46. ČLANKO PROUČIBASE
ĐILI 49 Te ćera e Jehova radosno
Da li isi tut cilj te ove sluga pomoćniko?
Pobuter isi bahtalipe ked dela pe nego ked lela pe (DELA 20:35)
SO KA SIKLJOVA?
Akava članko ka podstaknini e phralen te ovel len želja te oven sluge pomoćnikija hem te trudinen pe te ispuninen o uslovija aso odova.
1. So o apostol Pavle mislinđa ando sluge pomoćnikija?
O SLUGE pomoćnikija ćerena but važno buti ki skupština. O apostol Pavle but ceninđa odole verno phralen. Na primer, ked pisinđa e hrišćanenđe ko Filipi, ov posebno pozdravinđa olen hem e starešinen (Fil. 1:1).
2. So phenđa o Luis palo odova so ulo sluga pomoćniko?
2 But phralja, bizo obzir da li tane terne ili phure, tane ćaće radosna so šaj te služinen sar sluge pomoćnikija. Na primer, o Devan hine le 18 berš ked hine naimenujimo. Ki aver strana, o Luis hine naimenujimo palo odova so pherđa 50 berš. Sar osetinđa pe ked ulo sluga pomoćniko? Ov phenđa: „But hijum bahtalo so šaj te služinav me phralenđe ko asavko način. On mothovđe maje baro mangipe, odolese akana tano mo redo te mothovav lenđe kobor mangava len.“ But sluge osetinena pe sar oleste.
3. Sostar ka vaćera ko akava članko?
3 Ako hijan krstimo phral hem pana na hijan sluga pomoćniko, sose na bi ćhiveja tuće odova cilj? So šaj te podstaknini tut te ćere odova? Kola tane e biblijake uslovija te šaj te služine sar sluga pomoćniko? Ko akava članko ka dobina odgovor ko akala pućiba. Ama, najangleder ka dikha koja uloga isi le jekh sluga pomoćniko.
KOJA ULOGA ISI LE JEKH SLUGA POMOĆNIKO?
4. Koja uloga isi le jekh sluga pomoćniko? (Dikh i slika.)
4 O sluga pomoćniko tano jekh krstimo phral kova tano prekalo sveti duh naimenujimo te pomožini e starešinenđe ađahar so ka ćerel but važna buća ki skupština. Disave sluge brininena pe ando odova da li o objaviteljija isi len dovoljno područje hem literatura asi služba. Avera pomožinena te čistini pe hem te održini pe i dvorana. Isto ađahar, ko sastankija služinena ki pomoćno služba hem ko audio-video. Iako pobaro deo ando olenge zadatkija tane tehnička buća, najangleder tane duhovna manuša. On mangena e Jehova, živinena premalo olese merilija hem but mangena e phralen hem e phenjen (Mat. 22:37-39). Sar šaj jekh krstimo phral te ispunini o uslovija te ovel sluga pomoćniko?
O sluge pomoćnikija oponašinena e Isuse ađahar so spremno brininena pe ando averenge potrebe (Dikh o 4. odlomko)
5. So valjani te ćerel jekh phral ako mangela te služini sar sluga pomoćniko?
5 Ki Biblija pisini kola uslovija jekh phral valjani te ispunini te šaj te ovel sluga pomoćniko (1. Tim. 3:8-10, 12, 13). Ako mangeja te služine sar sluga pomoćniko, trudin tut te haljove kola tane odola uslovija hem te ispunine len. Ama, najangleder šukar razmislin sose mangeja te ove sluga pomoćniko.
SOSE MANGEJA TE OVE SLUGA POMOĆNIKO?
6. So valjani te podstaknini tut te služine te phralenđe hem te phenjenđe? (Matej 20:28; dikh i slika.)
6 Razmislin ando amaro najšukar primer, o Isus Hrist. Ov sa ćerđa sebepi o mangipe premalo manuša hem premalo Jehova. Odova mangipe podstakninđa le te ovel bućarno hem čak te ćerel disave tikne zadatkija kola anglo averenge jaćha na hine odobor važna. (Čitin Matej 20:28; Jov. 13:5, 14, 15.) Ako hem tu sa ćereja ando mangipe, o Jehova ka blagoslovini tut hem ka pomožini tut te ispunine to cilj te ove sluga pomoćniko (1. Kor. 16:14; 1. Petr. 5:5).
