„Jehova dži ked ka rodav te pomožine maje, a tu te na šune? Dži ked ka vičinavtu te pomožine maje sebepi o nasilje, a tu te na arakhema?“ (Avakum 1:2, 3). Akala lafija vačerdža o Avakum, jekh šukar manuš kas o Devel manglja. Da lji odova so ov vačerdža mothovi so na hinelje vera? Na, na hine adžahar. O Devel uverija e Avakume so ov džanela ked tano tačno o vakti te čhinavi o muke (Avakum 2:2, 3).

Ked amen isimen muke ja džiko koj tano amendže paše, tegani pučamen: „Sose o Devel na čerdža diso dži akana, sose na sidžari?“ Ama, i Biblija uverini amen: „O Jehova na harini te čerel odova so pheja, sar so disave mislinena so harini, nego strpljivo tano tumenca sose na mangela nijekh te merel, nego sare te peren pišmani“ (2. Petareso 3:9).

Pana hari! O Isus vačerdža so jekh grupa manuša kola živinena ko isto vakti ka dikhen nekobor buča so ovena ko sveto, kola ka mothoven soj tano paše „o kraj ando akava sveto“ (Matej 24:3-42). Odova so ko amaro vakti e Isusese lafija ovena čače, mothovi so o Devel pana hari ka promini o buča ko sveto. *

Ama, sar o Devel ka čhinavi sa o muke? Ked o Isus hine ki Phuv, ov mothodža so o Devel isilje moć te cidel e manušenge muke. Te dikha disave primerija.

Prirodna katastrofe. Ked o Isus hem oljese apostolija hine ko Galilejsko more, i bari bavlal haričkase hine ka batini o čamco. Ama, o Isus mothodža so ov hem oljeso Dad isiljen moć upro boršim, bavlal hem avera asavke buča (Koloskonendže 1:15, 16). O Isus vačerdža: „Ačhov! Ov rahati!“ So ulo palo odova? „I bavlal ačhilji hem ulo baro rahati“ (Marko 4:35-39).

Nabormipa. O Isus hine pendžardo sar džiko ko sačardža okoljen so na dikhlje, so hine sakatija, čak okoljen kola hineljen guba ja bilo save avera nabormipa. I Biblija phenela so ov „sačardža sa e nabormen“ (Matej 4:23, 24; 8:16; 11:2-5).

Bokhaljipe. O Isus koristija i moć koja dijalje oljeso Dad te šaj te čerel but habe. I Biblija vačeri so dži hine ki Phuv, ov duj puča parvardža buten manušen (Matej 14:14-21; 15:32-38).

Meribe. Ki Biblija pisini so o Isus irija ko dživdipe trinen dženen. Odoljeja mothodža so o Jehova isilje moć te cidel o meribe. Jekh ando odola manuša kova hine irimo ko dživdipe hine mulo štar dive (Marko 5:35-42; Luka 7:11-16; Jovan 11:3-44).