1-2. Ko hine o Sadok? (1. Letopisa 12:22, 26-28)

 ZAMISLIN akija situacija. Prekalo 340 000 manuša ćedinđe pe te ćhiven e Davide te ovel kralj ko Izrael. Trin dive hine uzi planina Hevron. Uduri asandilje, vaćerđe hem đilencar hvalinđe e Jehova (1. Let. 12:39). Maškaro lende hine jekh terno ćhavo kova vićinđa pe Sadok. But đene ni na primetinđe so ov hine uduri. Ama, o Jehova dikhlja le hem manglja amen te đana so ov hine uduri. (Čitin 1. Letopisa 12:22, 26-28.) Ama, ko hine o Sadok?

² O Sadok hine svešteniko hem služinđa e Jehovase zajedno e prvosveštenikoja e Avijatareja. Isto ađahar, o Jehova dinđa le mudrost hem sposobnost te haljol soj tani olesi volja (2. Sam. 15:27). Ked e manušenđe valjanđa disavo savet, on pućlje e Sadoke. Ov hine hem but hrabro manuš. Ko akava članko ka dikha sar ov mothovđa odija osobina.

3. (a) Sose e Jehovase sluge valjani te oven hrabra? (b) Sostar ka vaćera ko akava članko?

³ Ko akala poslednja dive, o Satana pana pobuter napadini e Devlese narodo (1. Petr. 5:8). Amen valjani te ova hrabra đi ađićeraja o Jehova te uništini e Satana hem akava lošno sveto (Ps. 31:24). Akana ka dikha ko kola trin načinija hem amen šaj te ova hrabra sar o Sadok.

PODRŽIN E DEVLESO KRALJEVSTVO

4. Sose e Jehovase narodose valjani hrabrost te šaj te podržini e Devleso Kraljevstvo? (Dikh i slika.)

⁴ Sar e Jehovase sluge, amen mangaja celone vileja te podržina e Devleso Kraljevstvo. Ama, but putija valjani amenđe hrabrost te šaj te ćera odova (Mat. 6:33). Na primer, ko akava lošno sveto valjani amenđe hrabrost te šaj te ićera amen ko Jehovase merilija hem te propovedina i šukar vest (1. Sol. 2:2). Isto ađahar, o sveto tano but podelimo sebepi o politička buća. Odolese, valjani te ova  hrabra hem te na ićera nikasi strana (Jov. 18:36). But ando Jehovase sluge isi len finansijska problemija, maltretirime tane ja ćhivde ko phanlipe sose na mangena te mešinen pe ki politika ja te đan ki vojska.

5. Sose e Sadokese valjanđa hrabrost te pomožini e Davidese?

⁵ O Sadok na đelo ko Hevron samo odolese so o David ulo kralj. Ov lelja peja po oružje hem hine spremno aso maribe (1. Let. 12:38). Hine spremno te đal e Davideja hem te branini e Izraelcen ando dušmanija. O Sadok verovatno na hine iskusno ratniko, ama hine hrabro manuš.

6. Sar o David aćhavđa šukar primer andi hrabrost e Sadokese? (Psalam 138:3)

⁶ Kastar o Sadok, kova služinđa sar sveštenik, sikljilo te ovel odobor hrabro? Ov đanđa bute manušen kola hine zorale hem hrabra. Sigurno sikljilo but buća olendar. Na primer, odolese so o David hine odobor hrabro vođa hem ratniko, sa o Izraelcija manglje ov te ovel olengo kralj (1. Let. 11:1, 2). O David uvek osloninđa pe upro Jehova ked valjanđa te borini pe protiv pe dušmanija. (Ps. 28:7; čitin Psalam 138:3.) O Sadok sikljilo hem kotar avera manuša sar soj tane o Jodaj, oleso ćhavo kova hine ratniko o Venaja hem o 22 zapovednikija kotar olesi plemensko porodica kola hine ki Davidesi strana (1. Let. 11:22-25; 12:26-28). Sa akala manuša manglje o David te ovel olengo kralj hem dinđe sa pestar te zaštitinen le.

7. (a) So šaj te sikljova ando terne phralja kola tane hrabra? (b) So šaj te sikljova ando phral Nsilu kova pomini pe ko video?

⁷ But ohrabrini amen odova so razmislinaja ando okola so hrabro podržinđe e Jehova hem oleso Kraljevstvo. Ked hine  ki phuv, amaro Kralj o Isus Hrist na manglja te mešini pe ki politika (Mat. 4:8-11; Jov. 6:14, 15). Ov uvek osloninđa pe upro Jehova. Isto ađahar, ko amaro vreme but terne phralja na mangena te đan ki vojska hem te mešinen pe ki politika. Sose ne bi čitineja olenge iskustvija ko amaro sajt? a

POMOŽIN E PHRALENĐE

8. Ked e starešinenđe šaj valjani hrabrost te pomožinen e phralenđe?

⁸ E Jehovase sluge mangena te pomožinen jekh jekhese (2. Kor. 8:4). Ama, disavo puti te šaj te ćeren odova valjani lenđe hrabrost. Na primer, ked isi maribe, o starešine haljona so e phralenđe valjani ohrabrenje, podrška, duhovno hrana hem avera buća sar soj tane habe, šeja hem than kaj te oven. Odolese so mangena len, o starešine disavo puti čak rizikujinena po životi sebepi olengo (Jov. 15:12, 13). Ked odova ćerena, on oponašinena e Sadokeso primer andi hrabrost.

