: Ο Ιεχωβά μανγκέλα τι υπηρετίνας-λες σαρέ «χαράσαρ» ντα τι “ντας βίκος χαράσαρ”.​—Ψαλμ. 100:2.

Μανγκάβας τι τθεράβ με-ντα ι χαρά σο τθερέλας η Ταμάρα, αλλά για τι αβέλ-πες ανταβά έπρεπε τι κεράβ μπαρέ αλλαγές. Λιντάς-μαν τριν μπρες, αλλά αρχισάλομ τι κεράβ μερικές αλλαγές. Αρχισάλομ τι προετοιμάναβ-μαν ι εργόσκε ντα μπάζιμα τι κεράβ βοηθητικός σκαπανικός. Ανταβά βοηθιντάς-μαν μα τι αγχώντιβαβ αζόμ μπουτ ντα τι νταβ πιο μπουτ  μπέσα μι νεαυτόσκε. Επειδή χρησιμοποιήναβας ι Γραφή πιο μπουτ κο έργος, νιωθίναβας πφερντί αντρέ μάντε. Σοράν, κεράβας βοηθητικός σκαπανικός κάθε μάσεκ.

Αρχισάλομ τι κεράβ παρέα εμ τερνέντζαρ εμ πφουρέντζαρ σο τζάνας λατσσές κι αλήθεια ντα μπεϊντίνενας ο έργος σο κερένας ι Ιεχωβάσκε. Λένγκο λατσσό παράδειγμας βοηθιντάς-μαν τι ντικχάβ καλά πράγματα τσσουβάβας πρώτα μι ζωγιάτε ντα τι αρχίναβ τι διαβάναβ κάθε ντιβές ι Γραφή. Μπεϊντίναβας ο έργος ατζέ πιο μπουτ, ντα τελικά λιντόμ ο τακτικός σκαπανικός. Πρώτη φορά σοράν από μπουτ μπρεσά, τζανάβας κάι ισταβάβας. Ισινόμας πάλι χαρούμενη αντρέ κι κχανγκιρί ντα νιωθίναβας άνετα.

Σοράν από εκ μπρες, γνωριντόμ τον Άλεξ, εκχέ μπουτ λατσσέ τζενές σο μανγκέλας ι Ιεχωβάς ντα ο έργος. Ο Άλεξ ισινέ διακονικός υπηρέτης ντα κερέλας τακτικός σκαπανικός σιοβ μπρες. Υπηρετιντάας κι Μαλάουι οτθέ σο η ανάγκη ισινέ πιο μπαρί. Οτθέ, κερντάς παρέα ιεραποστολόντζαρ σο κερντέ λέσκε μπαρό λατσσιπέ ντα βοηθιντέ-λες τι τσσουβέλ ι Βασιλεία κι πρώτη θέση.

Κο 2003 παντρισάλαμ, ντα από αζομάν συνεχίνασα ι ολοχρόνια διακονία γιεκ. Σικλιλάμ μπουτ πράγματα, ντα ο Ιεχωβά ευλογιντάς-αμέν μπουτέ τροπόντζαρ.

Κο 2009, βακερντέ αμένγκε τι υπηρετίνας σαρ ιεραπόστολοι κο Τιμόρ-Λέστε, εκ χουρντό τθεμ κο ινδονησιακός αρχιπέλαγος. Κάνα βακερντέ αμένγκε τι υπηρετίνας οτθέ, σαστισάλαμ, χαιρισάλαμ αλλά νταρασάλαμ-ντα. Σοράν από παντς μάσεκ, ερεσλάμ κι πρωτεύουσα, κο Ντίλι.

Αμαρί ζωή ισινέ μπουτ διαφορετική κατά ζωή σο τθεράας ανγκλέ. Έπρεπε τι σικλιάς λένγκι κουλτούρα, λένγκι τσσιπ, λένγκε χαμπίματα ντα ο τρόπος σο τζουβντιόνας. Μπουτ φαρ ντικχάας τζενέν σο ισινέ μπουτ τσορορέ ντα  τζενέν σο να γκιλέας ιτς σχολείος. Επίσης, ντικχάας μπουτέ τζενέν σο ισινέ ταλαιπωριμέ κατά τζένγκι ντα κατά βία. *

