Šaj! I Biblija avela ando Devel, kova utešini okolen soj tane phage vilese (2. Korinćanima 7:6). Iako i Biblija nane knjiga aso mentalno sastipe, oj pomožinđa butenđe te ikljon ko krajo e lošno mislijencar, sar soj tano ked neko mangela te mudari pe. Olake savetija šaj te pomožinen hem tuće.

•  Save korisna savetija dela i Biblija?

•  Da li i Biblija vaćeri ando manuša kola manglje te meren?

•  Kola biblijake stihija šaj te pomožinen tuće te borine tut ako avela tuće ki godi te mudare tut?

•  So ako neko ando te amala phenela so mangela te merel?

•  So ako angleder mangljum te mudarav man?

• ● Vaćer sar osetineja tut.

   So phenela i Biblija: „O šukar amal uvek mothovi mangipe, hem ko phare dive phral ovela“ (Poslovice 17:17).

   So odova značini: Valjani amenđe averengi pomoć ked isi amen lošna mislija.

   Ako na vaćereja averenđe sar osetineja tut, te negativna mislija šaj te len ti snaga. Ama, ako vaćereja averenđe ando te osećanja, tegani šaj te osetine tut pošukar hem pozitivno ka dikhe ki ti situacija.

   Probin te ćere akava: Avdije vaćer nekasa andi ti porodica, ja disave poverljivo amaleja. a Isto ađahar, ki jekh sveska šaj te pisine sar osetineja tut.

• ● Rode pomoć ando doktorija.

   So phenela i Biblija: „Na valjani doktori e saste manušenđe, nego okolenđe soj tane naborme“ (Matej 9:12).

   So odova značini: Ked hijam naborme valjani te đa ko doktori.

   Ako razmislineja te mudare tut, odova šaj te ovel simptom ando psihičko nabormipe. Ked isi amen disavo problemi sastipaja amen na lađaja. Ađahar na valjani te lađa ni ando akava. O psihička nabormipa šaj te lečinen pe.

   Probin te ćere akava: So posig rode pomoć ando psihijatar.

• ● Ma bistri so o Devel brinini pe tutar.

   So phenela i Biblija: „Na bikinena pe li duj vrapcija aso duj novčićija? Ipak, o Devel na bistrela nijekhe olendar. . . Ma daran, tumen hijem povredna ando but vrabcija“ (Luka 12:6, 7).

   So odova značini: Tu hijan dragoceno e Devlese.

   Šaj mislineja so niko na brinini pe tutar, ama o Devel dikhela so desini pe tuće ko životi. Ov brinini pe tutar, čak iako nane tut volja te živine. Ko Psalam 51:17 pisini: „I žrtva koja o Devel prihvatini tani o phago duho. Devla, tu nane te odbacine okole soj tano phage vileja.“ O Devel mangela te živine sebepi so mangela tut.

   Probin te ćere akava: Rode dokazija ki Biblija so o Devel mangela tut. Na primer, šaj te čitine o 24. poglavlje andi knjiga Približi se Jehovi.

• ● Molin tut e Devlese.

   So phenela i Biblija: „Hem sa tumare brige forden koro [Devel], sose ov brinini pe tumendar“ (1. Petrova 5:7).

   So odova značini: O devel mangela te phene lese sar ćaće osetineja tut hem so brinini tut.

   O Devel šaj te del tut mir ko vilo hem snaga te borine tut (Filipljanima 4:6, 7, 13). Ko asavko način, ov pomožini okolenđe so celone vileja rodena pomoć olestar (Psalam 55:22).

   Probin te ćere akava: Avdije molin tut e Devlese ađahar so ka koristine oleso anav, Jehova. Vaćer lese sar ćaće osetineja tut (Psalam 83:18). Molin tut te pomožini tut te borine tut te problemeja.

• ● Razmislin ando odova so vaćeri i Biblija andi budućnost.

   So phenela i Biblija: „Odija nada tani amenđe sar jekh sigurno hem zoralo sidro andi duša“ (Jevrejima 6:19).

   So odova značini: Te emocije šaj te oven sar o brodo kas o talasija legarena akari-ukuri ked isi oluja. Ama, i nada andi Biblija šaj te pomožini tut te osetine tut stabilno.

   Akija nada nane samo jekh suno, sose o Devel obećini so ka cidel sa o buća sebepi kola patinaja (Otkrivenje 21:4).

   Probin te ćere akava: Ako mangeja te đane pobuter kotar nada andi koja i Biblija vaćeri, čitin i 5. lekcija andi brošura Šukar haberi ando Devel.

• ● Ćer diso so ćerela tut bahtalo.

   So phenela i Biblija: „Bahtalo vilo tano šukar leko“ (Poslovice 17:22).

