6. LEKCIJA
Sar ulo o životi?
„Tutar [Devla] avela o životi“ (Psalam 36:9). Da li verujineja ko odova? Disave manuša mislinena so o životi ulo kokri pestar. Ako tano odova ađahar, odova značini so amen uljam slučajno. Ama, ako o Devel stvorinđa o životi, sigurno isi le disavi namera. a Hajde te dikha so i Biblija phenela sar ulo o životi hem sose šaj te verujina ko odova so oj phenela.
1. Sar ulo o svemir?
Ki Biblija pisini: „Ko početko, o Devel stvorinđa o nebo hem i phuv“ (Postanak 1:1). But naučnikija složinena pe so o svemir hine le početak. Sar o Devel stvorinđa le? Ov koristinđa pi sila, po sveti duh, te ćerel sa so isi ko svemir – o galaksije, o ćerenja hem o planete (Postanak 1:2).
2. Sose o Devel ćerđa i phuv?
O Jehova „na stvorinđa [i phuv] bizo razlog, već ćerđa la ađahar te šaj o manuša te živinen upro late“ (Isaija 45:18). Ov ćerđa i phuv te ovel šukar than aso životi hem te ovel len sa so valjani te živinen večno. (Čitinen Isaija 40:28; 42:5.) O naučnikija phenena so i phuv tani posebno hem soj tani averćhane ando avera planete. On na arakhlje nijekh aver planeta koja isi la sa so valjani te šaj o manuš te živini upro late.
3. Savi razlika isi maškaro manuša hem o životinje?
Palo odova so stvorinđa i phuv, o Jehova stvorinđa o biljke hem o životinje. A palo odova „stvorinđa e manuše premali pi slika.“ (Čitinen Postanak 1:27.) Sose tane o manuša averćhane ando sa aver so o Devel stvorinđa? Odolese so hijam stvorime premali e Devlesi slika, amen šaj te mothova o mangipe hem i pravda sar ov. Isto ađahar, amen hijam stvorime te sikljova avera ćhibja, te uživina ko šukar buća hem ki muzika. Amen šaj te ćera pana diso so o životinje našti – te ova amala e Devleja.
SIKLJOV POBUTER
Dikh o dokazija kola mothovena soj tano sa stvorimo hem dikh da li odova so i Biblija phenela ando stvaranje tano logično. Dikh so o osobine kola isi amen sar manuša sikavena amen ando Devel.
4. Sa so dikhaja okolo amende tano stvorimo
O manuša dobinena priznanje aso odova so ćerđe, ama odova kopirinđe andi priroda. Ama, kase valjani te del pe priznanje aso buća kola tane ki priroda? Dikhen o VIDEO, hem palo odova vaćeren ando akava pućibe:
-
So o inženjerija kopirinđe andi priroda?
Aso svako ćher neko valjanđa te ćerel plan sar ka izgledini hem premalo odova te ćerel le. Ama, ko planirinđa hem ćerđa sa so isi amen ki priroda? Čitinen Jevrejima 3:4, hem palo odova vaćeren ando akala pućiba:
-
So najviše sviđini pe tuće ki priroda?
-
Da li tano logično te verujina so o svemir hem sa so isi koro leste neko stvorinđa? Sose mislineja ađahar?
Da li đanđan?
O člankija hem o video-materijali andi akija tema šaj te arakhe ko sajt jw.org ko rubrike „Da li je to neko osmislio?“ hem „Poreklo života“.
„Sose svako ćher neko ćerđa, a okova kova sa ćerđa tano o Devel“
5. Odova so i Biblija vaćeri ando stvaranje tano logično
Ko prvo poglavlje ko Postanak pisini sar ulji i phuv hem sa so isi upro late. Da li šaj te verujina ko odova so pisini ki Biblija ili odova tano samo jekh paramiz? Dikhen o VIDEO, hem palo odova vaćeren ando akala pućiba:
-
Da li i Biblija phenela so i phuv hem sa so isi upro late hine stvorime aso šov doslovna dive?
-
Da li tano tuće logično soj tano sa stvorimo ađahar sar so i Biblija vaćeri? Sose mislineja ađahar?
Čitinen Postanak 1:1, hem palo odova vaćeren ando akava pućibe:
-
O naučnikija phenena so o svemir hine le početak. Sar odova složini pe odoleja so akana čitinđan ki Biblija?
Disave manuša pućena pe da li o Devel prekali evolucija stvorinđa o životi. Čitinen Postanak 1:21, 25, 27, hem palo odova vaćeren ando akava pućibe:
-
Da li i Biblija phenela so o Devel stvorinđa jekh jednostavno životno oblik hem palo odova mukhlja le te razvijini pe ko maćhe, ko avera životinje hem ko manuša, ili posebno stvorinđa svako vrsta? b
6. O manuša tane averćhane ando sa so o Devel stvorinđa
Amen hijam averćhane ando životinje kola o Jehova stvorinđa. Čitinen Postanak 1:26, hem palo odova vaćeren ando akava pućibe:
-
Amen hijam stvorime premali e Devlesi slika. So ando Devel mothovi tuće odova so o manuš šaj te mangel hem te mothovi saosećanje?
AKO NEKO PHENELA: „Odova so i Biblija vaćeri ando stvaranje tano samo paramiz.“
-
So tu mislineja? Sose mislineja ađahar?
SO SIKLJILJAM
O Jehova stvorinđa o svemir hem sa soj tano đivdo.
Te ponovina
-
So i Biblija vaćeri ando odova sar ulo o svemir?
-
Da li o Devel prekali evolucija mukhlja sa te razvijini pe ili stvorinđa sa premali olengi vrsta?
-
Sose tane o manuša averćhane ando sa aver so o Devel stvorinđa?
RODE POBUTER
Dikh disave primerija ki priroda kola mothovena so o Stvoritelj postojini.
Dikh sar jekh dad objasnini pe ćhavese sar hine sa stvorimo.
Čitin da li odova so pisini ki Biblija složini pe odoleja so sikavi i evolucija.
Dikh da li o fosilija hem o naučna eksperimentija mothovena so o životi hine stvorimo ja so ulo kokri pestar.
Kotar avela o životi – panđ pućiba kola zaslužinena odgovor (brošura)
a Ki 25. lekcija ka dikha sose o Devel stvorinđa e manušen.
b Ked ki Biblija koristini pe o lafi „vrsta“, odova uključini pobuter buća nego li ki nauka.
Dikhen hem akava
NAJČEŠĆA PUČIBA
Sar izgledini jekh biblijako kurs ando Jehovase svedokija?
O proučibe tano besplatno, šaj te koristinen o prevod andi Biblija kova tumen mangena hem ko kurs šaj te vićinen celo tumare porodica ja nekas ando tumare amala.
