Ο Δεύτερος Γράμμας σο Μπουτσσάντιλο κο Θεσσαλονικείς 3:1-18
3 Οντουλέσκε, πφραλάλεν, τι προσευχίντιβεν αμένγκε για τι λιντιόλ αμπέρι σουγκό ο λάφι ι Ιεχωβάσκο* ντα τι δοξάντιβελ, σαρ αβιλό-πες τουμένγκε-ντα,
2 ντα για τι αρακχαβέλ-αμέν ο Ντεβέλ τζενένταρ σο ισί μπουτ πφιρνέ,* σόσκε να τθερένα σαρέ ο τζενέ πίστη.
3 Αλλά ο Κύριος ισί πιστός, ντα κα ντελ-τουμέν ζορ ντα κα αρακχαβέλ-τουμέν κατά Μπενγκ.*
4 Σαρ μαθητές ι Κυριόσκε, ντάσα τουμένγκε μπέσα. Τζανάσα ότι ντένα καν αμαρέ οδηγιέντε ντα κα συνεχίνεν τι κερέν-λες ανταβά.
5 Ο Κύριος τι βοηθίνελ-τουμέν* τι μανγκέν ι Ντεβλές ντα τι κερέν υπομονή ι Χριστόσκε.
6 Ακανά, πφραλάλεν, ντάσα-τουμέν ι οδηγία κο ναβ αμαρέ Κυριόσκο, κι Ιησού Χριστόσκο, τι ατσσόν ντουρ κάθε πφραλέσταρ σο να ντέλα καν ντα να κερέλα οντουλά σο σικλιαρντάμ-τουμέν* αμέν.
7 Τουμέν τζανένα σο πρέπει τι κερέν για τι μοιάζεν αμέντε, επειδή ισινάμας σωστοί κάνα ισινάμας οτθέ τουμέντε
8 ντα να μανγκλάμ καεκχέ τζενέσταρ χαμπέ χωρίς τι ποκινάς. Οκιά μπάνταρ, κεράας μπαρέ προσπάθειες ντα κχινίλαμ μπουτ καζόμ κεράας μπουτί ντισάρα ντα ιράτ για τι τθεράς οντουλά σο χρειαζίντιβασα, ντα αντικάς μα τι μανγκάς καεκχέσταρ τι χαλαβέλ λοβέ αμένγκε.
9 Όχι ότι να τθεράσα ανταβά δικαίωμας, αλλά μανγκάας τι αβάς παράδειγμας τουμένγκε για τι μοιάζεν αμέντε.
10 Κάνα ισινάμας τουμέντζαρ, ντάας-τουμέν ακαγιά εντολή: «Άμα εκ τζενό να μανγκέλα τι κερέλ μπουτί, δεν πρέπει ούτε τι χαλ».
11 Ασουνάσα ότι ισί τζενέ τουμένταρ σο να ντένα καν ντα να κερένα ιτς μπουτί, αλλά ανακατούντιβενα πραγματέντε σο νανέ λένγκι μπουτί.
12 Ασακέ τζενέντε ντάσα εντολή ντα βακεράσα λένγκε κο ναβ κι Κυριόσκο, κι Ιησού Χριστόσκο, τι ντικχέν πουμαρί μπουτί ντα τι χαν ο μαντρό σο νικαβένα βον.
13 Τουμέν, πφραλάλεν, μα τσσιναβέν τι κερέν ο λατσσιπέ.
14 Αλλά άμα εκ τζενό να ντέλα καν αμαρέ λαφίντε σο ισί ανταλέ γραμμάστε, ατσσικιαρέν-λες σημειωμέ* ντα τσσιναβέν τι κερέν λέσαρ παρέα, για τι λατζάλ.
15 Όμως, μα ντικχέν-λες σαρ ντουσμάνι,* αλλά τι ντεν-λες συμβουλές σόσκε ισί τουμαρό πφραλ.
16 Προσευχίντιβασα ο Κύριος σο τθερέλα ντα ντέλα ειρήνη τι ντελ-τουμέν πάντα ειρήνη σαρέ κο πράγματα. Ο Κύριος τι αβέλ σαρέ τουμέντζαρ.
17 Με ο Παύλος γραφίναβα-λες τουμένγκε ανταβά μι βαστέσαρ για τι μπουτσσαβάβ τουμένγκε σελιάμι.* Πάντα γραφίναβα αντικάς σαρέ μι γραμματέντε για τι τζανέν ότι ισί μάνταρ.
18 Ο μπαρό λατσσιπέ αμαρέ Κυριόσκο, ι Ιησού Χριστόσκο, τι αβέλ σαρέ τουμέντζαρ.
Υποσημειώσεις
^ Γιαβέρσοϊ «γκεραλέ, μπίλατσσε».
^ Κι Πουρανί Μπαλαμανί βακέρντιβελας «πφιρνό».
^ Γιαβέρσοϊ «τι οδηγίνελ τουμαρό γκι για».
^ Ή μπέκιμ «σικλιαρντάμ-λεν».
^ Γιαβέρσοϊ «προσοχίνεν ανταλέ τζενέσταρ».
^ Γιαβέρσοϊ «εχθρός».
^ Γιαβέρσοϊ «για τι μπουτσσαβάβ τουμένγκε χαιρετίσματα».