Pe primereja o Isus sikavđa pe apostolen ponizno te služinen averenđe, a na te roden disave ugledna thana (Dikh o 6. odlomko)
7. Sose nane šukar jekh phral te mangel te ovel naimenujimo samo te šaj avera te hvalinen le?
7 Ko sveto, o manuša često divinena pe okolenđe kola istakninena pe. Ama, odova nane ađahar ki Jehovasi organizacija. Jekh phral kova mangela averen sar o Isus, na mangela te vladini upro avera niti avera te divinen pe lese. Ako jekh osoba koja tani ponosno ovela naimenujimi, oj na ka mangel te ćerel disave tikne zadatkija ki skupština kola tane neophodna te šaj te mothovi pe briga aso Jehovase bakre. Šaj ka mislini soj tani but važno te ćerel asavke zadatkija (Jov. 10:12). O Jehova na ka blagoslovini okole ko ćerela o buća samo te bi vazdela pes (1. Kor. 10:24, 33; 13:4, 5).
8. Savo savet o Isus dinđa pe apostolenđe?
8 Podijekh puti, čak hem e Isusese paše amala manglje te dobinen disave zadatkija, ama na hine len ispravna motivija. Razmislin so ćerđe o apostolija o Jakov hem o Jovan. On rodinđe ando Isus te del len posebna thana ko po Kraljevstvo. O Isus na pohvalinđa len sebepi odova. Umesto odova, ov phenđa e dešuduje apostolenđe: „Ko mangela te ovel baro maškaro tumende, nek ovel tumenđe sluga, hem ko mangela te ovel prvo maškaro tumende, nek ovel sarinenđe robo“ (Mar. 10:35-37, 43, 44). O phralja kola isi len ispravno motivi, avere lafencar isi len želja te služinen e phralenđe, ka oven baro blagoslov e skupštinaće (1. Sol. 2:8).
SO ŠAJ TE POMOŽINI TUT TE OVEL TUT ŽELJA TE SLUŽINE AVERENĐE?
9. So šaj te pomožini tut te ovel tut želja te služine averenđe?
9 Tu sigurno mangeja e Jehova hem mangeja te služine averenđe. Ama, šaj nane tut želja te ćere o buća kola ćerela jekh sluga pomoćniko. So šaj te pomožini tut te ovel tut želja te služine averenđe? Razmislin kobor samo ka ove radosno odolese so ka služine te phralenđe. O Isus phenđa: „Pobuter isi bahtalipe ked dela pe nego ked lela pe“ (Dela 20:35). Ov živinđa premalo akava načelo. Ov hine but radosno odolese so služinđa averenđe, a hem tu ka ove.
10. Sar o Isus mothovđa so hine bahtalo so služini averenđe? (Marko 6:31-34).
10 Ka razmotrina jekh primer kova mothovi so o Isus hine bahtalo so služinđa averenđe. (Čitin Marko 6:31-34.) Jekh puti, ov hem olese apostolija hine but umorna. On pođinđe te đan ko jekh mirno than te odmorinen pe. Ama, o manuša reslje angleder olende uduri sose nadinđe pe so o Isus ka sikavi len. O Isus šaj hine te phenel lenđe so našti sose ov hem olese amala „na hine len vreme ni maro te han“. Ki aver strana, šaj hine te sikavi len samo nekobor buća hem te bićhali len ćhere. Ama, o mangipe podstakninđa le „te sikavi len ando but buća“ hem odova đi kasno raćate (Mar. 6:35). Odova ćerđa na sose morandilo nego sose „sažalinđa pe upro lende“. O Isus ćaće but manglja e manušen hem odolese manglja te sikavi len. Odova so služinđa averenđe anđa lese bari radost.