9. Premali 2. Samuilova 15:27-29, so o David phenđa e Sadokese te ćerel? (Dikh i slika.)

⁹ E Davideso životi hine ki opasnost. Oleso ćhavo, o Avesalom, manglja te mudari le te šaj te ovel kralj ko oleso than (2. Sam. 15:12, 13). Odolese, o David valjanđa sig posig te ikljol ando Jerusalim. Ov vićinđa pe slugen hem phenđa lenđe: „Hajde te naša akatar, sose ako na ćeraja odova na ka spasina amen ando Avesalom“ (2. Sam. 15:14). Ked ikljilje andi diz, haljilo so neko valjani te irini pe te šaj te obavestini le ando Avesalomese planija. Odolese phenđa e Sadokese hem avere sveštenikonenđe te irinen pe. (Čitin 2. Samuilova 15:27-29.) On valjanđe te oven but oprezna. Odova so o David phenđa akale sveštenikonenđe te ćeren  hine but opasno. O Avesalom hine but nasilno hem sebično manuš kova izdajinđa pe dade. Zamislin samo so bi ćerela e Sadokese hem avere sveštenikonenđe ked bi šunela so on pomožinena e Davidese.

10. Sar o Sadok hem avera manuša zaštitinđe e Davide?

¹⁰ O David pućlja e Sadoke hem e Husaje, kova hine oleso šukar amal, te pomožinen lese (2. Sam. 15:32-37). O Husaj morandilo te ćerel pe so podržini e Avesalome hem dinđa le savet sar te napadini e Davide. Sebepi odova, o David hine le vreme te pripremini po napad. Palo odova, o Husaj vaćerđa e Sadokese hem e Avijatarese so phenđa e Avesalomese te ćerel (2. Sam. 17:8-16). Odola duj manuša šaj hine te obavestinen e Davide ando Avesalomese planija (2. Sam. 17:17). Uzi Jehovasi pomoć, o Sadok hem avera sveštenikija zaštitinđe e Davideso životi (2. Sam. 17:21, 22).

11. Sar šaj te oponašina e Sadokesi hrabrost ked pomožinaja e phralenđe?

¹¹ Ako hijam zamolime te pomožina e phralenđe kola tane ki opasnost, sar šaj te mothova hrabrost sar o Sadok? (1) Ićer tut ko uputstvija. Ko asavke okolnostija, but tano važno te ova poslušna te šaj te ova ko jekhipe. Šun o uputstvija kola dela ti podružnica (Jevr. 13:17). O starešine valjani redovno te podsetinen pe ko odova so phenena o uputstvija ando odova sar te pripreminen pe asi prirodno katastrofa hem so te ćeren palo odova (1. Kor. 14:33, 40). (2) Ov hrabro, ama oprezno (Posl. 22:3). Šukar razmislin angleder te ćere diso. Kobor god šaj, arakh tut. (3) Oslonin tut upro Jehova. Ma bistri so o Jehova mangela tu hem te phralja te oven bezbedna. Ov šaj te pomožini tumenđe bezbedno te pomožinen e phralenđe.

12-13. So sikljovaja ando Viktor hem Vitalij? (Dikh i slika.)

 ¹² Te dikha so hine e Viktoreja hem e Vitalijeja, duje phralencar kola legarđe hrana hem pani e phralenđe ko maribe, ki Ukrajina. O Viktor phenela: „Svugde rodinđam hrana e phralenđe. But putija, šaj hine te šuna sar pucinena uzo amende. Jekh phral dinđa e phralenđe hrana koja hine le ko podrum. Sebepi odova, but objaviteljija jekh vreme hine len odova so valjanđa lenđe te šaj te aćhon đivde. Đi ćhivđam odola buća ko kamioni, jekh bomba pelji oko 20 metre uzo amende, ama na eksplodirinđa. Celo odova dive molinđum e Jehova te del man hrabrost koja valjanđa maje te šaj hem ponodri te pomožinav e phralenđe.“

¹³ O Vitalij phenela: „Valjanđa maje bari hrabrost. Mo prvo putovanje trajinđa 12 satija. Sa odova vreme molinđum man e Jehovase“. O Vitalij hine hrabro, ama hem but oprezno. Ov pana phenela: „Molinđum man e Jehovase asi mudrost hem te na uzdajinav man upro mande. Vozinđum ko drumija aso kola o vlastija phenđe so šaj te koristina. Mi vera ulji pana pozorali ked dikhljum sar o phralja hem o phenja sarađujinena. On čistinđe o drumo ando ruševine, ćedinđe hrana, šeja hem avera važna buća hem ćhivđe len ko kamioni. A maje hem e Viktorese dinđe hrana hem arakhlje amenđe thana kaj šaj te odmorina amen đi putujinđam.“

