1. So najviše utičini upro odova save manuša ka ova?

 BIZO obzir da li krstinđam amen angleder nekobor dive ja već beršencar hijam krstime, sare mangaja te ova asavke manuša save o Jehova mangela. Ama, te šaj te ova asavke, valjani te pazina sostar razmislinaja. Sose? Odolese so odova sostar razmislinaja utičini ko odova so vaćeraja hem ćeraja. Ako uvek razmislinaja ando odova sar amenđe te ovel šukar, tegani ka phena ja ka ćera lošna buća (Ef. 4:17-19). Ki aver strana, ako razmislinaja ando šukar buća, verovatno ka vaćera hem ka ćera o buća kola ka radujinen amare Dade, e Jehova (Gal. 5:16).

2. Sostar ka vaćera ko akava članko?

² Sar so vaćerđam ko okova članko, disavo puti ka khuvel amenđe ki godi dijekh lošno misao. Ama, amen odlučinaja da li ka ćera odova ja na. Angleder te krstina amen, valjani te ćhinava te vaćera hem te ćera odova so o Jehova mrzini. Odija tani prvo hem najvažno buti koja valjani te ćera ked mangaja te huljava i purani ličnost. Ako mangaja te šuna e Jehova ko sa, valjani te ićera amen hem ki zapovest: „Uraven i nevi ličnost“ (Kol. 3:10). Ko akava članko, ka dobina odgovor ko akala pućiba: Soj tani „i nevi ličnost“? Sar šaj te urava la hem te arakha la?

3. Premalo Galatima 5:22, 23, soj tani „i nevi ličnost“ hem sar jekh osoba šaj te uravi la?

³ I osoba koja uravi i „nevi ličnost“ razmislini sar o Jehova hem ćerela o buća sar oleste. Ako mukhela e Devleso sveti duh te vodini la, oj ka ovel la o osobine  ando kola vaćeri pe ko Galatima 5:22, 23. (Čitin.) Na primer, asavki osoba mangela e Jehova hem olese narodo (Mat. 22:36-39). Oj tani radosno čak iako isi la pharipa (Jak. 1:2-4). Dela sa pestar te ćerel mir (Mat. 5:9). Oj tani strpljivo hem ljubazno averencar (Kol. 3:13). Uzo odova so mangela odova soj tano šukar, oj hem ćerela odova (Luka 6:35). O buća kola ćerela ko po životi mothovi so isi la zorali vera ko Jehova (Jak. 2:18). Ked avera holjanćerena la, oj tani blago hem mothovi samokontrola (1. Kor. 9:25, 27; Titu 3:2).

4. Sose valjani te mothova sa o osobine kola pominena pe ko Galatima 5:22, 23 hem ko avera stihija?

⁴ Te šaj te urava i nevi ličnost, valjani te barjaćera sa o osobine kola pominena pe ko Galatima 5:22, 23 hem ko avera stihija. * Akala osobine nane sar o šeja kola uraveja jekh po jekh. U stvari, akala hem avera osobine tane but povezime. Na primer, ako ćaće mangeja te pašutnen, tu ka ove strpljivo olencar hem ka ove šukar premalo olende. A ako ćaće mangeja te ove šukar manuš, valjani te ove blago hem te mothove samokontrola.

5. So značini „te razmislina sar o Hrist“ hem sose valjani te proučina ando oleso životi? (1. Korinćanima 2:16)

⁵ Čitin 1. Korinćanima 2:16. Te šaj te urava i nevi ličnost, amen valjani te „razmislina sar o Hrist.“ Avere lafencar, amen valjani te sikljova sar o Isus razmislini hem te oponašina le. O Isus savršeno mothovđa o osobine kola tane plod ando sveti duh. Sar so jekh ogledalo kova nane melalo hem phago mothovi save amen hijam, ađahar o Isus mothovđa amenđe savo tano o Jehova (Jevr. 1:3). So pobuter razmislinaja sar o Isus, pana pobuter ka ćera o buća sar oleste hem pana pošukar ka mothova olese osobine (Fil. 2:5).

6. So na valjani te bistra đi daja sa amendar te urava i nevi ličnost?

⁶ Da li amen ćaće šaj te ova sar o Isus? Šaj phenaja kokri amenđe: „O Isus hine savršeno! Me niked na ka ovav sar oleste!“ Ako osetineja tut ađahar, ma bistri  akala buća. Sar prvo, tu hijan ćerdo te ove sar o Jehova hem sar o Isus. Odolese, tu šaj te ove sar olende, barem đi ki jekh mera (Post. 1:26). Sar dujto, e Devleso sveti duh tani najzorali sila ko svemir. Ked oleso sveti duh pomožini tut, tu šaj te ćere odova so mislinđan so niked našti te ćere. Sar trito, o Jehova na očekujini tutar akana savršeno te mothove o osobine kola tane plod ando sveti duh. Okola so ka živinen večno ki phuv ka ovel len 1 000 berš te oven savršena (Otkr. 20:1-3). Odova so o Jehova akana rodela amendar tano te trudina amen hem te oslonina amen upro leste.

