O pekamberi o Musa vakergja kaj, ako šunaja e Devleskere zapovedija, o Devel ka del amen bereketija (5. Mojseeva 10:13; 11:27). Amen na siem e Devleske poslušna tari dar kaj ka kazninel amen. Namesto adava, leskere but šuže osobine pottikninena amen te ova leske poslušna taro mangipe hem te na kera nešto so ka razočarinel le. Ko e Devleskoro Lafi pišinela: „Te mangel pe e Devle značinela te ikeren pe leskere zapovedija, a leskere zapovedija nane phare“ (1. Jovanovo 5:3).

Ama, sar šaj i poslušnost sprema o Devel te anel amenge bereketija? Te dikha duj načinija.

„Me, o Jehova, sium tlo Devel, kova so sikavela tut bašo tlo šukaripe, okova so vodinela tut ko drumo koleste so valjani te dža“ (ISAIJA 48:17).

O Jehova, amaro Devel hem Stvoriteli, šukar džanela amen hem dela amen o vodstvo so valjanela amenge. Ako mangaja leskere sovetija te pomožinen amenge te ana mudra odluke, mora te doznajna taro leskoro Lafi so mangela te kera hem palo adava te postapina sprema adava.

„Bahtale tane okola so šunena e Devleskoro lafi hem ikerena le!“ (LUKA 11:28).

Avdive, milionja manuša so ikerena pe ko adava so pišinela ko e Devleskoro Lafi čače tane bahtale. Na primer, razmislin bašo jekh manuš tari Španija so but lokheste holjanela sine hem ponašinela pe grubo e javerencar, pa čak ple romnjaja. Jekh dive, džikote čitinela sine so pišingja o pekamberi o Musa, primetingja kobor krotko sine o Jusuf (Josif), o čhavo e Jakupeskoro (Jakoveskoro). O Jusuf sine bikimo sar robo hem nepravedno čhivdo ko zatvor. Iako doživingja sa akava, o Jusuf sepak ačhilo krotko, miroljubivo hem prostinela sine e javerenge (1. Mojseeva, poglavja 37-45). Ov priznajngja: „Adava so razmislinava sine bašo primer e Jusufeskoro, pomožingja mange te ovav krotko, ljubezno hem te ovel man samokontrola. Adaleske, akana sium čače bahtalo“.

Ko e Devleskoro Lafi isi javera da sovetija bašo adava sar valjani te ponašina amen e javerencar. Ki javer statija ka dikha nesave lendar.