Σαρ νταντά ντα νταγιά ισί σημαντικός τι σικλιαρέν τουμαρέ τσσαβέν τι τθερέν λατσσέ ιδιότητες. Για παράδειγμας, άμα προσπαθίνενα τι αβέν τίμιοι σαρέ κο πράγματα, μανγκένα τι νακχαβέν-λες ανταβά τουμαρέ τσσαβέντε-ντα.

Μανγκένα επίσης τι σικλιαρέν-λεν τι αβέν μπουτιαρνέ, δίκαιοι ντα τι πφαμπόν ι γιαβερένγκε—ιδιότητες σο μπορίνενα τι μπαριόν κι τσσαβένγκε γκιά πο εύκολα κάνα ισί ατζέ χουρντέ.

ΑΡΧΗ ΚΑΤΑ ΓΡΑΦΗ: «Σίκλιαρ ι τσσαβές τι πφιρέλ κο ντρομ σο ισί λατσσό λέσκε· ατζέ-ντα κάνα κα πφουρίλιβελ να κα νασέλ λέσταρ».​—Παροιμίες 22:6.

Ακανά σο τζουβντιάσα αντρέ κι τεχνολογία, ο ιδιότητες ισί μπουτ σημαντικές. «Χωρίς τι αγαβέλ εκ τζενό μπορεί τι επηρεάντιβελ μπέτι πραγματένταρ αντράλ κατά ηλεκτρονικές συσκευές», βακερέλα εκ ντάι, η Κάριν. «Αμαρέ τσσαβέ μπορεί τι ντικχένα κάτι λουμνικανό ενώ ισί ντιπ πασέ αμέντε!»

ΑΡΧΗ ΚΑΤΑ ΓΡΑΦΗ: “Ο τζενέ σο ισί ζουρανέ κι πίστη . . . ισί σικλέ τι τσσουβέν πουμαρί γκοντί τι κχελέλ ντα αντικάς αγαβένα σο ισί σωστός ντα σο ισί λάθος”.​—Εβραίους 5:14.

Επίσης μπουτ σημαντικοί ισί ο λατσσέ τρόποι-ντα. Λατσσέ τρόποι ισί τι βακεράς «παρακαλώ» ντα«ευχαριστώ» ντα τι πφαμπάς ι γιαβερένγκε—σο ανταλά χασάρντιλε αμαρέ μπρεσέντε, αφού ο πο μπουτ τζενέ ντικχίντιβελα ότι πφαμπόνα πο μπουτ για το συσκευές παρά ι τζενένγκε.

ΑΡΧΗ ΚΑΤΑ ΓΡΑΦΗ: «Οντουβά σο μανγκένα τι κερέν ο τζενέ τουμένγκε, τι κερέν-λες τουμέν-ντα λένγκε».​—Λουκάς 6:31.

Σικλιαρέν-λεν ξεκάθαρα ότι πρέπει τι αβέν πάκι κι Ντεβλέσκε γιακχά. Φιρειπείν, επιστήμονες σικαντέ ότι ισί πο εύκολος ο τερνέ μα τι κερέν σεξ πριν τι παντρίνεν άμα σικλιλέ ότι ανταβά ισί λάθος.

ΙΔΕΑ: Ασταρέν-τουμέν εκχέ πραγμάσταρ σο αβιλό-πες ντα πουτρέν συζήτηση για το ιδιότητες. Για παράδειγμας, άμα ασουντέν κο ειδήσεις για εκ έγκλημας, κα μπορίνενας τι βακερέν: «Σο μπέτι πράγμας σο μερικά τζενέ νικαβένα αζόμ χολί. Σόσκε πακιάσα ότι εκ τζενό ερεσέλα κο σημείος τι κερέλ-λες ανταβά;»

«Ισί ατζέ πο δύσκολος ι τσσαβένγκε τι τραμπίνεν καβά ισί ο σωστός ντα καβά ο λάθος άμα να τζανένα σο ισί σωστός ντα σο ισί λάθος».—Μπράντον.

Σικλιαρέν-λεν λατσσέ τρόπους. Ατζέ-ντα ο χουρντέ μαξίμια μπορίνενα τι σικλιόν τι βακερέν «παρακαλώ» ντα «ευχαριστώ» ντα τι σικαβέν σεβασμός. «Καζόμ πο μπουτ αγαβένα ο χουρντέ ότι κχελένα βον-ντα ρόλος αντρέ εκχέ φαμιλιάτε, κο σχολείος ντα κι κοινωνία, αζόμ πο εύκολα κα κερέν λατσσέ πράγματα σαριλένγκε ντα όχι σάντε πουμαρέ νεαυτόσκε», βακερέλα ο βιβλίος Ανατροφή Παιδιών Χωρίς Σύνορα.

ΙΔΕΑ: Τι τσσουβέν τουμαρέ τσσαβέν τι κερέν μπουτιά κο κχερ για τι σικλιαρέν-λεν καζόμ σημαντικός ισί τι κερέν πράγματα ι γιαβερένγκε.

«Άμα αμαρέ τσσαβέ σικλιλέ από ακανά τι κερέν μπουτιά κο κχερ, κα αβέλ λένγκε πο εύκολος κάνα κα τθερέν πουμαρό κχερ κορκορέ. Κα σικλιόν χουρντιαρέλα τι λεν πουμαρέ ευθύνες».—Τάρα.