1-2. Ked o Jehova ka prihvatini odova so ćeraja olese?

 SO AVELA tuće ki godi ked šuneja o lafija „služin e Devlese“? Šaj zamislineja sar jekh phral uzo po kreveti perela ko koćija hem phravela ko vilo e Devlese ki molitva. Ja šaj zamislineja jekha porodica sar zajedno proučinena i Biblija.

² Ko solduj situacije, odola manuša služinena e Jehovase. Da li o Jehova ka prihvatini odova so on ćerena? Ja, ako dena sa pestar te ćeren odova so ov rodela, ako mangena le hem ako poštujinena le. Amen but mangaja e Jehova hem đanaja so ov zaslužini te služina samo olese. Odolese mangaja te služina lese ko najšukar način.

3. Sostar ka vaćera ko akava članko?

³ Ko akava članko, ka dikha sar o Jehova manglja ko purano vreme o manuša te služinen olese hem ka dikha ko kola ofto načinija o Jehova avdije mangela te služina olese. Đi razmotrinaja odola buća, ka dikha sar šaj amen pana pošukar te služina e Jehovase hem sose ka ova bahtale ked služinaja olese ko ispravno način.

4. Sar o manuša ko purano vreme mothovđe so poštujinena hem mangena e Jehova?

⁴ Ko purano vreme, o verna manuša sar soj tane o Avelj, o Noje, o Avraham hem o Jov mothovđe so poštujinena e Jehova hem so mangena le. Sar ćerđe odova? On šunđe e Jehova, hine len vera ano leste hem  hine spremna te aćhaven but buća. Ko Devleso Lafi na pisini so sa valjanđe te ćeren. Ama, đanaja so on dinđe po najšukar e Jehovase hem ov prihvatinđa sa odova so ćerđe olese. Palo odova, prekalo Mojsije o Jehova dinđa o Zakon e Izraelcenđe. Odova Zakon mothovđa lenđe sar o Jehova mangela te služinen olese.

5. Palo Isuseso meribe hem uskrsenje, sar olese učenikija valjanđe te služinen e Jehovase?

⁵ Palo odova so o Isus mulo hem so uskrsninđa, o Jehova više na rodinđa ando manuša te ićeren pe ko Mojsijeso zakon (Rimlj. 10:4). Okola so služinđe lese valjanđe te ićeren pe ko nevo zakon, ko „Hristeso zakon“ (Gal. 6:2). On šaj hine te ićeren pe ko odova „zakon“, na ađahar so bi napamet sikljona le ja ađahar so bi ćerena pese jekh spisko so šaj, a so našti te ćeren. On valjanđe te den sa pestar te oven sar o Isus hem te ićeren pe ko olese sikljoviba. Amen avdije daja sa amendar te ova sar o Isus te šaj te ugodina e Jehovase hem te dobina „nevi snaga“ (Mat. 11:29).

6. Sar šaj te pomožini tuće akava članko?

⁶ Đi razmotrinaja ko kola ofto načinija avdije služinaja e Jehovase, puć tut: „Kobor napredujinđum đi akana? Da li šaj pana pošukar te služinav e Jehovase?“ Valjani te ove zadovoljno odoleja so đi akana ćerđan, ama valjani hem te moline e Jehova te pomožini tut te dikhe so šaj pana pošukar te ćere.

7. Sar o Jehova dikhela ko odova ked molinaja amen lese ando vilo?

⁷ Amen služinaja e Jehovase ked molinaja amen olese. Ki Biblija pisini so amare molitve tane sar o pažljivo pripremimo kad kova dinđa pe e Jehovase ko sveto šatori, a palo odova hem ko hram (Ps. 141:2). I miriš ando odova kad hine ugodno e Jehovase. Isto ađahar, ked ando vilo molinaja amen e Jehovase, odova tano ugodno olese, čak iako amare lafija tane jednostavna (Posl. 15:8; Pon. zak. 33:10). Šaj te ova sigurna so o Jehova tano bahtalo ked ki molitva phenaja lese kobor mangaja le hem kobor hijam lese zahvalna. Ov mangela te phena lese so mučini amen, sostar daraja hem so mangaja jekh dive te ovel. Angleder te moline tut, razmislin so bi mangeja te phene lese. Ako ćereja ađahar, tu ka de te nebesko Dadese najšukar „kad.“

8. Ked šaj te hvalina e Devle?

⁸ Amen služinaja e Jehovase ked vaćeraja olestar (Ps. 34:1). Amen hvalinaja e Jehova ked vaćeraja averenđe kola olese osobine hem o buća kola ov ćerđa posebno mangaja. Ked hijam zahvalna e Jehovase, amen šaj te hvalina le. Ako razmislinaja ando sa o šukar buća kola o Jehova ćerđa amenđe, ka ovel amen but razlogija te hvalina le. Ked propovedinaja, amen „daja e Devlese i žrtva andi hvala, avere lafencar o plod ando muj kova objavini oleso anav“ (Jevr. 13:15). Sar so angleder te molina amen e Jehovase valjani te razmislina so ka phena, ađahar valjani te razmislina hem sostar ka vaćera e manušencar ki služba. Amen mangaja amari „žrtva andi hvala“ te ovel amaro najšukar so šaj te da olese. Odolese amen pherde vileja vaćeraja e manušencar.

