Šaj li te zamisline tuke o životo ki Phuv bizo kham? O kham dela energija te šaj o kašta te mukhen listija hem lulugja, a isto te den plodija hem seme. Isto agjaar, adaja energija kerela te šaj o kašta preku ple korenija te ciden o pani tari phuv hem te anen le dži ko listija, a palo adava te mukhen o pani ko vozduh sar parea.

O bršim tano skapoceno poklon taro Devel kova so kerela i phuv te bijanel hrana. Adalea so dela adava, o Devel zadovolinela amari potreba bašo hajbe hem kerela amen bahtale.

But dada sekirinena pe dali ka uspejnen te obezbedinen ple familijake dovolno hajbe hem šeja. Primetin so pišinela ko e Devleskoro Lafi: „Dikhen o ptice ko nebo, ola ni sejnena, ni žnejnena, ni ko ambarija khedena, a palem tumaro Dad soj ko nebo dela len hajbaske. Zarem tumen na vredinena poviše lendar?“ (Matej 6:25, 26).

„Primetinen e lulugjen sar bajrona ko pole... ama vakerava tumenge kaj ni [o cari] o Solomon, ki celo pli slava, na sine uravdo doborom šukar sar jekh taro akala lulugja. Ako o Devel agjaar uravela o rastenija ko pole... nane li panda poviše te uravel tumen?“ (Matej 6:28-30).

Ako o Devel šaj te obezbedinel amenge hajbe hem šeja, sigurno šaj te obezbedinel amenge sa o javera da bukja so valjanena amenge bašo životo. Ako amenge najvažno te kera e Devleskiri volja, ov šaj te del amen bereketi džikote trudinaja amen te proizvedina hajbe ili šaj te pomožinel amenge te arakha nesavi buti te šaj te kina adava soj amenge potrebno (Matej 6:32, 33).

Čače, keda razmislinaja bašo kham, bršim, ptice hem lulugja, haljovaja kaj isi amen bare pričine te manga e Devle. Ki sledno statija ka dikha sar amaro Stvoriteli otsekogaš komuniciringja e manušencar.