KO JEKH tikno ostrvo ki Indonezija kova vićini pe Sangir Besar, živinena trin phenja. Angleder nekobor berš on ćerđe zajedno buti ki plaža. Ko odova ostrvo, on tane but penđarde sose đana but ki služba hem pomožinena e manušenđe te haljon i Biblija. Ama, akava puti on ćerđe diso aver.

Najangleder, on khuvđe ko pani hem lelje bare bara hem anđe len ki plaža. Disave bara hine bare sar jekh fudbalsko lopta. Palo odova, bešlje hine ki jekh kaštunali stolica hem čekićeja phaglje odola bare bara hem ćerđe len tikne sar jare. Onda ćhivđe len ki jekh plastično kofa hem morandilje upre ko stepenice te igaren len ko ćher kaj živinđe. Palo odova, odola bara ćhivđe ko bare gone te šaj te tovarinen pe ko kamioni hem te koristinen pe aso odova te gradinen pe drumija.

Jekh ando odola phenja hine i Hulda. Olake okolnostija dozvolinđe laće te ćerel poviše buti ando okola duj phenja. Uglavnom oj ćerđa buti te šaj olaki porodica te ovel la so valjani laće. Ama, akana hine la hem pana jekh cilj hem odolese ćerđa dodatna duj satija buti. Oj manglja te ćinel pese jekh tablet te šaj te ovel la i aplikacija JW Library^®. I Hulda đanđa so o videa hem avera buća ki aplikacija ka pomožinen la te ovel pana pošukar ki služba hem pana pošukar te proučini i Biblija.

I Hulda jekh tekvaš masek ćerđa buti po duj satija svako sabalje, te šaj te ćedel dovoljno bara te pherel o tikno kamioni. Ko krajo, hine la dovoljno pare aso tablet.

I Hulda phenela: „Iako akija buti but umorinđa man hem hine man rane ko vasta, sigate sa bisterđum ked počminđum te koristinav o tablet kova pomožinđa man te ovav pošukar ki služba hem polokho te spreminav man sastankonenđe.“ Oj pana phenđa so o tablet but pomožinđa la ki pandemija, sose hem o sastankija hem i služba hine prekalo internet. Ćaće radujinaja amen so i Hulda ispuninđa po cilj.