7. Sostar akana ka vaćera?

⁷ Sar šaj te oponašina e Isuse? Akana ka vaćera kotar štar osobine kola tane plod ando Devleso sveti duh. Ka dikha so šaj te sikljova ando odova sar o Isus mothovđa akala osobine hem ka dikha disave pućiba kola ka pomožinen amen te haljova kobor đi akana uspinđam te barjaćera o osobine kola tane deo andi nevi ličnost.

8. Sar o Isus mothovđa po mangipe?

⁸ Odolese so but manglja e Jehova, o Isus hine spremno te ćerel disave žrtve sebepi po Dad hem sebepi amaro (Jov. 14:31; 15:13). Odoleja sar živinđa ked hine ki phuv, o Isus mothovđa kobor mangela e manušen. Svako dive, mothovđa so mangela len hem hine saosećajno premalo lende, čak hem ked disave protivinđe pe olese. Jekh važno način sar mothovđa lenđe so mangela len tano ađahar so sikavđa len ando Devleso Kraljevstvo (Luka 4:43, 44). Isto ađahar, o Isus mothovđa so mangela e Devle hem e manušen ađahar so hine spremno te patini hem te merel amenđe. Ađahar phravđa amenđe o drumo te šaj večno te živina.

9. Sar šaj te mothovav mangipe sar o Isus?

⁹ Amen predajinđam amaro životi e Jehovase hem krstinđam amen sose mangaja le. Sar o Isus, odoleja save hijam premalo manuša ka mothova kobor mangaja e Jehova. O apostol Jovan pisinđa: „Ako neko na mangela pe phrale, kas dikhela, našti te mangel e Devle, kas na dikhela“ (1. Jov. 4:20). Šaj te puća amen: „Da li mangava e manušen? Da li hijum saosećajno premalo olende, čak iako on marena manđe muj? Da li odobor mangava e manušen so ka koristinav mo vreme hem odova so isi man te pomožinav averenđe te sikljon ando Jehova? Da li hijum spremno te ćerav akava, čak iako but olendar na ceninena odova so ćerava ja čak protivinena pe maje? Da li šaj pana pobuter te propovedinav?“ (Ef. 5:15, 16).

10. So o Isus ćerđa te ovel mir?

¹⁰ O Isus hine manuš kova uvek ćerđa te ovel mir. Ked o manuša hine lošna premalo leste, ov na irinđa lenđe. Ama, ov ćerđa hem diso pobuter. Ov na ađićerđa averendar te ćeren mir, već ov prvo ćerđa odova hem ohrabrinđa averen te rešinen o problemija kola hine len maškaro peste. Na primer, ov sikavđa e manušen so valjani prvo te pomirinen pe pekle phraleja ako mangena o Jehova te prihvatini olengi služba (Mat. 5:9, 23, 24). Isto ađahar, but putija pomožinđa e apostolenđe te haljon so na valjani te svađinen pe sebepi odova koj tano najbaro maškaro lende (Luka 9:46-48; 22:24-27).

11. So šaj te ćera te ovel mir?

 ¹¹ Te šaj te ćera te ovel mir, nane dovoljno samo te arakha amen te na khuva ko problemija nekasa. Valjani te da sa amendar te ćera te ovel mir hem te podstaknina amare phralen hem phenjen ked isi len problemi nekasa te rešinen le (Fil. 4:2, 3; Jak. 3:17, 18). Šaj te puća amen: „So hijum spremno te ćerav te šaj te ovav ko mir averencar? Ked jekh phral ja phen povredini man, da li ićerava i holi ano mande? Da li ađićerava averendar te aven te pomirinen pe mancar ja me prvo ćerava diso te ovel mir, čak iako me na ćerđum o problemi? Ked tano odova ko than, da li ohrabrinava averen kola isi len problemija te pomirinen pe jekh jekheja?“

12. Sar o Isus mothovđa soj tano obzirno?

¹² O Isus hine obzirno (Mat. 11:28-30). Ov mothovđa soj tano obzirno ađahar so hine blago hem razumno. Na primer, ked i Feničanka molinđa le te saćari olake ćhaja, ov ko početko na manglja te ćerel odova, ama ked oj mothovđa so isi la bari vera, ov saćarđa olake ćhaja (Mat. 15:22-28). Iako hine obzirno, odova na ćhinavđa le te del savet. Disavo puti, ov phravdo dinđa savet pe učenikonenđe. Na primer, ked o Petar phenđa lese te ovel šukar premalo peste, o Isus ukorinđa le anglo avera učenikija (Mar. 8:32, 33). Ov na ćerđa odova sose manglja te ponizini e Petare, već te sikavi le. Isto ađahar, ov manglja avera učenikija te haljon so valjani te podržinen le, a na te ćhinaven le te ćerel e Devlesi volja. O Petar sigurno osetinđa bari lađ, ama hem sikljilo diso odolestar.