AĆHOV VERNO E JEHOVASE

14. Sar šaj te utičini upro amende ako neko kas mangaja aćhavi e Jehova?

¹⁴ Jekh ando najbaro pharipe kova šaj te doživina tano ked neko andi amari porodica ja amaro paše amal aćhavi e Jehova (Ps. 78:40; Posl. 24:10). So popaše hijam odola osobaja, pana popharo šaj te ovel te istrajina ki odija situacija. Ako hijan le ki asavki phari situacija, e Sadokeso primer šaj but te ohrabrini tut.

15. Sose e Sadokese valjanđa hrabrost te aćhol verno e Jehovase? (1. Kraljevima 1:5-8)

¹⁵ Ked oleso amal o Avijatar irinđa po dumo e Jehovase, o Sadok aćhilo verno. Odova desinđa pe ko krajo ando Davideso životi. Angleder o David te merel, oleso ćhavo o Adonija manglja pes te ćhivel te ovel kralj, iako o Jehova phenđa so o Solomon valjani te ovel kralj (1. Let. 22:9, 10). O Avijatar tegani podržinđa e Adonija. (Čitin 1. Kraljevima 1:5-8.) Ađahar na samo so na hine verno e Davidese, već hem e Jehovase. Šaj samo te zamislina kobor tegani o Sadok hine tužno hem razočarimo! Pobuter ando 40 berš o Sadok hem o Avijatar zajedno služinđe sar sveštenikija (2. Sam. 8:17). Zajedno brininđe pe kotar „kovčeg ando ćaćutno Devel“ (2. Sam. 15:29). O solduj podržinđe e Davide sar kralj hem ćerđe but avera buća ki služba e Jehovase (2. Sam. 19:11-14).

16. So pomožinđa e Sadokese te aćhol verno e Jehovase?

¹⁶ Iako o Avijatar odlučinđa te izdajini e Davide, o Sadok aćhilo verno. O David đanđa so šaj uvek te verujini e Sadokese. Ked otkrijinđa pe odova so o Adonija ćerđa, o David phenđa e Sadokese, e Natanese hem e Venajase te pomazinen e Solomone te ovel kralj (1. Kralj. 1:32-34). E Sadoke but ohrabrinđe e Jehovase sluge, sar soj tano o Natan hem avera manuša kola hine verna e Devlese hem podržinđe e Davide (1. Kralj.  1:38, 39). Ked o Solomon ulo kralj, „ko Avijatareso than ćhivđa e svešteniko, e Sadoke“ (1. Kralj. 2:35).

17. Sar šaj te oponašine e Sadoke ako neko koj tano tuće paše aćhavi e Jehova?

¹⁷ Sar šaj te oponašina e Sadoke? Ako neko kas mangeja aćhavi e Jehova, tu hem ponodri aćhov verno e Devlese (Is. Nav. 24:15). O Jehova ka del tut snaga koja valjani tuće. Molin tut olese hem aćhov paše okolencar kola tane lese verna. Ov cenini ti vernost hem ka nagradini tut aso odova (2. Sam. 22:26).

18. So sikljovaja ando Marko hem andi Sajdsi?

¹⁸ Te dikha o primer ando Marko hem andi olesi romni i Sajdsi. Olenge duj ćhaja aćhavđe e Jehova. O Marko phenela: „Ando dive ked bijanđona te ćhave, tu but mangeja len hem ćereja sa so šaj te arakhe len. Odolese, ked aćhavena e Jehova tu nane tut više snaga nisose.“ Ov pana phenela: „Ama, o Jehova but pomožinđa amen te istrajina. Ked me na hine man snaga, mi romni hine zorali. Ked oj na hine la snaga, me hijum le zoralo.“ I Sajdsi phenela: „Amen ne bi istrajinaja ako o Jehova ne bi dela amen snaga. Me mislinđum so me hijum krivo aso odova so ulo. Odolese, phenđum e Jehovase sa so mučini man. Hari palo odova, jekh phen kola beršencar na dikhljum, alji koro mande ćhivđa pe vasta ko me pike, dikhlja man ko jaćha hem phenđa maje: ’Ma bistri Sajdsi, tu na hijan krivo!‘ Uzi Jehovasi pomoć, šaj hine hem ponodri radosno te služinav.“

19. So hijan odlučno te ćere?

¹⁹ O Jehova mangela sa olese sluge te oven hrabra sar o Sadok (2. Tim. 1:7). Ama, ov na mangela te oslonina amen upri amari snaga već upro leste. Odolese, ked hijan ki situacija kuri valjani te mothove hrabrost, rode pomoć ando Jehova. Šaj te ove sigurno so ov ka pomožini tut te ove hrabro sar so hine o Sadok (1. Petr. 5:10).