   So odova značini: Ked ćeraja diso so ćerela amen bahtale, odova šukar utičini ko amare osećanja.

   Probin te ćere akava: Ćer diso ko so uživineja. Šun muzika koja pozitivno ka utičini upro tute, čitin diso so ka ohrabrini tut, ja arakh tuće disavo hobi. Isto ađahar, ako ćereja diso averenđe, čak hem tikne buća, ka ove bahtalo (Dela apostolska 20:35).

• ● Brinin tut ando to sastipe.

   So phenela i Biblija: „O vežbanje tano korisno“ (1. Timoteju 4:8).

   So odova značini: Ked vežbinaja, ked dovoljno sovaja hem ked šukar parvaraja amen, odova šukar utičini upro amende.

   Probin te ćere akava: Phir sigate barem 15 minutija.

• ● Ma bistri so o osećanja hem o okolnostija ko životi menjinena pe.

   So phenela i Biblija: „A na đanena savo životi ka ovel tumen tajsa“ (Jakovljeva 4:14).

   So odova značini: O problemija aso kola akana mislineja so našti te rešinen pe, šaj ka nakhen.

   Akana šaj tano tuće sa kalo, ama tajsato dive ti situacija šaj te menjini pe. Odolese rode načinija sar šaj te ikljove ko krajo te problemencar (2. Korinćanima 4:8). Ti situacija jekh dive šaj ka menjini pe, ama ako mudareja kokri tut, odova našti te menjini pe.

   Probin te ćere akava: Čitin ki Biblija ando manuša kola odobor hine obeshrabrime so manglje te meren hem dikh sar olenge okolnostija menjinđe pe ko pošukar. But putija ni na očekujinđe so diso ađahar šaj te ovel. Tele tane dinde disave primerija.

 Ja. I Biblija vaćeri ando manuša kola manglje te meren. O Devel na holjanđa upro lende, već pomožinđa len. O Devel šaj isto odova te ćerel hem tuće.

O Ilija

•  ● Ko hine ov? O Ilija hine hrabro e Devleso proroko kova jekh vreme hine but obeshrabrimo. Ki Jakovljeva 5:17 pisini so ov „hine obično manuš sar amen.“

•  ● Sose manglja te merel? Jekh vreme, o Ilija osetinđa pe usamljeno, mislinđa so ništa na vredini hem darandilo pe životose. Odolese molinđa e Devle te lel oleso životi (1. Kraljevima 19:4).

•  ● So pomožinđa olese? O Ilija phravđa po vilo e Devlese. Sar o Devel utešinđa le? O Devel mothovđa so brinini pe olestar hem mothovđa lese kobor tano ov moćno. Ov uverinđa e Ilija so ov tano korisno hem vredno hem dinđa le jekhe manuše te ovel oleso pomoćniko.

•  ▸ Čitin ando Ilija: 1. Kraljevima 19:2-18.

O Jov

•  ● Ko hine ov? Ov hine jekh barvalo manuš kova hine le bari porodica hem verno služinđa e Devlese.

•  ● Sose manglja te merel? Ando jekh puti ko oleso životi desinđe pe but lošna buća. Našalđa sa so hine le, mulje sa olese ćhave hem but naborsalo. Ko krajo, olese amala optužinđe le so ćerđa diso lošno hem so sebepi odova ulje lese sa odola buća. Odolese, o Jov phenđa: „Gadonđa pe maje mo životi! Na mangava više te živinav“ (Jov 7:16).

•  ● So pomožinđa olese? O Jov molinđa pe e Devlese hem vaćerđa averencar (Jov 10:1-3). Oleso amal o Elijuj ohrabrinđa le hem pomožinđa lese averćhane te dikhel ki pi situacija. Soj tano najvažno, o Jov prihvatinđa e Devleso savet hem pomoć.

•  ▸ Čitin ando Jov: Jov 1:1-3, 13-22; 2:7; 3:1-13; 36:1-7; 38:1-3; 42:1, 2, 10-13.

O Mojsije

•  ● Ko hine ov? Ov hine vođa ando purano Izrael hem verno e Devleso proroko.

•  ● Sose manglja te merel? Ov hine le but odgovornostija, o manuša stalno kritikujinđe le hem hine but umorno sebepi odova. Odolese molinđa e Devle: „Molinava tut. . . odmah te mudare man“ (Brojevi 11:11, 15).

•  ● So pomožinđa olese? Ov phenđa e Devlese sar osetinđa pe. O Devel pomožinđa e Mojsijese te na akhari kokri odova pharipe hem ađahar hine lese polokho.

•  ▸ Čitin ando Mojsije: Brojevi 11:4-6, 10-17.