11. Sar o Isus pomožinđa e manušenđe ko jekh praktično način?
11 O Isus pomožinđa e manušenđe ađahar so sikavđa len ando Devel, ama hem ko disave praktična načinija. Prekalo jekh čudo obezbedinđa lenđe hrana hem phenđa pe apostolenđe te den len (Mar. 6:41). Odoleja sikavđa pe učenikonen sar te služinen averenđe. Isto ađahar, odija hine prilika te mothovi lenđe soj tano but važno te ćeren diso konkretno averenđe, a o sluge pomoćnikija baš odova ćerena. Zamislin samo kobor o apostolija hine bahtale so šaj hine te pomožinen e Isusese te del hrana akale manušenđe hem ked dikhlje so „sare halje hem ćaljilje“ (Mar. 6:42). Naravno, akava nane jedino puti ked o Isus averenge potrebe ćhivđa anglo pe potrebe. Ov celo po životi đi hine ki phuv služinđa e manušenđe (Mat. 4:23; 8:16). But hine bahtalo so šaj hine te sikavi averen hem te brinini pe ando olenge potrebe. Tu isto ka ove but bahtalo ako hijan spremno te služine averenđe sar sluga pomoćniko.
O mangipe premalo Jehova hem i želja te služine averenđe ka podstaknini tut te de sa tutar te služine ki skupština (Dikh o 11. odlomko) a
12. Sose niko amendar na valjani te mislini so nane le nisavi sposobnost kolaja bi pomožini ki skupština?
12 Ako mislineja so nane tut nisavi posebno sposobnost, ma obeshrabrin tut. Sigurno isi tut disave osobine kola šaj te koristine te pomožine ki skupština. Razmislin ando odova so phenđa o Pavle ki 1. Korinćanima 12:12-30 hem molin e Jehova te pomožini tut te haljove sar odova primenini pe upro tute. E Pavlese lafija jasno mothovena so tu, sar sa avera e Jehovase sluge, valjaneja e skupštinaće hem hijan but dragoceno. Ako pana na ispunineja o uslovija te služine sar sluga pomoćniko, ma odustajin. Umesto odova, trudin tut pobuter te služine e Jehovase hem te pomožine te phralenđe. Ov sigurno so starešine ka razmislinen tutar hem ka den tut disavo zadatko kova šaj te ćere (Rimlj. 12:4-8).
13. Sose nane but pharo neko te ispunini o uslovija te ovel sluga pomoćniko?
13 Razmislin ando pana jekh razlog sose valjani te trudine tut te ove sluga pomoćniko. But osobine kola valjani jekh sluga pomoćniko te ovel le tane u stvari o osobine kola sa o hrišćanija valjani te oven len. Sare valjani te ova paše e Jehovaja, te ova radosna ked daja averenđe hem te živina sar so ov mangela. Odolese, verovatno već isi tut but osobine kola jekh sluga pomoćniko valjani te ovel le. So konkretno valjani te ćerel jekh phral te šaj te ovel sluga pomoćniko?
SO VALJANI TE ĆERE TE ŠAJ TE OVE SLUGA POMOĆNIKO?
14. So značini te zaslužine „averengo poštovanje“? (1. Timoteju 3:8-10, 12)
14 Akana ka razmotrina disave ando uslovija kola pominena pe ki 1. Timoteju 3:8-10, 12. (Čitin.) Jekh sluga pomoćniko valjani „te [zaslužini] averengo poštovanje“. Odova na značini so ov niked na ka asal ili na ka šalini pe (Prop. 3:1, 4). Ama, ov valjani te dikhel ozbiljno ko pe odgovornostija. Ako hijan penđardo sar pouzdano manuš, i skupština ka poštujini tut.
15. So o sluge pomoćnikija na valjani te ćeren hem so odova značini?
15 „Na valjani te oven dujemujenge.“ Odova značini so tu hijan iskreno, pošteno hem pouzdano. Ićereja tut ko to lafi hem na hovaveja averen (Posl. 3:32). Na valjani „te mangen pare hem te dikhen samo olenđe te ovel šukar“. Odova značini so hijan pošteno ked ćereja disave poslovna dogovorija averencar ili ked valjani te ćere buti parencar. Isto ađahar, odova značini so na ka iskoristine e phralen hem e phenjen te šaj te zaradine pare.
16. (a) So značini odova so „na valjani te pijen but vino“? (b) So značini te ovel len „čisto savest“?
16 „Na valjani te pijen but vino.“ Odova značini so na pijeja but alkohol hem na hijan penđarutno sar neko ko but pijela. Odova so isi tut „čisto savest“ značini so ićereja tut ko Jehovase merilija. Iako na hijan savršeno, tu hijan paše e Jehova hem odolese isi tut unutrašnjo mir.
