Na, ni ki Biblija, a ni ko istorijska knjige našti te arakha so o hrišćanija krstinđe pe umesto o manuša kola mulje.

Sebepi o način ko kova tano prevodimo akava stih ko but prevodija andi Biblija, disave mislinena so ko prvo veko o hrišćanija krstinđe pe umesto o manuša kola mulje. Na primer, dikh so pisini ko jekh prevod: „Ako o mule hić na vaskrsninena, sose pana krstinena pe aso on?“ (Čarnić).

Ama, dikh so phenđe duj izučavaocija andi Biblija. O doktor andi teologija, o Gregori Lokvud phenđa so ni ki Biblija, a ni ki istorija našti te arakhi pe nijekh dokaz ando odova so neko krstinđa pe umesto o mulo manuš. Aver izučavalac andi Biblija, o profesor Gordon D. Fi složinđa pe odoleja. Ov pisinđa so ni ki Biblija, a ni ki istorija našti te arakhi pe dijekh primer ando asavko krštenje. Ov phenela so ko Nevo zavet niked na vaćerđa pe odolestar, hem so nane nijekh dokaz so bilo kova hrišćanin ćerđa diso ađahar, niti so odova ćerđa pe ki bilo koja crkva koja hine formirimi palo e apostolengo meribe.

I Biblija phenela so e Isusese sledbenikija ka „ćeren učenikija ando manuša kotar sa o narodija“, ka „krstinen len“ hem ka „sikaven len te ićeren pe ko sa“ so o Isus zapovedinđa (Mat. 28:19, 20). Angleder so jekh manuš šaj te krstini pe, ov valjani te sikljol ando Jehova hem ando oleso Ćhavo, te verujini upro lende hem te šunel len. Okova kova već mulo hem kova tano ko grobo našti te ćerel odova, niti bilo kova hrišćanin šaj te ćerel odova umesto oleste (Prop. 9:5, 10; Jov. 4:1; 1. Kor. 1:14-16).

Tegani, sostar o Pavle vaćerđa?

Disave hrišćanija ko Korint phenđe so o mule na ka uskrsninen (1. Kor. 15:12). O Pavle mothovđa lenđe so olengo stav nane ispravno. Ov phenđa: „Svako dive suočinava man e meribaja.“ Naravno, ov pana hine đivdo. Ama, iako but putija hine ki opasnost, ov hine uverimo so palo meribe ka uskrsnini ko đivdipe ko nebo, sar o Isus (1. Kor. 15:30-32, 42-44).

O phralja ko Korint valjanđe te haljon so te oven pomazime hrišćanija značini so svako dive ka ovel len pharipa hem so ka meren angleder te oven uskrsnime. Te krstinen pe „ko Hrist Isus“, uključinđa hem te oven „krstime ko oleso meribe“ (Rimlj. 6:3). Odova značini so sar o Isus hem on ka ovel len pharipa hem so ka meren te šaj te oven uskrsnime ko đivdipe ko nebo.

Oko trin berš palo odova so krstinđa pe, o Isus phenđa duje apostolenđe: „Ka krstinen tumen e krstibaja koleja me krstinava man“ (Mar. 10:38, 39). O Isus akate na vaćeri ando kršenje ko pani, nego ando krštenje ko meriba. Ov manglja te phenel so sebepi soj tano verno e Devlese, odolese hem ka merel. O Pavle phenđa so o pomazanikija zajedno ka patinen te šaj zajedno te oven proslavime (Rimlj. 8:16, 17; 2. Kor. 4:17). Odolese hem on mora te meren te šaj te oven uskrsnime ko đivdipe ko nebo.

Premalo sa akava, o tačno prevod ando e Pavlese lafija bi ovela: „Ako nane ađahar, savi nada isi len okola kola krstinena pe te oven mule? Ako o mule na uskrsninena, sose tegani on krstinena pe te oven mule?“