E Gospodareskiri večera koja tani poznato sar Tajno večera ili Spomen-svečenost, ikeraja la baš sar so pišinela ki Biblija (1. Korinkjanite 11:20). Sprotivno taro adava, ko but religie lengere veruvanja hem običaija povrzime akale nastanea, na temelinena pe ki Biblija.

E Gospodareskiri večera ikerela pe te šaj te setina amen ko Isus hem te sikava amari blagodarnost hem cenenje baši žrtva so dengja la sa e manušenge (Matej 20:28; 1. Korinkjanite 11:24). Akava nane nesavi sveto tajna ili religiozno običaj kote so e vernikonge sikavela pe milost hem prostinela pe lengere grevija. a I Biblija vakerela amenge kaj amare grevija šaj te oven prostime samo ako sikavaja vera ko Isus, a na preku nesavo religiozno običaj (Rimjanite 3:25; 1. Jovanovo 2:1, 2).

O Isus vakergja ple učenikonge te ikeren e Gospodareskiri večera, ama na vakergja lenge točno kobor puti te keren adava (Luka 22:19). Nesave mislinena kaj adava valjani te keren le sekova masek, sekova kurko, sekova dive, poviše puti ko dive ili kobor so jekh manuš mislinela kaj tano potrebno. b Ama, ake nesave bukja so valjani te razmislina baši lende.

O Isus vospostavingja e Gospodareskiri večera ko dive keda ikerela pe sine i evrejsko Pasha, a ko adava isto dive ov mulo (Matej 26:1, 2). Adava na sine slučajnost. I Biblija sporedinela e Isuseskiri žrtva pashalno žrtvaja (1. Korinkjanite 5:7, 8). I Pasha ikerela pe sine jekh puti ko berš (2. Mojseeva 12:1-6; 3. Mojseeva 23:5). Isto agjaar, o hristijanja taro prvo veko, jekh puti ko berš ikerena sine i Spomen-svečenost bašo e Isuseskoro meribe. c E Jehovaskere svedokija, isto agjaar ikerena akava jekh puti ko berš, adaleske so agjaar temelinela pe ki Biblija.

Keda o Isus vospostavingja e Gospodareskiri večera, pomožingja amenge te odredina na samo kobor često te ikera la, nego isto agjaar te odredina o dive hem o vreme. Ov vospostavingja i Spomen-svečenost ko 14 nisan 33 berš a.e., otkeda pelo o kham, sprema o biblisko lunarno kalendari (Matej 26:18-20, 26). E Jehovaskere svedokija, sekova berš ko isto datum ikerena i Spomen-svečenost baš sar so kergje o prva hristijanja. d

Iako o 14 nisan 33 berš a.e., sine petok, akava datum sekova berš perela ko javer dive taro kurko. O dive keda perela 14 nisan, odredinaja le ko isto način sar so kerena sine ko e Isuseskoro vreme, a na sar o metode kola so koristinena pe sine bašo sovremeno evrejsko kalendari. e

Keda vospostavingja e Gospodareskiri večera, o Isus koristingja o maro bizo kvasaco hem i loli mol kola so ačhile tari pashalno večera (Matej 26:26-28). Sar so kergja ov, amen da koristinaja maro bizo kvasaco ili bizo nesave javera začinija hem čisto loli mol, a na soko taro drakha ili mol kolate soj čhivdo šekeri, začinija ili alkohol.

Nesave religie koristinena maro kvasacoja , iako ki Biblija često koristinela pe ov sar simboli bašo grevo hem nešto soj rumimo (Luka 12:1; 1. Korinkjanite 5:6-8; Galatite 5:7-9). Adaleske, samo maro bizo kvasaco hem bizo javera začinija šaj te odgovorinel sar simboli bašo e Hristoseskoro telo kova so sine bizo grevo (1. Petrovo 2:22). I Biblija, isto agjaar na poddržinela te koristinel pe soko taro drakha, namesto mol. Nesave crkve adava kerena adaleske so zabraninena te piel pe alkohol, ama adaja zabrana na temelinela pe ki Biblija (1. Timotej 5:23).

O maro bizo kvasaco hem i mol so koristinena pe ki Spomen-svečenost, tane simbolija so pretstavinena e Isuseskoro telo hem o rat. Akala simbolija na pretvorinena pe ko nesavo čudesno način ko telo hem ko rat, a ni nane doslovno telo hem rat, sar so nesave verujnena. Te dikha so vakerela i Biblija bašo akava.

• Keda bi o Isus zapovedinela sine ple učenikonge te pien leskoro rat, tegani ov bi vakerela ple učenikonge te phagjen e Devleskoro zakoni, kova so zabraninela te koristinel pe rat (1. Mojseeva 9:4; Dela 15:28, 29). Ama, o Isus nikogaš na bi čhivela sine e javeren te phagjen e Devleskoro zakoni baši svetost e rateskiri (Jovan 8:28, 29).

• Keda bi o apostolija doslovno piena sine e Isuseskoro rat, ov na bi vakerela lenge sine kaj adava rat „ka del pe bute dženenge“, so sikavela kaj leskiri žrtva panda na sine dendi (Matej 26:28).

• O Isus žrtvujngja plo životo „jekh puti zasekogaš“ (Evreite 9:25, 26). Ama, keda bi ki e Gospodareskiri večera o maro hem i mol pretvorinena pe ko leskoro telo hem rat, adava bi ovela sine kaj sekova puti o Isus dela palem pli žrtva.

• O Isus vakergja: „Keren akava te setinen tumen mande“. Znači, ov rodingja taro ple sledbenikija te setinen pe ki leskiri žrtva, a na te povtorinen la (1. Korinkjanite 11:24).

Okola so verujnena ki transsupstancija, ili javere lafencar ko adava kaj o maro hem i mol, ovena e Isuseskoro doslovno telo hem rat, temelinena akava sikajbe ko nesave bibliska stihija. Na primer, ko but bibliska prevodija pišinela kaj o Isus baši mol vakergja: „Akava tano mlo rat“ (Matej 26:28). Ama, ko javera prevodija pišinela: „Akava pretstavinela mlo rat“. f Sar so kergja but puti keda sikavela sine e manušen, o Isus akate koristingja jekh metafora (Matej 13:34, 35).

Keda e Jehovaskere svedokija ikerena e Gospodareskiri večera, samo tikno broj lena taro maro hem i mol. Soske adava tano agjaar?

E Isuseskoro rat ovozmožingja te kerel pe jekh „nevo sojuz“, kova so zameningja o sojuz so sine maškar o Jehova o Devel hem o purano izraelsko narodo (Evreite 8:10-13). Okola soj tane delo taro akava nevo sojuz, lena taro simbolija ki Spomen-svečenost. Ko akava sojuz na pripadinena sa o hristijanja, nego samo okola soj tane vikime taro Devel. (Evreite 9:15; Luka 22:20). Ola ka vladinen e Isusea ko nebo hem i Biblija vakerela kaj ola tane samo 144.000 manuša (Luka 22:28-30; Otkrovenie 5:9, 10; 14:1, 3).

Različno taro „tikno stado“ kola so ka vladinel e Hristosea, poviše džene amendar nadinena pe kaj ka oven delo taro „baro mnoštvo“, kova so ka dobinel večno životo ki Phuv (Luka 12:32; Otkrovenie 7:9, 10). Iako na laja taro simbolija ki Spomen-svečenost, ki adaja prilika sikavaja amari blagodarnost baši žrtva e Isuseskiri so dengja la amenge (1. Jovanovo 2:2).