17. So značini odova so o phralja „valjani te oven iskušime te dićhol da li tane šukar asi odija služba“? (1. Timoteju 3:10; dikh i slika.)
17 „Valjani te oven iskušime te dićhol da li tane šukar asi odija služba.“ Odova značini so tu već mothovđan so hijan pouzdano ked dobineja disavo zadatko. Odolese, ked o starešine dena tut disavo zadatko sledin olenge smernice hem o uputstvija kola avena andi organizacija. Trudin tut te haljove so tačno valjani te ćere hem ked valjani odova te ovel gotovo. Ako šukar ćereja te zadatkija o phralja ki skupština ka primetinen odova hem ka dikhen so napredujineja. A tumen phraljalen kola služinena sar starešine, den obuka e krstime phralenđe. (Čitin 1. Timoteju 3:10.) Da li ki tumari skupština isi krstime phralja kola isi len kotar 10 đi o 15 berš ja pohari? Da li isi len redovno lično proučavanje hem da li šukar spreminena pe aso sastankija? Da li redovno komentarišinena ko sastankija hem đana ki služba? Ako ja, den len zadatkija kola šaj te ćeren premalo pe berša. Ađahar o terne phralja ka oven „iskušime“. Posle, ked ka oven hari pobare, on verovatno ka ispuninen o uslovija te služinen sar sluge pomoćnikija.
Ked o starešine dena zadatkija e krstime phralenđe, on mangena „te dikhen da li tane šukar asi odija služba“ (Dikh o 17. odlomko)
18. So značini odova so tutar „nane ništa lošno so šaj te phenel pe“?
18 „Nane ništa lošno so šaj te phenel pe olendar.“ Odova značini so niko našti te phenel so ćereja diso so nane šukar. Naravno neko šaj nekas lažno te optužini. E Isusese odova desinđa pe hem ov prorekninđa so hem olese sledbenikonenđe odova ka desini pe (Jov. 15:20). Ama, ako trudineja tut sar o Isus te aćhove čisto ka ovel tut šukar anav ki skupština (Mat. 11:19).
19. So značini odova so o ženime phralja „valjani te ovel len samo jekh romni“?
19 „Valjani te ovel len samo jekh romni.“ Ako hijan ko brako tu ićereja tut ko odova so o Jehova phenđa so o brak valjani te ovel maškaro jekh rom hem jekh romni (Mat. 19:3-9). Jekh hrišćanin na valjani niked te ćerel nemoral (Jevr. 13:4). Odova isto značini so ov valjani uvek te ovel verno pe romnjaće hem niked na valjani te oven le romantična osećanja premali aver romni (Jov 31:1).
20. Sar šaj jekh phral šukar te predvodini pe ćhaven hem pe porodica?
20 „Valjani šukar te predvodinen pe ćhaven hem pe porodica.“ Ako hijan poglavari, valjani ozbiljno te dikhe ki odija odgovornost. Nek ovel tut redovno porodično proučavanje. Često đa ki služba te romnjaja hem te ćhavencar. Pomožin te ćhavenđe te oven paše e Jehovaja (Ef. 6:4). O manuš kova brinini pe andi pi porodica mothovi so šaj te brinini pe hem andi skupština. (Uporedin e stihoja andi 1. Timoteju 3:5.)
21. So šaj te ćere ako pana na služineja sar sluga pomoćniko?
21 Phraljalen, ako pana na služinena sar sluge pomoćnikija, molinaja tumen pažljivo čitinen akava članko hem molinen tumen e Jehovase u vezi akava. Proučin ando uslovija hem trudin tut te ispunine len. Razmislin odolestar kobor mangeja e Jehova hem te phralen hem te phenjen. Nek ovel tut pobari želja te služine lenđe (1. Petr. 4:8, 10). Ako trudineja tut te ove sluga pomoćniko, ka dikhe kobor bari radost šaj te anel tuće odova so ka služine te phralenđe. Nek o Jehova blagoslovini to trud! (Fil. 2:13).
ĐILI 17 „Mangava“
a SO DIKHAJA KI SLIKA: Ki levo strana, o Isus ponizno služini pe učenikonenđe; ki desno strana, jekh sluga pomoćniko pomožini jekhe phure phralese ki skupština.