Ο έργος ισινέ μπουτ σουκάρ! Για παράδειγμας, εκ φαρ αρακχλόμ εκχέ στεναχωριμέ τσσαγιά σο ισινέ 13 μπρεσένγκι ντα βακερένας λάκε Μαρία. * Λάκι ντάι μουλίας πριν από χάνικ μπρεσά, ενώ πι νταντές ντικχέλας-λες σπάνια. Σαρ μπουτ γιαβερά τερνέ, η Μαρία να τζανέλας σο μανγκέλας τι κερέλ πι ζωγιάτε. Ντάβα-μαν γκοντί εκ φαρ σο πουταρντάς μάνγκε πο γκι ροϊμάσαρ. Αλλά ναστί αγαβάβας σο μανγκέλας τι βακερέλ επειδή να τζανάβας ατζέ λατσσές ι τσσιπ. Κερντόμ προσευχή κο Ιεχωβά ντα μανγκλόμ λέσταρ τι βοηθίνελ-μαν τι νταβ-λα ζορ, ντα σοράν αρχισάλομ τι διαβάναβ λάκε εδάφια σο κα βοηθίνενας-λα. Σοράν από χάνικ μπρεσά, ντικχάβας ι αλήθεια τι αλλάνελ λάκι συμπεριφορά, λάκι εμφάνιση ντα λάκι ζωή. Η Μαρία μπολντιλί ντα ακανά κερέλα βόι-ντα μελέτη γιαβερέν. Αντιβές, τθερέλα εκ μπαρί πνευματική φαμιλί ντα νιωθίνελα ότι μανγκένα-λα.

Ο Ιεχωβά ευλογίνελα ο έργος κο Τιμόρ-Λέστε. Παρόλο σο ο πιο μπουτ πφραλά νανέ πιο μπουτ από ντες μπρεσά μπολντέ, μπουτ ισί σκαπανείς, διακονικοί υπηρέτες ή πρεσβύτεροι. Γιαβερά κερένα μπουτί σε εκ απομακρυσμέ μεταφραστικός γραφείος ντα βοηθίνενα τι νικιόλ ο πνευματικός χαμπέ κο τσσιμπά σο κερντιόνα λάφι οτθέ. Κάνα ασουνάβας-λεν τι βακερέν ύμνους κι συνάθροιση, κάνα ντικχάβας-λεν τι ασάν ντα κάνα ντικχάβας-λεν καζόμ λατσσές τζάνας κι αλήθεια, πφερντιάβας χαρά.

Αμαρό διορισμός κο Τιμόρ-Λέστε ισινέ μπουτ διαφορετικός κατά ζωή σο τθεράας κι Αυστραλία, αλλά ούτε σο νακχλόας μι γκοντιάταρ ότι κα τθεράβας αζόμ ευτυχισμέ ζωή. Μπουτ φαρ, τσσουβάας-αμέν εκχέ χουρντέ λεωφορειόστε σο ισινέ πφερντό τζενέ, αλλά εμ ματσσέ ντα λαχανικά σο κιντέας. Μπάζιμα, ο κχερά σο τζάας τι κεράς μελέτες ισινέ μπουτ τατέ, τελέ να τθερένας τσιμέντος ντα ντονταλάι τθάβντενας κχανιά. Όμως, παρόλο σο τθεράας ανταλά δυσκολίες, μπουτ φαρ σκεφτίναβας: “Ανταβά σο τζουβντιάσα ισί μπουτ σουκάρ!”

Κάνα σκεφτίναβα οντουλά σο αβιλέ-πες μι ζωγιάτε, ισινόμ πφερντί εκτίμηση σο μο ντατ ντα μι ντάι κερντέ ο πιο λατσσό για τι σικλιαρέν-μαν ο ντρομ ι Ιεχωβάσκο ντα τι στηρίνεν-μαν, ατζέ-ντα κάνα ισινέ δύσκολα ο μπρεσά μάνγκε. Ο εδάφιος Παροιμίες 22:6 σικάντιλο μπαγιά μάνγκε. Μο ντατ ντα μι ντάι καμαρώνενα μαν ντα μι ρομές. Ισί ευτυχισμέ καζόμ ντικχένα τι χρησιμοποιήνελ-αμέν ο Ιεχωβά. Κατά 2016 υπηρετίνασα κο έργος περιοχής τθανέντε σο τθερέλα λένγκι ευθύνη ο γραφείος τμήματος κι Αυστραλασία.

Ναστί πακιάβα ότι ο έργος ισινέ μάνγκε βαρετός. Ακανά μπεϊντίναβα μπουτ ο έργος! Αγαντόμ ότι, σο-ντα τι αβέλα-πες αμαρέ ζωγιάτε, η αληθινή χαρά αβέλα σάντε κάνα υπηρετίνασα αντράλ αμαρέ γκίσταρ ι Ντεβλές. Πράγματι, ο τελευταία 18 μπρεσά σο υπηρετίναβα ι Ιεχωβάς γιεκ μι ρομέσαρ ισί ο πιο ευτυχισμέ μπρεσά μι ζωγιάκε. Ακανά αγαβάβα καζόμ μπαγιά ισί ο λάφια σο βακερντάς ο Δαβίδ κο Ιεχωβά: «Σαρέ οντουλά σο τζάνα τούτε για τι αρακχαβέν-πες, κα χαιρίνεν· κα ντεν πάντα βίκος χαράσαρ. . . . Σαρέ οντουλά σο μανγκένα το ναβ κα αρακχέν χαρά τούτε».​—Ψαλμ. 5:11.