• Birimo taro Devel. „Me biringjum mle care... Ka dav tut narodija sar nasledstvo hem ka dav tut celo sveto“ (Psalm 2:6, 8).

• Nasledniko e careskoro e Davideskoro. „Bijandilo amenge čhavo, dobingjem murš... Leskiri vlast dur ka buvljol hem o mir ko e Davideskoro prestol hem ko leskoro carstvo nane te ovel le krajo“ (Isaija 9: 6, 7).

• Bijamo ko Vitleem. „Vitleem... tutar ka ikljol okova so ka ovel vladeteli... Ov ka vladinel ko celo sveto“ (Mihej 5:2, 4).

• Otfrlimo hem mudardo taro manuša. „Sine ponižimo hem na vredinela sine amenge ništo. Sine posavdo bašo amaro grevo, sine zdrobimo bašo amare grevija“ (Isaija 53:3, 5).

• Voskresnimo hem proslavimo. „Nane te mukhe man ko grobo. Nane te dozvoline tlo verno sluga te dikhel i dupka e groboskiri... Ko tlo desno vas isi večno bahtalipe“ (Psalm 16:10, 11).

Ki celo manušikani istorija, samo jekh ličnost ispolninela o uslovija te šaj te ovel sovršeno vladeteli, a adava tano o Isus Hristos. Ustvari, jekh angeli leskere dajake, e Marijake, vakergja: „O Devel ka del le o prestol leskere dadeskoro e Davideskoro... hem ov večno ka vladinel sar Cari“ (Luka 1:31-33).

O Isus nikogaš na vladingja ki Phuv. Namesto adava, ov ka vladinel upro manuša taro nebo sar Cari ko e Devleskoro Carstvo. Soske o Isus ka ovel sovršeno vladeteli? Razmislin so kergja keda sine ki Phuv.

•   O Isus grižinela pe sine e manušenge. O Isus pomožingja muršenge hem džuvlenge bizi razlika kobor berš sine len, kotar avena sine hem dali sine barvale ili čorole (Matej 9:36; Marko 10:16). Keda jekh leprozno molingja le: „Te mangljan, tu šaj te sasljare man“, o Isus žalingja le hem sasljargja le (Marko 1:40-42).

• O Isus vakergja amenge so očekujnela amendar o Devel. Ov vakergja: „Našti te služinen hem e Devleske hem e barvalipaske“. Isto agjaar, dengja amen sovet kaj valjani te ponašina amen e javerencar sar so mangaja ola te ponašinen pe amencar. Adava načelo tano pendžardo sar Zlatno pravilo. O Isus istakningja kaj e Devleske nane važno samo sar ponašinaja amen, nego isto agjaar so razmislinaja hem so osetinaja. Adaleske, te šaj te kera adava so očekujnela amendar o Devel, valjani te pazina save čuvstvija razvinaja ko amaro vilo (Matej 5:28; 6:24; 7:12). O Isus istakningja kaj te šaj te ova čače bahtale, valjani te džana kola tane e Devleskere merilija hem te živina sprema lende (Luka 11:28).

• O Isus sikavgja amen te manga e javeren. Leskere lafija hem postapke sine len silno vlijanie upro okola so šunena le sine. Ki Biblija pišinela: „O narodo sine vooduševimo taro način sar sikavela sine, soske sikavela sine sar nekoj so isi le avtoriteti taro Devel“ (Matej 7:28, 29). O Isus pottikningja e manušen: „Mangen tumare dušmanen“. Ov molingja pe čak okolenge so učestvujngje ko leskoro mudaribe: „Mo Dad, prostin lenge, soske na džanena so kerena!“ (Matej 5:44; Luka 23:34).

O Isus šaj uspešno te vladinel upro manuša. Keda ov ka vladinel, o manuša ka oven čače bahtale adaleske so ov mangela len hem grižinela pe lenge. Ama, keda ka počminel te vladinel?