Ο Γράμμας σο Μπουτσσάντιλο κο Φιλιππήσιοι 4:1-23
4 Πφραλάλεν, σο μανγκάβα-τουμέν ντα μπεσάβα σαρ σαρ τι ντικχάβ-τουμέν, ισινέν μι χαρά ντα ισινέν σαρ στεφάνι μάνγκε. Βακεράβα τουμένγκε τι ατσσόν σταθεροί κο Κύριος.
2 Βακεράβα εμ κι Ευοδία εμ κι Συντύχη τι υπηρετίνεν ενωμέ* ι Κυριός.
3 Βα, μανγκάβα τούταρ-ντα, μο πφραλ σο υπηρετίνεσα μάντζαρ σαρέ τι γκίσαρ, τι συνεχίνες τι βοηθίνες ανταλέ τζουβλίν. Βον αλλά εμ ο Κλήμεντας ντα ο γιαβερά μαρντέ-πες γιεκ μάντζαρ για τι μουτθάντιβεν ο λατσσέ αμπέρια. Ο ναβά σαρέ ανταλένγκε ισί γραμμέ κο βιβλίος κι ζωγιάκο.
4 Πάντα τι χαιρίνεν κι υπηρεσία κι Κυριόσκι. Πάλι κα βακεράβ: Τι χαιρίνεν!
5 Τι ντικχίντιβελ σαρέ κο τζενέ ότι ισινέν λογικοί. Ο Κύριος ισί πασέ.
6 Μα αγχώνεν καεκχέ πραγμάσκε, αλλά σο-ντα τι αβέλ-πες, κερέν προσευχή κο Ντεβέλ, μολίνεν-λες* τι σικαβέλ τουμένγκε σο τι κερέν ντα βακερέν λέσκε ευχαριστώ.
7 Άμα κα κερέν-λες ανταβά, ο Ντεβέλ κα ντελ-τουμέν ι ειρήνη σο ναστί αγαβένα-λα ο τζενέ, ντα αντικάς αντράλ κατά Χριστός Ιησούς ο Ντεβέλ κα αρακχαβέλ τουμαρό γκι ντα τουμαρί γκοντί.*
8 Οντουλέσκε, πφραλάλεν, σαρέ οντουλά σο ισί μπαγιά, σημαντικά, δίκαια, πάκι, οντουλά σο τσσίντενα ι τζενέν τι μανγκέν ι γιαβερέν, σο τθερένα λατσσό ναβ, σο ισί λατσσέ ντα αξίνενα ισαριπέ, ανταλά τι ανέν τουμαρέ γκοντιάτε.
9 Τι κερέν οντουλά σο σικλιλέν ντα δεχτιντέν ντα ασουντέν ντα ντικχλέν μάνταρ, ντα ο Ντεβέλ σο τθερέλα ντα ντέλα ειρήνη κα αβέλ τουμέντζαρ.
10 Χαιρίναβα μπουτ ντα βακεράβα ευχαριστώ κο Κύριος σο σικαντέν πάλι ότι πφαμπόνα μάνγκε. Τζανάβα ότι πάντα πφαμπόνας μάνγκε, αλλά να τθερένας ι ευκαιρία τι σικαβέν-λες ανταβά.
11 Να βακεράβα-λες ανταβά επειδή τθεράβα ανάγκη, σόσκε σικλιλόμ τι ερεσέν-μαν οντουλά σο τθεράβα* σαρ-ντα τι αβέν ο πράγματα μι ζωγιάτε.
12 Τζανάβα τι τζουβντιάβ εμ χάνικ εμ μπουτέ πραγματέντζαρ. Σο-ντα τι αβέλα-πες μι ζωγιάτε σικλιλόμ ανταβά σο να τζανένα μπουτ τζενέ: τι αβάβ ικανοποιημέ εμ κάνα ισινόμ τσαλό εμ κάνα μποκχάλιβαβα, εμ κάνα τθεράβα μπουτ πράγματα εμ κάνα τθεράβα χάνικ.
13 Σαρέ ι πραγματένγκε τθεράβα ι ζορ αντράλ οντουλέσταρ σο ντέλα-μαν ζορ.
14 Αλλά λατσσές κερντέν σο ισινένας πασέ μάντε μι δυσκολιέντε.*
15 Τουμέν-ντα πφραλάλεν σο μπεσένα κο Φίλιπποι, τζανένα ότι, κάνα ασουντέν ο λατσσέ αμπέρια ντα κάνα νασλόμ κατά Μακεδονία, ούτε εκ κχανγκιρί να βοηθιντάς-μαν, αλλά σάντε τουμέν.
16 Καζόμ ισινόμας κι Θεσσαλονίκη, μπουτσσαντέν μάνγκε, όχι σάντε εκ φαρ αλλά ντούι φαρ, πράγματα σο τθεράβας ανάγκη.
17 Να μανγκάβα τουμένταρ δώρα, αλλά μανγκάβα τι κερέν λατσσέ πράγματα ι γιαβερένγκε σο ανένα τουμένγκε πο μπαρό λατσσιπέ.
18 Όμως, τθεράβα σο-ντα χρειαζίντιβαβα ντα ατζέ πο μπουτ. Να λειπίνελα μάνταρ τίποτα ακανά σο λιντόμ κατά Επαφρόδιτος οντουλά σο μπουτσσαντέν μάνγκε. Τουμαρό δώρος ισί σαρ εκ μυρωδιά σο κχάντελα μίσκι, εκ θυσία σο κερέλα ι Ντεβλέσκο γκι.
19 Ντα αντικάς αντράλ κατά Χριστός Ιησούς, μο Ντεβέλ κα ντελ-τουμέν σαρέ οντουλά σο χρειαζίντιβενα πι χουλανιμάσαρ σο τθερέλα μπαρί δόξα.
20 Οτθάρ, κο Ντεβέλ σο ισί αμαρό Ντατ τι αβέλ η δόξα για πάντα. Αμήν.
21 Κερέν σελιάμι* σαρέ κο άγιοι σο ισί μαθητές ι Χριστόσκε, ι Ιησούσκε. Ο πφραλά σο ισί μάντζαρ κερένα τουμένγκε σελιάμι.
22 Κερένα τουμένγκε σελιάμι σαρέ ο άγιοι, αλλά πο μπουτ οντουλά σο ισί κο παλάτι σο τθερέλα ο Καίσαρας.
23 Ο μπαρό λατσσιπέ ι Κυριόσκο, ι Ιησού Χριστόσκο, τι αβέλ αντρέ τουμαρέ γκίστε.*
Υποσημειώσεις
^ Γιαβέρσοϊ «τι υπηρετίνεν με το ίδιος τρόπος σκέψης».
^ Κι Πουρανί Μπαλαμανί ισινέ ο λάφι «δέηση». Ντικχ εδάφιος Φιλιπ. 1:4, υποσημείωση.
^ Γιαβέρσοϊ «τουμαρέ σκέψεις».
^ Γιαβέρσοϊ «τι αβάβ ικανοποιημέ».
^ Γιαβέρσοϊ «μι στεναχωριάτε».
^ Γιαβέρσοϊ «Ντεν χαιρετίσματα».
^ Κι Πουρανί Μπαλαμανί βακέρντιβελας «(τι αβέλ) γιεκ τουμαρέ πνευμάσαρ».
