Ο Πρώτος Γράμμας σο Μπουτσσάντιλο κο Τιμόθεος 5:1-25
5 Μα κερ λάφι μπέτι τροπόσαρ εκχέ πφουρέσκε, αλλά τι κερές λέσκε λάφι λατσσιμάσαρ σαρ κα κερέας τι νταντέσκε. Τι κερές λάφι κο τερνέ σαρ κα κερέας τι πφραλένγκε,
2 κο πφουριά σαρ κα κερέας τι νταγιάκε, κο τερνέ τσσαγιά σαρ κα κερέας τι πφενίνγκε, ντιπ πάκι γκίσαρ.
3 Τι σεβάνες* οντουλέ χηρέν σο τθερένα μπαγιά ανάγκη.*
4 Αλλά άμα εκ χήρα τθερέλα τσσαβέν ή αγγονίν, τι σικλιόν βον τι φροντίνεν οντουλέν σο ισί λένγκε κχερέστε, ντα αντικάς τι σικαβέν αφοσίωση κο Ντεβέλ. Βον πρέπει τι ντεν πουμαρέ νταντέστε ή νταγιάτε ντα πουμαρέ παππούστε ή μπαμπάτε οντουβά σο αξίνελα λένγκε, σόσκε ανταβά κερέλα ο γκι ι Ντεβλέσκο.
5 Η χήρα σο τθερέλα μπαγιά ανάγκη ντα να τθερέλα τίποτα ντέλα μπέσα* κο Ντεβέλ, μολίνελα-λες* ντα προσευχίντιβελα λέστε ντισάρα ντα ιράτ.
6 Αλλά οντιά σο τζουβντιόλα σάντε για τι κερέλ σο-ντα μανγκέλα* ισί μουλί παρόλο σο ισί τζουβντί.
7 Οτθάρ, τι ντες ανταλά οδηγίες* για μα τι μπορίνελ καέκ τι κατηγορίνελ-λεν.*
8 Σίγουρα, άμα εκ τζενό να ντέλα ο αναγκαία πι τζενέντε,* ντα πο μπουτ οντουλέντε σο μπεσένα λέσκε κχερέστε, νασλό κατά πίστη ντα ισί χειρότερος εκχέ τζενέσταρ σο να πακιάλα κο Ντεβέλ.
9 Εκχέ χηράκο ναβ πρέπει τι γραφίντιβελ κο κατάλογος άμα ισί 60 μπρεσένγκι ντα πο μπουτ, άμα ισινέ πιστή πι ρομέστε,*
10 άμα τζανένα-λα ο γιαβερά ι λατσσέ πραγματένγκε σο κερντάς, άμα μπαριαρντάς λατσσές πι τσσαβέν, άμα ισινέ φιλόξενη, άμα τθοντάς ο πιντρέ ι αγιόνγκε, άμα βοηθιντάς ι ταλαιπωριμέ τζενέν, άμα ισινέ αφοσιωμέ κάθε λατσσέ πραγμάστε.
11 Οκιά μπάνταρ, μα γράφινε κο κατάλογος ο ναβ ι πο τερνέ χηρένγκο, σόσκε κάνα βον μουκχένα τι κερέν-λεν κουμάντος λένγκε σεξουαλικές επιθυμίες, αντίς τι υπηρετίνεν ι Χριστός, μανγκένα τι παντρίνεν.
12 Βον κα κρίντιβεν επειδή να ατσσικιαρντέ ο λάφι σο ντινέ.
13 Ατζέκ, ισί σικλέ τι χασαρέν πουμαρό σαάτι ντα τζάνα κατά εκ κχερ κο γιαβέρ. Ντα να χασαρένα σάντε πουμαρό σαάτι, αλλά ισί κουτσομπόλες-ντα, ανακατούντιβενα πραγματέντε σο νανέ λένγκι μπουτί ντα κερένα λάφι πραγματένγκε σο δεν πρέπει τι κερέν λάφι.
14 Οτθάρ, μανγκάβα ο τερνέ χήρες τι παντρίνεν, τι κερέν τσσαβέν, τι κερέν κουμάντος πουμαρό κχερ ντα μα τι ντεν κο ντουσμάνι* καέκ λόγος τι βακερέλ μπέτι λάφια αμένγκε.
15 Ντα μερικές λένταρ μουκχλέ ι αλήθεια ντα ακολουθιντέ ι Μπενγκές.