9. Sose tano šukar sar o Izraelcija hem amen te ćeda amen amare phralencar hem phenjencar? Vaćer sar tuće pomožinđe o sastankija.

 ⁹ Amen služinaja e Jehovase ked hijam ko sastankija. E Izraelcenđe hine phendo: „Trin putija ko berš sa o murša ando to narodo nek aven anglo Jehova, to Devel, ko than kova ov ka birini“ (Pon. zak. 16:16). On morandilje te mukhen pe ćhera hem pe njive hem na hine niko ko šaj hine te arakhi olenge buća. Ama, o Jehova dinđa len po lafi: „Niko na ka mangel te lel ti phuv ked trin putija ko berš ka đa anglo Jehova, to Devel“ (Izl. 34:24). Sebepi so verujinđe e Jehovase, o Izraelcija đelje te slavinen odola praznikija. Odolese hine len but blagoslovija: pana pošukar haljilje e Devleso Zakon, razmislinđe ando Jehovaso šukaripe hem hine okolencar kola služinđe e Jehovase (Pon. zak. 16:15). Ked daja sa amendar te ova ko sastankija hem amen isi amen slična blagoslovija. Zamislin samo kobor tano o Jehova bahtalo ked daja kratko hem pripremimo komentari.

10. Sose o đilja isi len važno than ki amari služba e Jehovase?

¹⁰ Amen služinaja e Jehovase ked đilabaja amare phralencar hem phenjencar (Ps. 28:7). Ko purano vreme, o đilja hine len but važno than ki služba e Devlese. O kralj David ćhivđa 288 Leviten te đilaben ko hram (1. Let. 25:1, 6-8). Avdije, amen šaj te mothova amaro mangipe premalo Devel ked ko sastankija đilabaja amare đilja. Nane važno da li đanaja šukar te đilaba. Na primer, ked vaćeraja „sare često grešinaja“, ama odova na ćhinavi amen te vaćera e phralencar hem e phenjencar hem te propovedina (Jak. 3:2). Isto ađahar, amen šaj te hvalina e Jehova ked đilabaja, čak iako mislinaja so na đanaja šukar te đilaba.

11. Premalo Psalam 48:13, sose valjani te arakha vreme te proučina e Devleso Lafi amare porodicaja?

¹¹ Amen služinaja e Jehovase ked proučinaja oleso Lafi hem ked sikavaja amare ćhaven olestar. Ko sabat o Izraelcija na ćerđe buti hem koristinđe odova dive te zorjaćeren po amalipe e Jehovaja (Izl. 31:16, 17). Tegani o roditeljija šaj hine te sikaven pe ćhaven ando Jehova hem ando oleso šukaripe. Isto ađahar hem amen avdije valjani te arakha vreme te čitina hem te proučina e Devleso Lafi. Ađahar služinaja e Jehovase hem odova pomožini amenđe te ova pana popaše oleja (Ps. 73:28). Ked zajedno sar porodica proučinaja e Devleso Lafi, amen pomožinaja amare ćhavenđe te oven paše amare nebesko Dadeja. (Čitin Psalam 48:13.)

12. Sar o Jehova dikhlja ki buti ando okola so ćerđe i oprema aso sveto šatori hem so sikljovaja odolestar?

¹² Amen služinaja e Jehovase ked gradinaja hem održinaja amare dvorane. I Biblija phenela so ked ćerđe pe o sveto šatori hem i oprema aso sveto šatori so odija hine „sveto buti“ (Izl. 36:1, 4). Ked avdije gradinena pe amare dvorane hem avera objektija, o Jehova ko odova dikhela sar sveto služba. But phralja hem phenja koristinena po vreme te gradinen amare objektija. Amen but ceninaja odova so on ćerena. Naravno, on hem propovedinena. Disave olendar čak mangena te oven pionirija. Ked odola phralja hem phenja dena i molba te oven pionirija, o starešine ka mothoven so podržinena len ađahar so ka odobrinen  olenge molbe. Bilo te đana te ćera disavi buti ki gradnja ja na, sare šaj te pomožina ked valjani diso te popravini pe ko amare objektija ja ked valjani te čistina len.

13. Sar valjani te dikha ko amare prilogija?

¹³ Amen služinaja e Jehovase ked daja amare dobrovoljna prilogija. O Izraelcija na valjanđe te aven anglo Jehova ćuće vastencar (Pon. zak. 16:16). On valjanđe te anen odova so šaj hine te den. Ađahar mothovđe soj tane zahvalna aso sa odova so o Jehova ćerđa olenđe. Sar šaj te mothova so mangaja e Jehova hem so hijam zahvalna aso odova so ov ćerela amenđe? Jekh način tano ađahar so ka da dobrovoljno prilog odobor kobor šaj. O apostol Pavle phenđa: „Ako neko dela ando vilo, odova tano ugodno e Devlese, sose ov mangela te da odova so šaj, a na odova so našti“ (2. Kor. 8:4, 12). E Jehovase nane važno kobor tano baro amaro prilog, već te da le ando vilo (Mar. 12:42-44; 2. Kor. 9:7).

