16. LEKCIJA
So ćerđa o Isus ked hine ki phuv?
But manuša šunđe aso Isus. Disave đanena so ulo ked ov hine beba. Avera mislinena so ov hine jekh šukar proroko. Disave manuša đanena samo sar ov mulo. Ama, amen šaj pobuter te đana olestar ako sikljovaja ando oleso životi ked hine ki phuv. Ki akija lekcija, ka dikhe kola važna buća o Isus ćerđa hem sar šaj odova te pomožini tut.
1. So hine najvažno e Isusese?
E Isusese hine najvažno te vaćeri „i šukar vest ando Devleso Kraljevstvo.“ (Čitinen Luka 4:43.) Ov sarinenđe vaćerđa so o Devel ka ćerel kraljevstvo, ja vlast koja ka rešini e manušenge problemija. a Trin tekvaš berš o Isus dinđa sa pestar te vaćeri e manušenđe odija šukar vest (Matej 9:35).
2. Sose o Isus ćerđa čudija?
I Biblija vaćeri ando but „moćna delija, čudija hem znakija kola o Devel prekalo [Isus] ćerđa“ (Dela apostolska 2:22). Sebepi so o Devel dinđa le moć, o Isus šaj hine te smirini i oluja, te parvari hiljade manušen, te saćari e nabormen, hem čak te irini e mulen ko životi (Matej 8:23-27; 14:15-21; Marko 6:56; Luka 7:11-17). O čudija kola o Isus ćerđa, mothovđe so o Devel bićhalđa le. Isto ađahar, on mothovđe so jedino o Jehova šaj te rešini sa amare problemija.
3. Savo primer aćhavđa amenđe o Isus?
O Isus uvek šunđa e Jehova. (Čitinen Jovan 8:29.) Ov ćerđa odova celo po životi. Čak ked o manuša marđe lese muj, o Isus uvek ćerđa sa so oleso Dad rodinđa olestar. Odoleja mothovđa so o manuša šaj verno te služinen e Devlese, iako isi len pharipa. Ađahar, o Isus „aćhavđa amenđe primer sar ko sa te đa palo olese korakija“ (1. Petrova 2:21).
SIKLJOV POBUTER
Sikljov pobuter ando odova sar o Isus vaćerđa e manušenđe i šukar vest hem sar ćerđa čudija.
4. O Isus vaćerđa i šukar vest
Te šaj te vaćeri i šukar vest so pobuter manušenđe, o Isus hine spremno te đal phirindoj but baro drumo. Čitinen Luka 8:1, hem palo odova vaćeren ando akala pućiba:
-
Da li o Isus vaćerđa i šukar vest samo okolenđe kola alje koro leste?
-
So ćerđa o Isus te šaj te avel đi o manuša?
O Devel phenđa so o Mesija ka vaćeri e manušenđe andi šukar vest. Čitinen Isaija 61:1, 2, hem palo odova vaćeren ando akala pućiba:
-
Sar o Isus ispuninđa akava proročanstvo?
-
So tu mislineja, da li o manuša avdije valjani te šunen i šukar vest?
5. O Isus sikavđa e manušen ando but važna buća
Uzo odova so vaćerđa e manušenđe ando Devleso Kraljevstvo, o Isus dinđa len hem disave šukar savetija. Disave ando odola savetija, o Isus vaćerđa ked ićerđa i Propoved ki gora. Čitinen Matej 6:14, 34, hem 7:12, hem palo odova vaćeren ando akala pućiba:
-
Kola savetija o Isus dinđa?
-
Da li odola savetija šaj te pomožinen amen avdije?
6. O Isus ćerđa čudija
O Jehova dinđa moć e Isusese te ćerel but čudija. Te šaj te dikhen jekh asavko primer, čitinen Marko 5:25-34 ja dikhen o VIDEO. Palo odova vaćeren ando akala pućiba.
-
Ko so i romni verujinđa?
-
So sviđini pe tuće ko akava čudo?
Čitinen Jovan 5:36, hem palo odova vaćeren ando akava pućibe:
-
So e Isusese čudija mothovđe olestar?
Da li đanđan?
Kotar Isus šaj but te sikljova ando štar e biblijake knjige kola vićinena pe Jevanđelja. Odola tane o Matej, o Marko, o Luka hem o Jovan. Svako pisco vaćerđa diso so avera piscija na vaćerđe. Ked čitinaja soštar knjige šaj te ovel amen celo slika ando Isuseso životi.
-
O MATEJ
Ov hine prvo kova pisinđa o jevanđelje. Ko odova jevanđelje but vaćeri pe ando Isusese sikljoviba, posebno ando odova so o Isus sikavđa kotar Devleso Kraljevstvo.
-
O MARKO
Oleso jevanđelje tano najtikno, sigate nakhela kotar jekh događaj ko aver hem but vaćeri ando odova so o Isus ćerđa.
-
O LUKA
Mothovi kobor i molitva hine važno e Isusese hem kobor o Isus hine šukar premalo romnja.
-
O JOVAN
Mothovi amenđe sostar o Isus vaćerđa pe amalencar hem avere manušencar. Oleso jevanđelje pomožini amen te dikha kobor o Isus hine šukar manuš.
AKO NEKO PHENELA: „O Isus hine samo jekh šukar prorok.“
-
So tu mislineja odolestar?
SO SIKLJILJAM
O Isus vaćerđa ando Devleso Kraljevstvo, ćerđa but čudija hem uvek šunđa e Jehova.
Te ponovina
-
So hine najvažno e Isusese ked hine ki phuv?
-
So mothovena o čudija kola o Isus ćerđa?
-
Kola šukar savetija o Isus dinđa e manušenđe?
RODE POBUTER
Sostar o Isus najviše vaćerđa?
„Sose e Devleso Kraljevstvo tano važno e Isusese?“ (Stražarska kula, 1. oktobar 2014)
Dikh sose šaj te ova sigurna so o Isus ćaće ćerđa čudija.
„So šaj te sikljova ando čudija kola o Isus ćerđa?“ (Stražarska kula, 15. jul 2004)
Čitin sar jekh manuš menjinđa pe ked sikljilo kobor o Isus brininđa pe ando manuša.
Dikh o najvažna buća kola o Isus ćerđa kola tane pisime ađahar sar so ulje.
„O najvažna događaja kotar Isuseso životi ki phuv“ (Sveto pismo – prevod Novi svet, Dodatak A7)
a Ando Devleso Kraljevstvo pobuter ka sikljova kotar 31-33. lekcija.
Dikhen hem akava
NAJČEŠĆA PUČIBA
Sar izgledini jekh biblijako kurs ando Jehovase svedokija?
O proučibe tano besplatno, šaj te koristinen o prevod andi Biblija kova tumen mangena hem ko kurs šaj te vićinen celo tumare porodica ja nekas ando tumare amala.