16 Άμα κατά φαμιλί εκχέ πιστέ πφενιάκι εκ τζενί ισί χήρα, η πιστή πφεν τι βοηθίνελ-λα για μα τι τθερέλ η κχανγκιρί ανταγιά ευθύνη. Αντικάς η κχανγκιρί κα μπορίνελ τι βοηθίνελ οντουλέ χηρέν σο τθερένα μπαγιά ανάγκη.*
17 Τι σικάντιβελ πο μπαρό σεβασμός ι πρεσβυτερόνγκε σο οδηγίνενα ι κχανγκιρί λατσσέ τροπόσαρ, ντα πο μπουτ οντουλένγκε σο κερένα ο πο λατσσό για τι βακερέν ντα τι σικλιαρέν ο λάφι ι Ντεβλέσκο.
18 Επειδή η Γραφή βακερέλα: «Μα πφάντε ο μούι εκχέ γκουρουβέσκο κάνα τσσουβέσα-λες τι ισταβέλ ο γκιβά». Βακερέλα ακαβά-ντα: «Ο τζενό σο κερέλα μπουτί αξίνελα τι ποκίντιβελ».
19 Μα κερ τίποτα άμα εκ τζενό κα κατηγορίνελ εκχέ πρεσβυτερός εκτός άμα κα βακερέν ανταγιά κατηγορία ντούι ή τριν τζενέ.
20 Τι διορθώνες ανγκλάλ σαριλέντε οντουλέν σο αμαρτίνενα, για τι προειδοποιήντιβεν* ο γιαβερά.
21 Ντάβα-τουτ εντολή ανγκλάλ κο Ντεβέλ, κο Χριστός Ιησούς ντα κο τραμπιμέ άγγελοι τι κερές ανταλά οδηγίες. Μα τι κρίνες χωρίς τι τζανές λατσσές σαρέ ο πράγματα ντα μα τι ξεχωρίνες ι τζενέν.
22 Ποτές μα σίγκιαρ τι τσσουβές το βαστά οπράλ καεκχέστε* ντα μα τθερ ευθύνη ι αμαρτιένγκε σο κερένα ο γιαβερά. Τι ατσσικιαρές το νεαυτός πάκι.
23 Μα πι πανί,* αλλά τι πις χάνικ μολ τι στομαχίσκε ντα για μα τι νασφάλιβες* μπουτ φαρ.
24 Μερικέ τζενένγκε αμαρτίες τζανένα-λεν σαρέ ντα τιμωρίντιβενα μπουτ σουγκό, γιαβερένγκε αμαρτίες όμως ντικχίντιβενα πο σοράν.
25 Αντικάς ο λατσσέ-ντα πράγματα σο κερέλα εκ τζενό τζανένα-λεν σαρέ, ντα ο πράγματα σο να τζανένα-λεν σαρέ ναστί ατσσόνα γκεραντέ.
Υποσημειώσεις
^ Γιαβέρσοϊ «Τι φροντίνες».
^ Δηλαδή να τθερένα καεκχές τι βοηθίνελ-λεν.
^ Κι Πουρανί Μπαλαμανί ισινέ ο λάφι «ελπίδα».
^ Κι Πουρανί Μπαλαμανί ισινέ ο λάφι «δέηση». Ντικχ εδάφιος 1 Τιμ. 2:1, υποσημείωση.
^ Ατθέ, μπέκιμ βακερέλα για το σεξουαλικές επιθυμίες.
^ Γιαβέρσοϊ «εντολές».
^ Ντικχίντιβελα ότι κερέλα λάφι ι χηρένγκε ντα λένγκε τζενένγκε.
^ Δηλαδή οντουλέντε σο τθερέλα ι ευθύνη τι φροντίνελ.
^ Κι Πουρανί Μπαλαμανί βακέρντιβελας «(ισινέ) ρομνί εκχέ ρομέσκι».
^ Γιαβέρσοϊ «εχθρός».
^ Δηλαδή να τθερένα καεκχές τι βοηθίνελ-λεν.
^ Κι Πουρανί Μπαλαμανί βακέρντιβελας «για τι τθερέν νταρ».
^ Δηλαδή μα σίγκιαρ τι διορίνες εκχέ τζενές.
^ Γιαβέρσοϊ «Μα πι σάντε πανί».
^ Γιαβέρσοϊ «για μα τι πασλιός, μα τι αβές αμπορεμέ».