13. Sar šaj te mothova so hijam obzirna?

¹³ Odova so hijam obzirna na značini so na valjani te da savet okolenđe kas mangaja. Ked ćereja odova, valjani te oponašine e Isuse ađahar so ka de len savet ando Devleso Lafi. Ov pažljivo premalo avera. Verujin so on mangena te ćeren odova soj tano ispravno, so mangena e Jehova hem tut hem so ka prihvatinen odova šukar savet. Puć tut: „Ked dikhava so neko kas mangava ćerela odova soj tano pogrešno, da li isi man hrabrost te phenav lese odova? Ako valjani nekase te dav savet, da li me lafija mothovena so hijum holjamo ja so haljovava odola osoba? Sose mangava te dav savet? Da li odova ćerava sose odija osoba nervirini man ja sose mangava te pomožinav la?“

14. Sar o Isus mothovđa šukaripe?

¹⁴ O Isus na samo so đanđa soj tano šukar, već hem ćerđa odova. Ov mangela pe Dade hem uvek ando vilo ćerela odova soj tano ispravno. O šukar manuš uvek ćerela odova soj tano šukar hem dikhela sar te pomožini averenđe. Nane dovoljno samo te đane soj tano šukar, već valjani ando vilo te ćere odova soj tano šukar. Neko šaj te pućel pe: „Da li šaj te ćerav diso soj tano šukar, ama te na ćerav odova ando vilo?“ Ja šaj. Na primer, o Isus phenđa so disave ko oleso vreme ćaće pomožinđe e ćororenđe, ama odova ćerđe te šaj avera te dikhen len hem te hvalinen len. Iako odova so ćerđe hine šukar, anglo Jehovase jaćha na hine odobor vredno (Mat. 6:1-4).

15. Sar šaj te mothova šukaripe?

¹⁵ Amen šaj te mothova šukaripe samo ako ando vilo ćeraja odova soj tano  šukar. Odolese, puć tut: „Da li samo đanava soj tano šukar ili ćerava odova? Ked mangava te ćerav diso soj tano šukar, sose ćerava odova?

16. So valjani te ćera svako dive hem sose?

¹⁶ Na valjani te mislina so palo krštenje, više na valjani te urava i nevi ličnost. Amen valjani te arakha i nevi ličnost sar ked arakhaja disavo nevo šej. Jekh način sar šaj te ćera odova tano ađahar so svako dive ka dikha sar šaj te mothova o osobine kola tane plod ando Devleso sveti duh. Sose? Odolese so o sveti duh tano e Devlesi aktivno sila koja podstaknini amen diso te ćera (Post. 1:2). Svako osobina valjani te podstaknini amen te ćera diso. Na primer, o učenik Jakov pisinđa: „I vera bizo delija tani muli“ (Jak. 2:26). Odova šaj te phena hem aso sa avera osobine. Svako puti ked mothovaja o osobine kola tane plod ando sveti duh, amen mothovaja so e Devleso duho pomožini amen.

17. So valjani te ćera ako disavo puti na mothovđam o osobine kola tane plod ando sveti duh?

¹⁷ Čak hem okola kola tane beršencar krstime, disavo puti na mothovena o osobine kola tane plod ando sveti duh. Ama, važno tano te da sa amendar hem ponodri te mothova odola osobine. Razmislin ando akava primer: Ako disavo šej kova but mangeja te akhare hari pharavdilo, da li odmah ka forde le? Na. Verovatno ka sive odova pharavdo than hem aver puti ka pazine. Isto ađahar, ako disavo puti na hijan le ljubazno, strpljivo ja na hijan le šukar premalo nekaste, ma obeshrabrin tut. Ando vilo izvinin tut odola osobaće te šaj palem te ove šukar olaja. De sa tutar te na ćere odova palem.

18. Ko so šaj te ove sigurno?

¹⁸ Amen hijam but zahvalna so šaj te sikljova ando Isuseso primer. So pobuter oponašinaja oleso način sar razmislini, polokho ka ovel amenđe te ćera o buća sar oleste. So pobuter ćeraja o buća sar oleste, pana pobuter ka mothova o osobine kola tane deo andi nevi ličnost. Ko akava članko vaćerđam ando štar osobine kola tane plod ando Devleso sveti duh. Šukar bi ovela te arakhe vreme te proučine hem avera osobine hem te razmisline sar šaj te mothove len. But člankija kola vaćerena odolestar šaj te arakhe ko Vodič kroz publikacije tema „Hrišćanski život“ hem palo odova „Plod duha“. Šaj te ove sigurno so ako deja sa tutar te urave i nevi ličnost hem ako arakheja la, o Jehova but ka pomožini tut.