14. Premalo Poslovice 19:17, sar o Jehova dikhela ko odova ked pomožinaja amare phralenđe?

¹⁴ Amen služinaja e Jehovase ked pomožinaja amare phralenđe hem phenjenđe. Ked o Izraelcija hine phravde vastese premalo ćorore, o Jehova dinđa po lafi so ka irini lenđe aso olengo šukaripe (Pon. zak. 15:7, 10). Svako puti ked pomožinaja amare phralese ja phenjaće, o Jehova ko odova dikhela samći olese diso ćerđam. (Čitin Poslovice 19:17.) Na primer, ked o Pavle hine ko phanlipe, o phralja ando Filipi bićhalđe lese sa so valjanđa lese. Ov phenđa so odova hine sar „žrtva koja o Jehova prihvatini sose tani pali olesi volja“ (Fil. 4:18). Razmislin te phralendar hem te phenjendar hem puć tut: „Kase šaj te pomožinav?“ O Jehova tano bahtalo ked dikhela so amaro vreme, snaga, sposobnostija hem materijalna buća koristinaja te pomožina amare phralenđe. Ov ko odova dikhela sar deo andi amari služba (Jak. 1:27).

15. Sose nane amenđe pharo te koristina amaro vreme hem amari snaga te služina e Jehovase?

¹⁵ Te šaj te služina e Jehovase valjani amenđe vreme hem snaga. Ama, amenđe nane pharo te služina lese sose mangaja le (1. Jov. 5:3). Zamislin sar jekh tikno ćhavo mangela te del diso pe dadese. Šaj valjanđa lese but vreme te crtini lese diso. Odole tiknese na ka ovel žao sose but vreme đelo lese ko odova. Ov mangela pe dade hem bahtalo tano so šaj te del le odova poklon. Isto ađahar, sebepi so mangaja e Jehova, amen hijam bahtale so šaj te koristina amaro vreme hem amari snaga te služina olese.

16. Premalo Jevrejima 6:10, sar o Jehova dikhela ko odova so svako amendar ćerela?

¹⁶ O roditeljija na očekujinena so svako ćhavo ka del len isto poklon. On haljona so svako ćhavo tano averćhane hem đanena so svako olendar šaj te ćerel. Isto ađahar, amaro nebesko Dad đanela so svako amendar šaj te ćerel. Možda tu šaj te ćere pobuter ando avera. Ja možda našti te ćere odobor sar avera, sebepi te berša, to sastipe ja te porodična odgovornostija. Ama, ma obeshrabrin tut (Gal. 6:4). O Jehova na ka bistrel odova so ćereja lese. Ako ando vilo deja to najšukar e Jehovase, ov ka ovel zadovoljno  tuvaja. (Čitin Jevrejima 6:10.) O Jehova čak đanela hem odova so bi tu mangeja te ćere. Ov mangela te ove bahtalo hem zadovoljno odoleja so šaj te ćere olese.

17. (a) So šaj te ćera ako tano amenđe pharo te ćera diso ando akala ofto buća? (b) Koja ando akala buća tuće najviše pomožinđa? (Dikh o okvir „ Sar šaj te ova bahtale?“)

¹⁷ So ako tano amenđe pharo te ćera diso ando akala ofto buća, na primer te čitina i Biblija ja te đa ki služba? So pobuter ćeraja odola buća, pana pobuter ka uživina hem pana pobuter ka pomožinen amen. Odova tano sar ked mangaja te počmina redovno te vežbina ja te sikljova te bašala disavo instrumenti. Ako odova ćeraja samo podijekh puti, na ka napredujina but. Ama, zamislin so ka ovel ako odova ćeraja svako dive. Ko početko, odova šaj te ćera samo nekobor minutija ko dive, ama hari po hari odova šaj te ćera pana pobuter. Ked dikhaja so šukar đala amenđe, amen jedva ka ađićera te vežbina ja te bašala hem ka uživina. Isto odova šaj te ćera ked tano amenđe pharo te ćera diso ando akala ofto buća.

18. Koja tani i najvažno buti koja šaj te ćera hem sose?

¹⁸ I najvažno buti koja šaj te ćera tani te služina e Jehovase celone vilea. Sebepi odova, amen ka ova bahtale hem večno ka služina lese (Posl. 10:22). Već akana isi amen mir ko vilo sose đanaja so o Jehova pomožini amen te ikljova ko krajo amare problemencar (Is. 41:9, 10). Isto ađahar, već akana šaj te ova bahtale sose služinaja amare Dadese kova tano dostojno „te primini i slava, i čast hem i moć“ (Otkr. 4:11).